Ice Breaker (Guillier Academy Novella)

Chapter 5: To save

*Tyrone's POV*

Puno ng takot at pagaalala kong tinakbo ang daan pabalik ng Administrator's building habang buhat buhat ang wala paring malay na si Carmela.

Halos sumikip na ang dibdib ko sa sobrang bilis at tindi ng pagtibok ng puso ko. At tila kamay na sumasakal din sa akin ang matinding takot sa puso ko. Lalo na sa tuwing makikita ko ang namumutlang mukha nya at ang dugong naglandas mula sa tengga nya hanggang sa pisngi at leeg niya.

"Mela?! Mela?!" Subok kong paggising sa kanya. Pero nanatiling walang tugon mula sa kanya. Maging ang mga mata niya ay nanatiling hindi gumagalaw.

Lalo ko pang binilisan ang pagtakbo ko. Ganun din ng dalawa pang estudyanteng nakasunod sa likod ko.

Hindi kami tumigil hanggang sa marating namin ang Administrator's building.

"Tabi! Tumabi kayo!" Sigaw ko sa ilang estudyanteng nakakalat sa lobby.

Gulat na tumabi naman sila at pare parehong nanlaki ang mga mata nila ng makita si Mela.

Naramdaman kong may hanging lumampas sa akin at nakita ko ng maging maliit na ipu-ipo iyon sa harap ko. Mabilis na nagsipagilagan dun ang mga estudyanye kaya nagawang linisin niyon ang daan namin at naging madali sa amin ang pagpunta sa Clinic. Alam kong si Simon ang may gawa nun kahit hindi ko siya lingunin.

Mabilis ding tumakbo si Leon para lampasan ako at nagmamadali niyang binuksan ang pinto ng Clinic para papasukin kami.

"Ms Kath! Ms Kath!" Sigaw ko at mabilis at maingat na inihiga si Mela sa pinakamalapit na kama.

"Anong nangyari?" Tanong ni Ms Kath at mabilis na lumapit sa amin.  Huminto naman sila Simon at Leon sa may pintuan.

"Ako po ang may kasalanan. Hindi ko alam na naroon siya ng gamitin ko ang ability ko. Huli na ng malaman ko." Sagot ni Leon at nagaalalang tumingin kay Mela.

Alam kong hindi naman niya sinasadya ang nangyari. At kung mananaig lang ang utak ko ay alam kong wala dapat siyang ihingi ng tawad. Pero iba ang tinatakbo ng puso ko, nakaramdam ako ng matinding galit sa kanya dahil sa nangyari kay Mela. At abot abot ang pagpipigil kong saktan siya sa mga oras na to. Naikuyom ko ang mga kamay ko at huminga ng malalim para pigilin ang galit ko, pagkatapos ay tumingin ako kay Ms Kath.

"Pakiusap. Tulungan nyo po siya." Halos magmakaawa ko ng sabi.

Agad naman niyang hinawakan si Mela at nakita ko ang paglabas ng asul na liwanag sa mga kamay niya. Mabilis iyong gumapang hanggang sa matakpan niyon ang buong katawan ni Mela.

Kumakabog ang dibdib akong nagpapalit palit ng tingin kay Ms Kath at Carmela. At parang may biglang sumuntok ng malakas sa dibdib ko ng makita kong nagsalubong ang kilay ni Ms Kath.

"Ms Kath?" Nagaalalang tanong ko.

Hindi niya ko pinansin at binalingan sina Simon at Leon. "Puntahan nyo si Mr Mike sa klase niya. Nasa second floor siya. Room 7. Kailangan ko ng tulungong niya. Bilis!" May pagmamadaling utos niya.

Saktong may puting liwanag na lumitaw sa tabi nila. Bumukas ang isang portal at lumabas doon ang isang Nacht student. Nagsara din iyon agad sa likuran niya pagkaapak na pagkaapak ng dalawang paa niya sa silid.

Nakangiti pa siyang tumingin kela Leon pero mabilis din napalis iyon ng makita niya ang itsura nila. Bumaling din siya sa amin at kumunot ang noo niya.

"Anong nangyari?" Tanong pa niya.

Hinawakan ni Simon ang kamay niya at mabilis siyang hinila sa pintong binuksan ni Leon.

"Sa labas namin ipapaliwanag. Bilis." Narinig ko pang sabi ni Simon bago isara ang pinto.

Kabadong tiningnan ko naman si Ms Kath.