اقتباسات

بنت الحلال

تزوجت عن حب، وأخذت حبيبتي غصب عن الكل....
بس عملت حادث سير بعد زواجي ب ٥ سنين !
هالحادث كان خطير كثير؛ وما عرفت كيف صحيت منه...
الدكاترة حكولي اني بعد هالحادث مش رح أقدر امشي؛ يمكن مؤقت واذا تجاوبت للعلاج ممكن ارجع امشي عالخفيف ....
انا يومها نفسيتي تدمرت، صحيح اني رجال، ولازم اكون قوي؛ بس مين بدو يصرف على مرتي وولادي !
مرتي اكيد رح تتركني ، ما رح تتحمل تكمل حياتها مع واحد مشلول !
اول ما فتحت عيوني كانت امي ومرتي عندي، كانت امي بتبكي وحالتها حالة ..
بس مرتي بتبتسملي  ولا كأنه صاير شي ....
حكتلي الحمد لله عالسلامة حبيبي .....
اطلعت فيها وحكتلها حكالك الدكتور اني صرت مشلول....
هون امي صارت تعيط بصوت أعلى ....
ابتسمتلي وحكتلي اه حكالي قدر الله وما شاء فعل !
هاد نصيبك شو بدك تعمل ....
وراحت صارت تهدي بأمي ....
فعلا ضليت بالمستشفى اسبوعين، كانت كل يوم تيجي عندي، احيانا تجيب الولاد، واحيانا تكون طابختلي طبخة زاكية وجايبتها  ، كانت تقعد تضحكني، واحكيلها كيف الوضع ناقصكم شي؛ حكتلي لا ولا شي كل شي تمام !
واجار البيت كيف دفعتي؟
حكتلي كان معي مصاري من اهلي ....
طبعا وقفتها معي ولا بحياتي بنساها، لما رجعت عالبيت،  صرت عصبي كثير لاني حاسس بالعجز واني مش رح اقدر اشتغل شي واصرف على عيلتي ...
وصرت اشوف مرتي كيف قاتلة حالها بين شغل البيت وشغل برا البيت ...
كنت اتفشس بكل اشي بيجي قبالي؛ واحيانا اصير اصرخ ، ومرة زعلتها وعصبت عليها ، وقتهااا يا الله شو حسيييت اني حقير !
لانه ما جاوبتني ولا بشي وحكتلي ما بصير تعمل هيك ....
كانت قوية كثير؛ ما تنزل دمعتها؛ قلبهااا كبير وبوسع الدنيا، تذكرت كيف تزوجتها عن حب ٣ سنين، وكم مرة معها فعليا تخطيت كل شي، قصتنا كانت معقدة؛ وامي بدها تزوجني لبنت خالي، وغضبت علي اذا بتزوج غيرها، قلتلها يومها انا بحب بنت وبدي ياها وما رح اخد غيرها !
قالتلي بس هالبنت مش حلوة  وناصحة وما حبيتها!
وابوي حكالي انه اهلها ناس مش مناح، ونوريين كثير ، وابوها بالسجن لانه نصاب .....
قلتلها انا شايفها احلى وحدة بالدنيا ؛  وشو ذنبها هي اذا اهلها هيك  او ناصحة !
وفعلا بعد ٣ سنين يئسوا مني وزوجوني ياهااا .....
يومها اجت امي عندي بتحكيلي بتعرف مرتك طلعت بنت أصول شوف كيف ما تركتك ولا لحظة وقايمة بكل شي لحالها ....
قلتلها يعني هسا اقتنعتي انها مناسبة الي ..

حكتلي منيح ما تزوجت بنت خالك، هسا رافعة قضية طلاق عزوجها لانه خسر  بالشغل وصار وضعه سيء كثير، كان رمتك يما !
اطلعت فيها وحكتلها عرفتي ليش اختارتها!
قالت اه والله ...
اجت مرتي  وكانت تعبانة كثير، بس بتبشرني وبتحكيلي التحاليل طلعوا وفي امل تمشي!
حضنتها وبلشت بالعلاج الفيزيائي وفعليا بعد فترة طويلة قدرت ارجع امشي عالخفيف  ، وقدرت ارجع عشغلي؛ واحسن وضعنا ، بحكوا وراء كل رجل ناجح امرأة ...
انا بحكي انها امام كل رجل ناجح امرأة؛ لأنه المرأة القوية، الي بتوقف مع زوجها بكل ظروفه؛ والي بتدعموا عالحلوة والمرة، والي بتكون على قد حالها عملة نادرة هالأيام .....
وهي الزوجة المناسبة....
لما بدك تتزوج لا تطلع على شكلها، ولا على اهلها؛ولا على  كل المظاهر
  اطلع على قلبها وروحها ، شوف مواقفها مع الناس الي حواليها، دور على البنت الي تسندك!  لانه سندها هو الوحيد الي ما رح تحس بالعجز في ...
دور على اللي بكل شي بصير معك رح تضل معك، اوعك تتخلى عن بنت حبيتها عشان مثل ما حبتك رح تحب غيرك! او لانها بيوم من الأيام  حبتك وسلمتك قلبها ، لانه بحياتك ما رح تلاقي وحدة مثلها
تزوجها لانها هي مناسبة لالك، وسعادتك معها ...