Ice Breaker (Guillier Academy Novella)

Chapter 12 : Rectify

*Tyrone's POV*

"Ano sa tingin mo, Simon?" Tanong ko sa kanya habang paakyat kami ng hagdan papunta sa Third floor ng Administrator's  building.

Hindi naman siya nagsalita at parang inignora nya lang ang tanong ko.

"Huy! Simon! Naririnig mo ba ko? Hello?!"tanong ko sa kanya. Lumapit pa ko at ini-wave ang kamay ko sa harap ng mukha niya.

Nagsalubong ang kilay niya at halatang nainis siya sa ginawa ko. Bahagya rin siyang lumayo sa akin.

"Tigilan mo nga ako, Tyrone. Wala ako sa mood sakyan ang trip mo." Masungit pang sabi niya.

Imbes na manahimik lalo pang lumawak ang ngiti ko at muli akong lumapit sa kanya.

"Sungit mo naman. Di ka naman dating ganyan ah.." nagbibiro pang sabi ko, pero mabilis akong lumayo sa kanya ng matalim nya kong tingnan.

Nakangising tumingin ako sa kanya. Habang napabuga naman siya ng hangin at tila nangungunsuming tumingin sa harap namin.

Nakaakyat na kami ng Third floor ng bigla na lang siyang huminto.

Napahinto din sa akmang paghakbang ang paa ko at nagtatakang tumingin sa kanya.

"Uy... anong problema?" Tanong ko pa, at lalong kumunot ang noo ko ng unti unti siyang ngumiti. Pagkatapos ay tumingin siya sa akin at tuluyang ngumisi.

"Alam mo Tyrone, imbis na kung ano-anong kalokohan ang ginagawa mo, dapat yung mga importanteng bagay  ang inaatupag mo." nangingislap ang matang sabi niya.

Bahagyang tumaas ang kilay ko. "Gaya ng......"

Unti unting gumalaw ang mga mata niya sa kanan. Pagkatapos ay pumihit siya at isinandal ang kaliwang balikat sa pader. Humalukipkip din siya at tumango sa harap niya.

"Gaya nun."

Takang sinundan ko ang tinitingnan niya. Nung una hindi ko makita ang tinutukoy nya dahil narin sa pailan-ilang Elites na nasa corridor na halatang nagpapalipas ng oras habang hindi pa nagsisimula ang klase.

Nakailang suyod din ako sa kabuuan ng corridor hanggang sa kumilos ang dalawang Elites na lalaki at ipinakita sa akin ang tinutukoy ni Simon.

Mga Elites sila ng Nacht. Limang lalaki at dalawang babae. Halatang masaya ang pinaguusapan nila dahil narin sa lakas ng tawanan ng grupo nila.

Kung tutuusin ay normal na eksena na to sa araw araw na buhay namin dito sa Academy. Pero ang hindi normal ay ang makita ko si Carmela kasama si Zach.

Agad nawala ang ano mang bahid ng kalokohan sa katawan ko. Maging ang masaya kong mood kanina parang lobong pumutok at naglaho.

"Napapansin kong mas nagiging close sila habang tumagal. " narinig kong sabi ni Simon. At parang ako naman ang nainis sa kanya ng marinig ko ang tila natatawang boses niya. Ganun pa man, sinigirado kong walang emosyon ang makikita sa mukha ko. "Nagsimula yan ng Guild Tournament. Hindi ko inaasahang magkakasundo sila." Dagdag pa niya.

Naramdaman kong bumaling sa akin ang tingin niya. At ng hindi ako kumilos o magsalita ay nakita ko sa gilid ng mga mata ko ng magbuntong hininga siya. Umayos din siya ng tayo at naramdaman ko ang pagtapik niya sa balikat ko.

"Kung ako sayo... ititigil ko na ang paglalaro ko. Maging seryoso ka na at iclaim kung anong sayo." Payo pa niya.

"Hindi niya gusto yun." Sa wakas ay sabi ko, pagkatapos ay bumaling sa kanya. "Hindi niya gustong maugnay ulit sa akin."

Tumaas ang kilay niya na tila hindi kapani-paniwala at isa nanaman sa mga kalokohan ko ang sinasabi ko.

"Sinabi ba nya yan?" Tanong pa niya.