الجزء 11
مشيت نعس بحيث عيت من الزبايل لي درت هاذ النهار كنت ناعسة معليا ما بيا و انا نسمع الدقان فالباب شعلت ضو مبقاش دقان و انا نضيف و رجعت نعس حطيت راسي على الخدية و هو يرجع الدقان طلعات معايا السخوية ناري يكما يكون شي جن هذا لا لا غير كنت كنضحك مبغيت لا جادين ( تحية للكاتبة لي كتكتب القصة ديال حبيبي جني تأثرت بذيك القصة ) لا غيرو تخبعت تحت الغطا و انا نسمع الاصوات الغريبة التقرقيب و الزعاريد و الضحك حسيت بقلبي غيوقف هزيت تليفون ديالي شعلت lamp و ضفيت الضو قربت الباب و انا نسمع صوت القرد ديال خويا حمزة هو و نورهان هاها بغاو يخلعوني غير صبرو اذا مخرجتهاش منكم هاذ الليلة منتسماش هبة خديت خيط فالبيض ربطتو معا الباب و خرجت من السرجم و شديتو خرجت الجردة و دخلت لدار من باب الكوزينة هزيت معايا موس درت فية كيتشوب و شنتفت شعري درت عليا لزار فالبيض هما دخلو البيتي منين تحلات الباب بوحدها مبقاو فاهمين والو لقاو فالحيط كتابة مفهمواش باينة كانها مكتوبة بالدم ( درت ليهم صباغة حمرة ) و فوق الناموسية كاين الدم ( صباغة حمرة ) شوية تضفى عليهم الضو ديال البيت و تشدات الباب بالجهد معرفو باش تبلاو و انا نخرج ليهم بقاو غير كيغوتو و ينقزو بديت نقرب ليهم و ظلام فالبيت و كنهدر بصوت غليط : نتما قلبتو عليا و انا بسبابكم فقت من نعاسي شنو بغيتو عندي دويو اااااا حمزة كيهدر و هو كيتفتف : حنا حن ا بغينا غير غير نضحكو مبغيناش نأذيوك نورهان كتقرى القران و اية الكرسي ناري مسكينة بالخوف كانت غديرها فرسوالها انا : يالله هز ذاك المكياج لي تما و ديرو فوجهك دابا حمزة : ااا شنو ندير المكياج لا انا بالغوات : شنو مسمعتش مسكين هز المكياج بدا يخربق فوجهو انا : و نتي خودي ذيك الصباغة لي تما و ديرها على شعرك مسكينة هزاتها خواتها كاملة على شعرها بقوة الخوف هزيت تليفوني و صورتهم و بديت نكركر بالضحك و هما محشين فبعضياتهم حتى تشعل الضو ناري سمعت صوت ماما و انا نكحل بالعمى ماما : شنو كديرو هنا علاش باقين فايقين هذي الثلاثة ديال الصباح حمزة كيشير لماما بيدو عليا و هو معنق نورهان : شوفي تما جنية ماما دوراتني لعندها : والله مكذبتي جنية حيدات ليا ليزار لي مغطية بيه و عاد رجعات فيهم الروح شبعو معيور فيا ههههه طيرتها منهم ناري دازت ليا ماما منين شافتهم بذيك الحالة ماما شادني من وذني : واش نتي مكتهديش نهار ليل مصائبك مكيتسلاوش انا : اي اي ودني هما لي بداو خنزرت فيهم ماما : سيرو غسلو عليا ذيك الحالة و نتي لمك نلقى ذيك الصباغة فالحيط نزوق ليك وجهك بيها انا : واخة غنحيدها مشيت جبت الما ديال الصباغة مسحت ذيك الكتابة مساليت حتى داز ساعة حاب الله مشافتش الناموسية كو قالت ليا متنعسي حتى تصبني ذوك ليزور ....
