اياد قعد علي الارض جمب السرير و سند راسه و عينه مليانة دموع ... ليليان علي السرير مبتنطقش من الصدمة
=اياد : " انتي ... انتي محبتينيش .. انا كنت هتجوزك علي سنة الله و رسوله .. انا محبتش غيرك .. انا بعشق كل تفصيلة فيكي .. انا اتجننت و اتعميت لما شفتك مع غيري ... اول يوم شفتك فيه ف الجامعة مقدرتش .. انزل عيني من عليكي ... انا كنت بسمعك لما بتتكلمي مع اصحابك .. كنت عارف انتي نفسك تسافري فين و بتحبي ايه .. انا كنت بموت نفسي في الشغل عشان اقدر احققلك اللي نفسك فيه و ... كنت مجهز كل الاماكن اللي نفسك تروحيها و كنت مسجل كل ده نعمله سوا وهنسافر ايه الاول و ايه بعد كده .. مع بعض .. عارفة بسمة؟؟ انا خليتها تتصاحب عليكي عشان تعرفلي عنك حاجات اكتر .. انا حاطط صورك في كل جزء عندي في الكويت عشان تبقي أكنك معايا ... انا ... انا .. انا اسف .. انا بعشقك " و مقدرش يمسك دموعه اكتر من كده ..
~.~
عزت رن علي احمد و طلب منه ييجي وميعرفش كاميليا حاجة .. ساعة و جرس الباب رن . عزت قام فتح لأحمد و وشه في الارض ..
=احمد : " ايه اللي بيحصل انا مش فاهم اي حاجة .. ليليان فين .. مازن ليليان فين؟ "
مازن لسة هيتكلم عزت شاورله بأنه يسكت لأنهم مش متأكدين من حاجة
-عزت : " اقعد يا احمد و اهدي خلينا ... "
=احمد : " اهدا ايه يعني و خلينا ايه .. فين بنتي يا عزت و ايه اللي حصل بظبط !! "
-مازن : " ليليان هربت لعشيقها .. هربت يا عمي عرفت بنتك المحترمة فين "
=احمد : " احترم نفسك و اياك تنطق كلمة واحدة عليها بلسانك ده .. انا كنت فاكرك راجل هعتمد عليك و أأمنك علي بنتي .. انت خنت الامانة يا ابن اخويا يا .. "
-مازن : " تقدر تقوللي هتختفي فين من يوم صابحيتها و سابت موبايلها و محدش يعرف عنها اي حاجة .. المفروض اني سبتها في الاوضة و نزلت و طلعت ملقتش الهانم . نزلت سألت قالولي مشيت من الفندق و من ساعتها مرجعتش و حتي متصلتش لأنها اكيد مش عايزة حد يعرف هي فين و... "
=عزت : " مازن كفاية اسكت عيب اللي انت بتقوله ده ... دي بنت عمك قبل ما تكون مراتك ... مش يمكن تكون اتخطفت "
-مازن : " اتخطفت ازاي و هي اللي نازلة بنفسها من الفندق و الامن شافوها "
احمد مقدرش يسمع كلام اكتر و قام مشي عزت حاول يمسك فيه مقدرش و كان مكسوف منه و من اللي مازن قالو .. حتي لو معاه حق دي بنته بردوو و ليه الحق .. دخل لمازن مش عارف يصدق كلامه ولا ميظنش فيها و تطلع مظلومة في الاخر و فعلا تكون اتخطفت .. دماغه عمالة تودي و تجيب و مش عارف يقول ايه .. لا هو عارف يصدق مازن و يتجاوب معاه و لا هو عارف يكلم اخوه في الموضوع ده تاني
=عزت : " مازن ما دام انت مش متأكد هي فين او ايه اللي حصللها مكنش ينفع تقول كده لعمك .. دي بنت عمك و مراتك و انت كده بتخوض في شرفها و انت مش متأكد من حاجة "
أنت تقرأ
حب تملك (Something happened to my HEART)
Romanceالحب مهما كله اتكلم ووصفه محدش هيقدر يوصفه 100% .....الحب مرض ملوش علاج .... الحب زي ماهو ضعف فا هو قوة.. الحب جحيم يطاق <span class="emoji-outer emoji-sizer"><span class="emoji-inner" style="background: url(chrome-extension://immhpnclomdlo...
