نور..
رجعنا للبيت بعد ماكملنا التجهيزات اجتي جيرانه عدلت حواجبي ورتبت وجهي وراها سبحت وبدلت ومكيجت مكياج خفيف بس كلش لايك عليه وشعري شسورته مثل ماطلب غسان ولبست الثوب الوردي
طلعت لعابه اول مره اشوف نفسي بهالجمال .كلمن يشوفني يكولي شنو هالجمال وين ضامته
جنت فرحانه بأهتمام غسان حيل توقعت بدا يحبني صدك وامي اشوف الفرحه بعيونها من شافتني الدنيا مجانت سايعتني حبيت اهتمامه حيل
كلت خلص الدنيا بدت تضحكلي وراح يحبني واعيش وياه الحب الحقيقي الي جنت دائما احلم بيه بس ماعرفه عرفته من شفت غسان
اهل غسان تخبلو عليه وعجبهم شكلي
بيومها مجنت اشوف غير نفسي وغسان
غسان جان متعمد يجيب كلشي من ارقى شي والي اجه للحفله جان منبهر حتى عمتي غارت من بيت ابوغسان وظلت تحجي ليش مخليتونا نسوي ونسوي تحجي ع ابويه كال الهاابويه ماقصرتي وان شاءالله ع الحنه والزواج سويلهم احسن واحلا حفله
دخلوني للاستقبال واجه غسان واجه السيد واهلي وعقدولنا واني طايره من الفرح اباوع ع غسان مبتسم بس ميحجي ويايه ولاگالي مبروك
مخليت ب بالي
فرحت بالحفله حيل ولبسني الذهب والموجودين فتحو عينهم ع الذهب الي جابو الي حتى حزام ذهب وجفوف وخلاخل ذهب جابولي غركوني بالذهب
وكلت هاي هيه يمكن الله راح يسعدني وياهم ..
خلصت الحفله وكالو نبقي العرسان يكعدون وحدهم وكعدنا بالاستقبال وجابو كدامنا كيك وعصير ..
اني ميته بدمي من الخجل بقيت كاعده ساكته وعيني بالكاع منتظرته يحجي كلمه ويايه ولانفس ولاحجايه ربع ساعه عدت احنا ساكتين
بديت اضوج باوعت اله انطيته العصير والكيك اكل وكالي شكرا ..
شكرا بس 😒
ورجعنا على نفس السكته اني اختنكت وضجت شو هذا مطايق يحجي ويايه شنو مجبور عليه بديت انقهر واضوج واحلامي بدت تبدد..
استأذنت منه وطلعت غسلت مكياجي وبدلت وظليت ابجي اجتلي يسرى كالت الي شبيج سولفت الها محجى ويايه ولاباركلي
كالت الي يمكن مستحي كتلها شنو مستحي ماريده خلص هذا مجبور عليه كالت الي شنو مجبور منو جبره شو هوا وحده اجه وخطبخ منوضاربه ع ايده
كتلها ماريده ولج ميحبني ولاطايقني تكلي شون ميحبج وهو جايب الج كل هالغراض ومختار وياج كل اغراض الحفله واختار وياج الفستان والتسريحه واحسن ذهب جابلج وشايلج بالصلوات شتردين بعد..لج ماريده خلص داشوف حياتي سوده وياه اني بشنو ورطت روحي ..
يسرى بدت تقرا براسي شنكول ونحجي هوا لعب جهال تركي عنج هالسوالف واقري قران وصلي والله يبعد عنكم الشيطان ..
كمت توضيت وصليت ولزمت القران وكمت ابجي اجمل يوم المفروض يكون صار اتعس يوم بعد الله يعلم شنو مضموملي ..
نمت ودمعتي بعيني كعدت ودنبدي نحضر بالريوك والهوسه اجت ام غسان سلمت عليه وتكلي هلا بجنتي ام بيتي وفرحانه بيه حيل ..
كالت الي يمه اليوم نروح نعقد محكمه لان نريد نتمم الزواج نهايه هالشهر
كتلها خاله اجلوها خاف غسان ميريد هسه نعقد كالت الي لا احنه متفقين وياه وهو كال كل الي تردونه سووه
كتلها خل نأجلها جان تكلي يمه مانكدر نروح ونجي نريد نفضها كتلها خاله خلص الج الي تردينه ..
يتبع ....
