ممكن تحبيني من جديد؟!

الجزء الثالث

ما انكر اني ابتسمت على تصرفاتهم المبالغ بيها .. كنت متوقع كل تصرفاتهم
"لحظه .. لحظه ... اسمعوني"

"اسكتو شباب .. اسمعو الدونجوان ... اي انطينه من خبرتك عمي "
كالها ليث احد اصدقائي وهو يحاول يهدي اصوات الشله العاليه

ترددت بتوضيح مجريات الحديث لان ادري راح يدفنوني بس هذه قراري حته لو ما يعجبهم
"احم  .. هيه اوكي صارحتني مثل ما كلتو .."

ومره ثانيه كامو يعيطون  وهذه الي يصفر وهذاك الي يصلي على النبي

عليت صوتي حته يسمعون ويبطلون هالخفيه
"بس طبعا ما قبلت "

ومره ثانيه توقعت ردة فعلهم بس هالمره متغيره ميه وثمانين درجه .. انخرسو فقدو كل حواسهم .. جدا بالغو بالموضوع ويه ردة فعلهم هاي

"يعني شلون .. ممكن توضح عزيزي"
كالها احمد وهوه مكتف ايده

"يعني الي انتو تشوفوها واو .. بس بالنسبه الي متجي ضمن مواصفات البنيه الي تعجبني"

اول ما سمع عماد رد عبد الله الي برأيه كان مستفز صفك بايده
"واو ؟!؟! ... نشوفها واو! .. صدك انته ابن عوائل .. ابني اني لو منك اقبل بس حته اكسر خشوم العالم شدتحجي انته تدري اذا تكبل وياها راح تصير اسطورة الكليه "

وفجئة تحول الموضوع اللطيف الى مشاحنات بالكلام بين وجهة نضر عبد الله من جهه واصدقائه من جهه ثانيه

"وعلى اي اساس استغل مشاعر البنيه في سبيل افيك على العالم .. شراح يفيدوني العالم اذا باجر عكبه كسرت بخاطرها .. مبين عليها بنت عوائل واهلها تعبانين عليها خطيه هيج تحجون عليها"

"يمه الحساس يمه .. واذا انته خايف على مشاعرهه جان صنتها وحطيتها تحت جناحك ايها الاب الحنون "

ما كنت اشوف الموضوع يضحك او على الاقل اني الشخص الوحيد الي بالشله جان هذه رأيه لان اول ما خلص عماد النكته مالته انفجر الكل بالضحك .. والى هاي اللحظه همه ماخذين الموضوع للضحك

اني الوحيد الي الى هاي اللحظه متوتر وماخذ الموضوع بصوره جديه

مكدرت اتحمل شقاهم ومزاحهم على الحادث وخصوصا بعد ما بلغو كل الي مجان عدهم خبر والي مجانو متواجدين ساعة حدوث الموضوع احتاجيت ان ابتعد عنهم قدر الامكان حته استوعب الشي الي صار قبل كم دقيقه

"اهوو..  سالفتكم تعبانه ... اني راح ارجع للبيت " 

ابتعدت عدة خطوات .. وراها التفتت بعد ما سمعت عماد يصيحني

"عبود .... . راح تتندم  .. لان انته هم تحبها بس متدري بهالشي"

وختم ملاحظته بضحكة واحد واثق من كل كلمه يكولها

ما استغربت ثقه عماد لانه اساسا شاب كد كلمته واثق من كل قراراته واثق من نفسه وهاي الميزه تضيفله شخصيه قويه ..ولهذه السبب هوه محبوب من قبل البنات

تجاهلت كل الي كالوه تجاهلت كلشي وبعقلي مطبوع حادث واحد الي هيه اللحظه الي وكفت بيها ريم كبالي .. الى حد الان ما مستوعب الموضوع .. شككت بنفسي ان الي صار من نسيج خيالي وهذه الموضوع مصار بالحقيقه ..
بس مسجات اصدقائي وهمه يمدحوني لان برأيهم سويت المستحيل قطعت الشك باليقين

حاولت اتناسه الموضوع .. بس الظاهر ما نجح الموضوع ويايه .. وتأكدت من هالشي لمن كل شويه امي تسألني "شبيك سارح بغير عالم"

.....
مرة الايام وشويه شويه الشباب بدو ينسون الموضوع .. اما ريم فحتى الصدف الي جانت تجمعنه قلت وصرت من النارد اني المحها وحتى اذا لمحته فمن بعيد ... شكيت بهذيج اللحظه انو حتى الصدف الي جنت اشوفها بيها مدبر الها مسبقا والا ليش كامت ما تطلع بوجهي فجئه مثل قبل 

ما انكر اني افتقدت هذيج اللحظات لمن تبتسم بوجهي كل ما صارت عيني بعينها جانت تحرك اجواء الروتين الجامعي .. لوما اتخذت قرارها جان هسه احنه والى هاي اللحظه مرتبطين بنضرات عيون ..

ليش جنت اناني وبخيل اتجنب في اغلب الاوقات اني ابادلها النضرات .. يمكن لاني من الاشخاص الي يكرهون المدح الزايد للشي .. وهيه جانت محور حديث الجميع هذه الشي الوحيد الي جان يزعجني منها

وهم عدت الايام  وبصراحه كرهت تجاهلها الي ... اكيد تندمت لان صارحتني حسيت نفسي شبح صارت تعاملني حالي حال اي طالب بالجامعه ما انكر اني قبل حبيت فكرة تعاملني غير عن الكل

صار عندي فضول تجاهه منو هاي البنيه الي دائما محط انضار الكل .. بيا مرحله ويا قسم ومنو صديقاتها .. جمعت عنها معلومات حته اني ما اعرف ليش اجمعها

ومجنت منتبه على نفسي الا واني اخلق صدف تجمعنه ويوم وره يوم اطورت وكمت انتظر وقت محاضراتها حتى اسوي نفسي معدي بالصدفه من باب قاعتهم لحد ما حفظت جدولها  اكثر منها جمعت معلومات 

وبهاي الطريقه تعرفت عليها اكثر
غيرت هوايه من وجهات نضري حولها وهم معلومه اجتهادها الزايد بالدراسه وانو هيه الاولى على القسم وتجاهلها للناس سببه انشغالها بالمحاضرات مو لشي ثاني ... صرت اضوج من اتعب على اناقتي الصبح واجي الكاها غائبه

بس رغم هذه كله .. اخر مره صار وجهي بوجها لمن اعترفتلي بمشاعرها .. باقي الايام عدة صحراء ماكو اي امل انو تنتبهلي مره ثانيه