ممكن تحبيني من جديد؟!

الجزء الثامن

والاكيد ان الشخص المقابل كان ينضر الي بنفس نضرات الصدمه .. يعني بهاي اللحظه تحديدا مشاعرنه كانت متقاربه

بعد ما استوعبت الموضوع تبدلت صدمتي بابتسامه اخر منا توقعته انو تكون ريم هيه البنت الي امي كانت تسولف بيها

كنت اتمنه ان يكون شخص يمي ويضربني حته استوعب الي كدامي حقيقه مو خيال تمنيته يصير .

بس شاءة الاقدار واجتي ريم الى حد باب بيتنه
المفروض بهاللحظه اعوفهم واروح اصلي ركعتين شكر لله

دخلت ام ريم بالبدايه وبعدها همست للشخص الثاني والابتسامه مرسومه على وجهي
"تره نور البيت "

وطبعا على عكس فرحتي الي ما اكدر اوصفها ريم بقت مصدومه .. وتوقعت هوايه افكار اجتي براسها منها انو كل هذه مدبر من قبلي و ماكو شي اسمه صدفه بالموضوع

كنت اناني بلحظتها ما اهتميت ل انزعاج ريم كل الي همني هيه فرحتي بهالصدفه

سمعتني ام ريم الي كانت تضن اني اخاطبها وجاوبتني بسرعه
"البيت منور باصحابه .. شنو هالجمال حبيبي عيني بارده عليك .. ما ادري ابتهال عدهه هيج خلفه حلوه "

"عيونج الحلوه خاله"
وهم اكيد جاوبتها وعيني على ريم رفعت حاجبي تعبيرا عن الطراء والمدح الي تلقيته من والدتها
حسيت مدح والدة ريم الي هيه نقطه وانحسبت لصالحي

دخلو للبيت .. واستقبلتهم والدتي استقبال حار

بقينه كاعدين دقائق بالصالة احاول اطلع كل الايجابيات الي عندي لوالده ريم لدرجة اخذت رقمي اذا احتاجتني باي شي اكدر اجيهم للبيت حته اساعدهم

كنت طاير من الفرحه حته امي استغربت تصرفاتي الودوده كانت تتوقع غير شي تماما واكيد فرحت وتحمست للموضوع

اما ريم فاول ما دخلت للبيت وهيه ما رفعت عينها من الارض .. وحته اذا انسألت سؤال تجاوب اما اي او لا

واجه وقت الغده رحت ساعدت امي بتحضير السفره واكيد ويه كل مساعده مني استلم طن مدح من ام ريم فيما يخص اخلاقي وحب مساعدتي لوالدتي

ولمن كنت بالمطبخ اشيل الطبخات
سمعت صوت امي تصيحلي بصوت ناصي
"عبود.. عبود تعال"

"نعم يا احلى ام بالدنيه "
بوكتها مزاجي كان فول سعاده

"شجاك يمه .. احجيلي شكو .. شنو الموضوع"

بستها من ايدها
"بعدين احجيلج ... بس بهاي اللحظه اريد اكولج انو اني احبج "

صفنت بوجهي متعجبه
"اسم الله يا ستار .. يمكن اتخبل ابني "

تحضرت السفره وكعدنه ناكل واكيد فتحنه عدة مواضيع .. كلش حبيت والدة ريم انسانه مرحة وروحها شبابيه تحب المزاح وسهلة المعشر
"صدك عبد الله ما كلتلي انته باي جامعه"