نور ..
رحت حللت وطلعت صدوك حامل فرحت حيل والدنيا ماوسعتني من الفرح وظل ابو محمد ممصدك طاير من الفرح زاد دلالي اكثر واكثر اني حلويت حيل وسمنت على جو كركوك وجنت اخابر داليا ع بيت الجيران من تروح تخابرني كالت الي بابا خطب وحده مدرسه كيمياء وبنت عائله راقي رحنا شفناها كلش حلوه وصغيره بالعمر وعقدو عقد سيد واتفقو على كلشي وعلى اساس نعيش وياهم بس بعدين كامت كالت لبابا اني ماريد جهالك ويايه ماتحمل مسؤوليتهم بابا جانت عاجبته حيل بقو خطوبه ٤ اشهر بس من سمع بيها متريدنا كال اني جهالي يسوون راس الف مره لاهيه ولاغيرها تتحكم بيه وبجهالي عاجبها تبقى هلا بيها معاجبها الله وياها ..
فالبنيه مقابله وبابا راح طلكها وهسه ديدورله ع وحده كال مو مهم الشكل المهم اخلاقها وتكون بنت اصول ونظيفه ومرتبه ومعلمه يريدها لان يزن موزين بالمدرسه ويريد معلمه تدرسه وتهتم بينا ..
فعمتي لكت اله وحده اصغر منج بسنتين مامزوجه بعدها مواليد ٦٩بس موحلوه هلكد بس بنت عائله ومعلمه ومرتبه حيل ونظيفه وبابا يموت ع النظافه والترتيب وهسه عقدو عقد سيد وبابا ديجهز البيت علمود يزوجون بعد كم شهر ..
اني صح انقهر ع حياتي السابقه واكول ليش مو اني الي يسويلي البيت ويلم جهالنا ونكعد عائله ونتفاهم بس هذي حكمه الله وقسمته واني ابو محمد هواي انطاني حنيه وعشت عيشه حلوه وياه غسان تزوج وانتقل هو والبنات لبيت جديد واني جبت ولد كلش حلو يخبل اشكراني وابيض ومدنفش سميته حسين شكد جنت اتمنى بنيه تعوضني شويه عن بناتي بس الله رادلي ولد .. رحت زرت بناتي جانت مره غسان جايبه ولد بعدها مطالعه الاربعين واستقبلتني وجان غسان بغداد يجيهم كل خميس وجمعه علمود شغله طبعا هي شافتني عرفت بيها تغار مني مبينه من نظراتها اني فرق بيني وبينا سنه واني بناتي بطولي واحلا منها الف مره شكال لنفسه غسان من ازوجها واني الي جان مقانع بيه ويكولي ماعدج انوثه والله وكت .. بس هي الشهاده لله نظيفه وعاقله ورزنه خلصت يومين يم بناتي وعشنا وكل واحد بحاله وبعدين توفه ابويه الله يرحمه وبيت ابو غسان اجو وعزونا وهناك تعرف غسان ع ابو محمد وصار بينهم حجي واحترام ومن خلال حجي البنات عرفت انو بيت ابو غسان وغسان يمدحون ب ابو محمد يكولون خوش رجال واني جنت رايده داليا لابن ابو محمد بس حجيت وي ام غسان كالت لامايقبل ابوها وهي تريد تكمل جنت رايده بناتي يمي بكل طريقه بس مصارت وصرت حامل مره ثانيه وببنيه بس للاسف صار عدي تسمم حمل بالثامن وماتت الطفله ب بطني ..
غسان سمعت بيه طلك مرته صارت مشكله بينهم وطلكها واخذت ابنها وراحت بقى هو وي الجهال نقلهم لبغداد والبنات كبرو داليا راحت كليه وراها تزوجت وهو ماجاب الهم مرت اب ابد تكفل بتربيتهم وتعليمهم جانت داليا تساعده شويه بس وراها تزوجت وسافرت ولحد هاللحظه تكول داليا بابا يكول الي يفتهم يحافظ على زواجه الاول وزوجته الاولى اولى بيه من كلشي
البنات تزوجن وهو قايم بدور الاب والام الهم طلع غسان برغم كل الي سواه صح عنيد وكلامه لازم يتنفذ ومتكبر بس يحب جهاله برغم هو ميبين الهم بس جان مداريهم ومهتم بكل تفاصيلهم وميطلعهم الصبح وهنا بالكليات بلا مايتريكن ويطمن عليهم ويزن لحد هسه علاقته متوتره بابوه ونفسيته مو تمام لان ماخذ طبع ابوه بس مهمل مانجح بالمدرسه وماعده وظيفه بس ماله علاقه باحد وحيل صاحب غيره وعصبي بلكي الله يوفقه
طبعا اني وبناتي صرنا صديقات وهنه يضحكن عليه لان ماعرف بسوالف النت وهالحجي واني اموت عليهم وع جهالهم اي صرت بيبي..
ابو محمد صار السقوط تخربت اوضاعنا شويه كام انطى حصص كل ولده وبناته وهو عايش واشترالي بيت صغير سماه باسمي اني وابني
كال هذا ضمان الكم ولحياتكم بعدي طبعا الرجال كبر بمرور السنين ويتغير وخطيه كام ميشوف هلكد وطلع تقاعد واني داريته وعشت وياه ع الحلوه والمره وحيل حبيته وحسيته ابويا مو زوجي
توفى ابو محمد واني تخبلت بيومها وكعت من طولي وصارت عندي ذبحه صدريه وبالانعاش ماحاسه بالدنيا
طلعت وحسيت نفسي بلاسند محد الي عشت وحدي اني وابني ع راتب التقاعد وحاولت اشتغل بس ماكدرت علمود صار عندي تلف بشريان القلب ماتحمل عود رنده تساعدني مرات تدزلي ..
ومشت حياتي راد غسان يرجعني بعقد سيد علمود نلتم وي البنات بس مانعيش ك ازواج البنات ماقبلو وكالو لا ماما ماترتاحين وي بابا لان بابا بعده صعب فالاحسن عيشي لوحدج قبل بشبابج ماتراهمتو هسه تتراهمون علاقتي بغسان هسه اصدقاء ومعارف عادي اروح واكعد هناك بالبيت يجن البنات يباتن يمنا ونلتم واطبخلهم مره كل سنه وحياتي ماشيه بعون الله ..
اما رنده ..
ماعرفنا اخبارها الابعد السقوط زوجها جان معذبها حيل وعمتها مدمرتها تغار منها عود هي اخت ابويه وجانت تعايرها بالعراق وهي عراقيه وصارت مشاكل بينهن وطلكها وهجولها زوجها لمده سنه بعدين رجعها بس رنده تعبت بحياتها وصحتها طلعت ع امي تعبانه لازم تغسل كله كل شهر وعايشه ع بخاخ الاوكسجين وهي بعدها بجمالها وحلاوتها تزداد جمال وعايشه بخير
بس صحتها بالنازل تنام بالليل وقناع الاوكسجين ع وجهها وحاليا رايحه لامريكا تسوي زرع للكله واعتقد للقلب بصراحه ممتأكده ..
الله يشفيها يارب ..
العبره من قصتنا ياحبايبي انو منركض ورا گلبنا بقرارات مصيريه وخصوصا الزواج هو تأسيس عائله وتكوين اطفال لازم يكونون سويين حتى يفيدونا ويفيدون المجتمع ..
بهالقصه اني ورنده وغسان تعذبنا واطفالنا الضحيه تدمرنا ..
وصحتنا وصحه اطفالنا تعبت بالنسبه للي زوجها هاملها كونيلج شخصيه قويه واعتمدي على نفسج ولاتعتمدين على رجال اذا عندج بنات زرعي براسهم حب العلم والدراسه والوظيفه والزواج بعدين والحب حبي الي يحبج واخذي الي يريدج ولاتركضين ورا البايعج تتندمين بعدين ...
...ام جوليا ..
اتمنى تكونوا استمتعتوا بالقصه وربي يسامحني اذا غثيت احد منكم ..
كنت حابه اكتب القصه بطريقتي الاولى بس بسبب الحاح البعض وعدم تقديره سرعت كل الاحداث وخلصتها ..
لان بصراحه مضامنه ظروفي ...
اسعدتوني وفرحتوني بوجودكم وتواصلكم ويايه ..
وراح اخذ فتره راحه ماكتب حاليا ..
علما استعيد شويه نشاطي واكتب من جديد قصه واقعيه
