الجزء 3 :
اوى بديت الشغال و اكيد منساش الموسيقى طلقت ليكم اغنية ديال روبي ليه بيداري كده كيحمقوني الاغاني القدام اوى مرجت الارض كلها بالتيد و الما و طلعت البيجامة فخداني باينين و جالسة نشطح و نتلولا دخل خويا حمزة و انا نهز عليه كراطة انا : حدك تما والله و تزيد خطوة وحدة حتى نسيفط خويا للخدمة مسيكاطريسي جبد ولد الحرام الكراطة و مع انا كنت شادها مزيان تجريت حتى انا معاها الكراطة جات فيديه و انا جيت على وجهي و اراك لدمايات لي كينزلو من فومي و نيفي بقيت ناعسة فالارض كنغوت و نبكي حتى جا بابا هزني و كيشوف فيا تخلط ليا الدم مع الدموع مع الخنونة و كلشي كيموت عليا بالضحك حتى من نورهان لي من صباح و هي دمع شافت حالتي شدات كرشها و بدات تبكي بالضحك نورهان : ههههههههههههههههههه واناري وليتي كتخلعي ههههههههههههه ماما بقات كتغمزها و انا كيف الطمة مفاهمة والو نضت كنعرج مشيت لمراية كنشوف شفت راسي و انا نطيح ليهم على طولتي بقاو يفيقو فيا مخلاو مدارو ليا الريحة البصلة و الساروت مبغيتش نفيق ليهم حتى جاب المسخوط ديال حمزة بودارع ( سراق زيت ) حمزة : مغديش تفيقي ياك اوى نتي لي قلبتي عليها شنو باغي يدير هاذ ولد الحرام ناري ولد ...... حطو ليا على وجهي حليت عنيا بشوية و انا يبان ليا نضت كنقز بوحدي و كنغوت كيف الحمقة و بابا كيخاصم عليه و ماما و نورهان حابسين الضحكة ليسونتيمو ديالي كلهم خسروهم ليا بعض المرات كنخس راسي مشي بنتهم و انما مربيني تفوووو و زاد كملتها عليا شنيولة ديال هدى لي جابت ليا سناني لي طاحو ليا اويلي سناني طاحو اهئ اهئ نورهان كتضحك : ياك بغيتي الفلجة و ها هي جاتك احسن فلجة جيتي وقرطاسة دار حمزة يدو على كتافي و كيشوف فيا : ختي الحبيبة شنو غنقولك بقيتي فيا و كنت عوال نخطب ليك حميد مول المحلبة و لكن دابا اذا مشى حتى شافك فهاذ الحالة غيطج بحالو مسكينة بقيتي بايرة هنا طرت عليه بعضة بردت جنوني فيه حتى حسيت بسناني لوخرين غيطيحو حتى هما بديت بكي ليهم تما و درت جنازة بابا كيسكت فيا و ماما الحبيبة بالها غير مع تسياق شكون غيكملو اااااااااااااا واش هذي عائلتي ولا كذبت ماما : و صافي دابا يكبرو ليك وحداخرين نوضي دابا كملي تسياق انا : شنو يكبرو ليا اهئ اهئ ماما كتضحكي عليا بنت ليك كنبدل سنان الحليب اهئ اهئ بابا بابا بديت نبكي بالجهد حتى جا المصيبة ديال حمزة هزني على كتافو و بدا يدور بيا كيف دريات الصغار و الارض كلها كتزلق ولي خفت منو هو لي وقع جيت انا و ياه طايحين الارض هو جا على جبهتو خرجات ليه و انا جيت جالسة على قاعي مبقيتش قادة نوقف هاذ المرة ماما شافت حمزة طاح مشات كتجري عندو و جابت ليه الثلج و انا لي قاعي تهرس والله مداتها فيا مفهمتش ذاك حمزة شنو داير ليها اويلي عارفتو كنشوف راسي دابا فالمراية كنتخلع دخلت لبيتي شديت عليا و بديت نبكي على سناني جا خويا الصغير كاع ريان عندو خمس سنين هز ليا سنان لي فيديا مشى لجيهة السرجم لاحهم ريان : السمسة ( الشميشة ) هاكي تنان ( سنان ) حمار و عتي ( عطي ) لختي تنان ( سنان ) بغل هزيتو من القب ديالو : انا لي بغلة باقة صابرة عليكم خرج لمك ولا نلوح مك من هاذ السرجم لحتو برى البيت و شديت الباب بالساروت دازت ساعتين مجى حد يسول فيا حليت الباب و مشيت بذيك الحالة لي كنت فيها الكوزينة لقيت نورهان تما لابسة قفطان فالبيض و مصوبة حالتها دخلت بلا متحس بيا غير دارت شافتني و هي تغوت و طيحات غطار الحلوة لي هازاه انا : مالك شفتي جن ولا شنو ( كنهدر و كنبزق مبقاو عندي سنان ) نورهان : الله يخد فيك الحق طيرتيها مني دخلت ماما كتجري تشوف شنو واقع ماما : اش واقع علاش غوتي نورهان : والو غير هاذ الويلة خلعاتني ماما شافتني بدات تكحل بالعمى : ويلي ويلي ناس جاو و هي شنو لابسة ليا سيري لمك بدلي عليك و لبسي شي حاجة مقادة و مشطي عليا ذيك الشعكوكة و وياك تهدري ولا ضحكي خلي شوهتك مستورة انا : و ماما و هذ شعر بوكلي بوكلي راه كيصوبوه بزبابل ديال الفلوس فالصالون ماما : سيري درقي وجهك من حدايا و غير يمشيو الظياف سيري معا باك صوبي ذوك السنان راه خدا ليك موعد مع الطبيب مشيت لبيت باش نبدل وحلت ملقيت منلبس جبدت واحد كسوة فالزرق قصيرة فوق الركابي و غير سميطات من الفوق مشطت شعري و شديتو سفنجة لبست بالغين فالبيض و درت شوية ديال كلوز عطيت ذوك الضربات لي فوجهي فاش طحت و خرجت لعندهم ...
