روتين عادي مثل اي يوم عادي .. كعدت على صوت المنبه كرهت النغمه الي بسببها يبدي يومي
وطبعا متعود ما اكعد على المنبه وما اعرف ليش كل يوم اتأكد اني ضبطته على الموعد مع اني متأكد ايضا اني مراح افز واكوم من فراشي اذا سمعته
بقيت مغمض عيني منتضر شي متعود عليه يوميا .. واخيرا سمعت صوت باب غرفتي ينفتح دليل على انو من صدك لازم اكوم من فراشي لان ما ضل وكت
"يمه عيني بعدك نايم .. ما ضل وكت عيني يادوب تلحك تبدل وتتريك "
ابتسمت اول ما سمعت هالصوت .. صوت الانثى الوحيده الي تارسه گلبي
"اني كاعد يمه"
" اروح فدوه هالصوت"
كالت هالكلمه بعد ما انطتني جرعة طاقه مفرطه من تقربت مني وباستني من راسي
الابتسامه ما فارقت وجهي من انداريت عليها واني احاول افتح عيني
"اسم الله عليج يمه "
بعدها فتحت امي بردات غرفتي وبدت تلم بالغراض والملابس المشموره بكل انحاء الغرفه وهي تسولف ويايه بمواضيع تخص العائله والاقارب ..
دايما تحب تنطيني اهم مجريات الاحداث الي ادور بين الاقارب مع انو اخر همي اعرف اخبارهم .. اتجاوب وياها لان اني ابنها الوحيد وماكو احد تسولف وياه غيري
اخذت عدة دقائق بين ما غسلت ولبست ملابس الدوام ارسمي قميص ابيض وجنز اسود ... رتبت شعري ..حطيت عطري المفضل ونزلت متجه للجامعه .. نزلت شفت والدي كاعد يتريك بالمطبخ توجهت اله بسته من راسه
"صباح الخير يابه "
رد السلام وكمل قرايه الجريده الي بايده
"يمه اني رايح محتاجه اجيبلج شي ويايه من ارجع "
"لحظه هاي وين "
لحكتني وهيه شايله كيكه وكوب شاي
"يمه والله اخاف عليك لا توكع لو يصير بيك فقر دم .. عاد اكل بس هذني شيسموهه تطلع على لحم بطنك شوف وجهك شلون صاير"
اخذت الي بأيدها وكنت انضر لانعكاس وجهي على زجاج باب المطبخ واني اتظاهر بالحزن
"يعني صاير محلو "
گرصتني من خدودي وهيه تحرك ايدها يمين ويسار
"يمه فدوه طالع على امك تخبل "
ضحكنه .. بست ايدها وشغلت سيارتي واتجهت الى الجامعه
.........
دخلت للقسمه متوجه الى مجموعة شباب متجمعين واصوات ضحكهم ومزاحهم يجذب انتباهه كل الي يمر من امامهم واحد منهم صاح
"وصل عبود العلم "
گالها عماد صديقي خله كل الشباب المتجمعين يندارون
ضحكت على اسلوبه .. عماد كوميدي من الدرجه الاولى حته سلامه يلقي بطريقه كوميديه ماعنده شي جدي بالحياه .. سلمت و الكل ردلي السلام
مبين على تجمعهم انو الموضوع الي يحجون بي جدا حماسي
"اجيت بوكتك .. عبد الله تعال اشهد "
جرني عماد من ايدي وكعدني بنص المجموعه
"ياستار .. شنو الموضوع"
فجئه صوت عماد صار ناصي وملامحه مبتسمه ابتسامه خاليه من العفويه
"بالله مو ريم تستحق انو يلقبوهه ملكه جمال الكليه "
....
تنهدت بعد ما عرفت الموضوع الي متجمعين علموده ... جان عندي احساس انو الموضوع تافه بس مو لهدرجه
"يعني بشرفكم .. متجمعين من الصبح ومتحمسين ومكلفين نفسكم .. على مود منو احلى وحده .. صدك تحجون!"
فجئة بده الضرب يجيني من حيث لا اعلم دليل على تذمر اصدقائي من ردي البارد
"كتلكم لتاخذون رأيه هذه فاصل عن الدنيه "
ضحكت بعد ما سمعت رد احمد واحد من الشله التعبانه
"على كولة احمد عفتو الدنيه كلها واجيتو تاخذون رأيي .. واصلا ما اعرف منو ريم ...."
وفجئة الكل بصوت واحد
"اش اش ... اجتي .. سكتو"
مو بس اصدقائي وانما كل الموجودين جانت عيونهم على البنيه الي فاتت سواء بنات او شباب .. هذه الي يتغزل وهذيج الي تخزرها بنضره غضب وغيرهه .. عدت وكأنما ماكو احد موجود غيرها تمشي وما مهتمه لاي احد مو قصة ثقه او غرور بس مبين بالها مشغول وتفكيرها بغير عالم ما منتبهه على نضرات الطلاب الهه
.. بس ليش اني عندي غير وجهة نضر
تنهد الجميع من دخلت للقسم عبالك جانو كاطعين مو بس الكلام وانما حتى النفس من عدت .. اني ما انكر اني جنت شارد حالي حالهم ... لكن الي متأكد منه انو تفكيري غير عنهم همه يشوفوهه ما تنطي مجال ومتحط عينها بعين الولد... بس اني اشوفها .. اوف استغفر الله ما اريد احجي على بنات العالم
"عبد الله لتسوي روحك ثكيل .. انته هم حركتها حرك بعيونك من فاتت منا "
كالها حسين وهو يحط ايده على كتفي .. ما ضحكت على المزحه مالته لان اني صدك مجنت افكر نفس تفكيرهم
"ليش ..هيه هاي ريم "
"هاي مو ريم .. هذه محل مال كيك .. كيمر عراقي .. ريوك متكامل "
ضحك الكل بعد ما خلص عماد كلمته الا اني مشفت الموضوع يضحك
"صراحه .. ما اشوفها حلوه "
فجئه الكل سكت وحسيتهم راح يخنكوني .. مهتميت لدره فعلهم المبالغ بي وكملت
"اوكي رشيقه ..و اوكي شعرها حلو.. واوكي بشرتها بيضه وعيونها خضره مدري زركه مدري يالون بس شايفه روحها على العالم "
جاوبني عماد "وبالمواصفات الي انته اعترفت بيها هيه محلوه مو؟! .. اسكت .. شباب سكتو قبل لا ارتكب بي جريمه من الصباحيات "
بعدها فتحت موضوع جديد حاولت اغير الموضوع الي جانو يحجون بي لان مهما كان هاي زميله وطالبه ميصير شلة شباب هيج يحجون .. يمكن لهذه السبب همه يشوفوني كأيب وما اسولف ولا اضحك
أنت تقرأ
ممكن تحبيني من جديد؟!
Roman d'amourتدور احداث القصه ضمن اطار جامعي ... فهي تدخل في تفاصيل وقصص قد لا يعيشها اغلب الطلاب القصه قصيره باللهجه العراقيه ... احاول ما اضيف مصطلحات عراقيه صعبة الفهم داخل القصه عبد الله : طالب جامعة بغداد مرحله رابعه .. طويل صاحب عضلات جسم متناسقه.. بشرت...
