اقتباسات

بكفي💔

لما صار عمري 25 ولساتني مش متزوجة، وزاد حكي النساوين؛ ونسوان عمامي عالطالعة والنازلة شوو مالك لليوم ما تزوجتي، قررت اوافق على أول واحد بتقدملي، لإني خايفة اعنس مثل ما بقولو والمجتمع ما برحم !
يومها تقدملي واحد، ما عجبني وضعه كثير، وحكيت لامي اني مش مرتاحة لاله، بسس امي حكتلي بكفي حدا فصلك!
وافقي وبكرا بتغير !
وابوي نفس الشي كان رأيه ، ما انا مثل الهم عندهم،وخطبنا ، طبعا اولها الكل كان فرحان الي، حتى جاراتنا كانوا مكيفين ؛ تقولوا هم لي خطبوا ...
بس انا من جواتي ما كنت مبسوطة معه، كان في تصرفات استفزازية، وبعصب وبكفر !
انا يوم ما شفته بكفر حكيت لامي بدي اتركه، قالتلي ما كل الزلام بكفرو لما يعصبوا بعدين معه مصاري ومنيح!
وضلينا هيييك ، لتزوجنا؛ اول شهر زواج بلشت المشاكل بينا؛ حكيت لامي عنه، قالتلي احملي يما بكرا لما يجي ولد بعقل !
وسمعت كلامها؛ وحملت ، وولدت اول ولد، وما عقل زوجي؛ كان يروح متأخر بنص الليل؛ وصار يضربني ويهيني؛ حكيت لامي يما ما عقل! صاروا الجارات يحكولي يلا جيبي اخ لابنك ، حرام يضل وحيد!
حملت وولدت بالثاني؛  وزوجي ما عقل
حردت عند دار اهلي اسبوع لما شفت المخدرات بدارنا  ، بس ابوي خاف من الفضيحة ورجعني لعنده؛ ووعدو زوجي ما يضربني ولا يجيب مخدرات قال!
وهييك بعد 4 سنين قرفت حياتي؛ طلبت الطلاق، وافق؛  بس اخد ولادي وما عرفت وينهم!
ومنعني اشوفهم !
بعد فترة سمعت انه تزوج؛ وانا كنت خلص مسافرة برا البلد !
كانت امنيتي اشوف ولادي بس كان رافض؛ كنت ادعيلهن ليل نهار!
اليوم فتحت الفيسبوك لقيت الناس بتتحسبنن على الام الي تركت ابنها، وقتلته مرت ابو، انا وقتهااا انهرت، لما شفت الولد هووو ابني !
هاد الي ميت ابني انا، شفت الصووورة ووقعت عالأرض؛ صحيت لقيت حالي بالمستشفى!
ندمت عاللحظة الي وافقت فيها على زوجي، سبيت عالمجتمع وعلى اهلي الي خلوني معه، كرهت كل شي بحياتي وانا خسرت اغلى شي عندي ....

خلونا نوقف هالدراما شوي القصة خيالية بس خطر ببالي هالسيناريو لما شفت مرت الاب الي قتلت ابن زوجها!
شو بكون ورا هالقصة، جارات ونسوان ما برحموا البنت اذا  ما تزوجت، الاهل الي كل ما بنتهم تحكيلهم عن زوجها يا بحكولها تحمل، يا اخرته بعقل ولا الفضيحة؛ ولا على عيلة زوجها الي هالولد خطيته برقبتهم ، مش سائلين غير بحالهم، طبعا كل واحد مدلل ولاده ومرتاح شو اله بغيره !

مشان الله بكفييي ظلم للبنت؛ وتحميلها كل المسؤولية؛ بكفي يا مجتمعنا تخلف؛ الزواج اذا مش اساسه الدين والاحترام ما بلزم؛ والي بتشوف زوجها مش منيح يختي تحمليششش! شو ذنب هالولاد ، العاطل عمره ما بصير منيييح ولي ما بخاف ربنا ما رح يخاف من شي !

بكفي جد بكفي !