...
رجعت وي عمي ابو غسان مذلوله ومكسوره ورجعت لخاطر بناتي لان تمرضو حيل وتعبو بدوني بقيت سنه على سنه يزيد اهمال غسان الي ويروح بالاشهر لبغداد ويجيله كم يوم يكظيهم بغرفه اخواته اني هم اهتميت باطفالي وحاولت اعوضهم بس مجانت عندي اي قدره حت مصرف الي ولاطفالي محد ينطيني عود ابوغسان يجيبلهم وام غسان من يعجبهم شي همه الناس هم تخربطت احوالهم وصارت النزله مال الاسعار ابو غسان خسر كل تجارته والناس رجعت البضايع كلها ويردون فلوسهم وباع الي عده ولم كل الي كدر عليه وانطاه للناس وبقت عليه ديون ..
فحالتنا الماديه اتغيرت رنده واهلي مااعرف عنهم شي ورا مارجعت رنده مقطوعه الاخبار وياها نهائي واهلي محافظتهم بعيده عن محافظتنا يجون كل كم سنه صارو بناتي رابع ابتدائي بديت اتعلم خياطه وكمت اني اخيط الهم مستلزماتهم الي اكدر عليه والمشاكل ماخلصت يدورون حجج عليه حت يهينوني ويضربوني البنات بعضهم متقلب ساعه تصف ويايه ساعه تهد عليه تضربني جنت اخاف والله واني ماعرف اتصرف اعترف بهالشي ..
جانو نسوان حمويني يحبوني حيل واحنه صديقات ومن نلتم نظل نسولف ونشكي همومنا للفجر وجان الكل يغار من صداقتنا وحبنا لبعض ..فيحاربونا محاربه حت ع الكعده لان هنه طلعت ببيوت وحدهم بس يجون بالسنه حسنه ونلتم ..
اني كئيبه علطول ودمعتي بعيني وماترك صلاتي وقراني ابد..وادعي الله يفرجها عليه وهم جان تصير مشكله جبيره بين غسان واخوه الصغير وغسان كالي حضري هدومج وهدوم الجهال راح نطلع وصدوك طلعنه رحنه بيت اخو علما رتب النه مكان ب بغداد ونقل البنات وزين بعده ممسجل كعدنا واستقرينا ب بغداد
طبعا غسان عده علاقات ب بنات بس المفروض اني مااحجي جان ينام بغرفه واني واطفالي بغرفه ويلزم التلفون الليل كله يخابر اني شكاكه حيل احبه هنوب صار كبالي وممنطيني وجهه جنت احبه لدرجه انو من اشتاقله اروح اشم بملابسه قبل مااغسلهم بس شكي وغيرتي دمرتني لان كامت تصير مشاكل بينا كلش هوايه وميحجي ابد ويايه وماعندي مصرف واكدر اشتري والبس كدامه وهالسوالف بقيت ع نفس ملابسي واتمكيج واتعطر ومدايرلي بال وقايمه بواجب البيت كله بس من توصل عدي من الغيره ماتحمل اظل احجي على مرتين ضربني غسان واغمى عليه وبناتي يظلون يبجون صار بيهن رعب طبعا بناتي حيل شاطرات ورافعات راسي بدرجاتهن ..
بس الجبيره جانت انطوائيه وحيل تتأثر بمشاكلنه وتحب بيبيتها وبيت جدها اكثر مني متعلقه بيهم مجانت تريد تطلع منهم لان غسان هم يفضل الثانيه عليها وهي تتجنبه داليا خليط شبه مني ومن رنده بس بطبعها انطوائيه وبس تدرس وساكته ..
احنه تعودنا عليها فمخليها براحتها ..بيبيتها جانت حيل مدللتها فجنت اني ماضغط عليها بس تنهار من المشاكل ..
مره من المرات الباب اندك وجان اشوف اخواني كدامي ياربي صارو شباب كبار وشحلاتهم وشنو اللبس والجمال والاناقه ظلو يحضنون بيه ويبوسون صار سنين مشايفتهم اويلي ياريحه امي لكيتها بيهم بناتي فرحوا حيل بخوالهم وخصوصا داليا لان عاقله ورزنه
اخواني شافو حالتنا جانت امورهم زينه كامو اخذوني والاطفال اشترولنا ملابس وغراض وحلويات ولعبوهم بمدينه الالعاب وفرحنا حيل ..
ظلو يترددون علينا اخواني وميقصرون من يجون غسان جان عادي وياهم بس مجان يرتاح لوجودهم وجان يلزم خفارات بالمستشفى بقت علاقتي وي غسان متوتره واني كمت احاول اتقرب منه البس اله اسويله جوا وهو مو يمي واني اتخبل اكثر بناتي كبرو ووعوا ع الدنيا ..
اخواني مقصرو بشي ويانا وخطبو وحضرنا خطبتهم ونسوانهن حلوات بس جانو يتأمرون ويشرطون نبهو الولد نهيبه لحد مابدو اخواني يخسرون وصارت عليهم ديون وظلو محتارين ..
اني شفتهم هيج مكدرت مااساعدهم اني ذهبي وذهب البنات كله يم غسان وكلشي مشفت منه الي انباك والي باعه لما احتاجينه اني مشاكلي وي غسان وصلت حدها وردت اطلك فكمت اخذت ذهبي بلا ميعرف غسان وضميته يمي اخواني راح ينسجنون بسبب الدين عليهم متحملت رحت بعت ذهبي وكتلهم روحو سدو دينكم همه انقهرو عليه بس كالو وعد نعوضج اني بقيت بنار غسان اذا عرف شيسوي ..
ويوم من الايام ويعرف واني حجيت اله الي صار كتله ذهبي وحقي شريد اسوي بيه اسوي ..
طبعا هو صاير يكرهني وهنوب هيج سويت تخبل غسان كلب الدنيا وغلط وسب عليه وعلى اخواني ..
وقررنا ننفصل وكالي خل اخوانج يفيدوج بهالاثناء اهل غسان يلحون عليه ارجعو لبيتنا علموديش علمود اني اداري واخدم العيال اني تخبلت وصارت مشاكل ورا مشاكل لدرجه وحده من اخوات غسان اجتي لبيتي كتلتني وحده ضربت الثانيه وراحت ظليت ادعي عليها ..
من الظلم الي صار بيه صرت عصبيه نار ومن اتعصب اوكع ويغمى عليه اتفقنا خلص ع طلاق واخواني رفعو قضيه طلاق
وجنه نحجي بموضوع البنات وتربيه اني كتلهم البنات يصير عمرهم ١٤سنه ازوجهم مابقيهم مادري بداليا سامعتني جانت داليا تروح لعمتها وهناك تضل تقرا براسها عليه وفرت عقلها ..
من صارت المشكله داليا كالت اني ماروح وياج من تطلكين اني اظل وي بابا بتي الثانيه متعلقه بابوها هم كالت اروح يزن كام يبجي ع خواته اني وكعت من طولي واغمى عليه بناتي عافني وراحن وي ابوهن وبقالي بس يزن بقيت بالمحاكم افتر ..
المحاميه كالت الجهال الج وكلشي بصفج بس لازم ينعرضون ع الباحثه الاجتماعيه ..
اخذنا مفرزه اني واخوي ورحنا ع بيت اخت رجلي استدعاء لان بناتي يمها اني حاضنه بناتي واتوسل وهنه معاندات ميردني ..
دخلوهم عالباحثه الاجتماعيه حجت وياهم طلعوهم للقاضي حجى وياهن القاضي داليا كالت اله اذا تنطيني لامي احرك نفسي ماريدها تعبت من مشاكلهم ..
داليا ..
احجيلكم عن نفسي..اني اسمي داليا جنت كلش حلوه وفجأه بعمر الاربع سنين تمرضت جنت متعلقه. ب بيبي وحرمني منها بابا من طلع وعافهم ..بابا صعب حيل جنت اخاف منه واحترمه هويحب النظافه والترتيب لدرجه ميخلينا حتى نلعب بالعابنا حاطهم بمعرض ونباوع الهم اني وعيت ع امي الكل يأذيها وماعدها شخصيه وعصبيه حيل وتحب بابا ب جنون مجنت احب تصرفاتها من صغري وكرهت هذا الحب الي يخليها هيج تذل نفسها احنه جنه محد يهتم بينا بس بيبي اني تحبني فتهتم بيه اكثر. اني تعقدت صرت انعزاليه لان مره امي تطلكت وشفنا ضيم وياها يم خوالي ورجعتنا بيد جدنا .. وراها رجعت للذل والاهانه ..
اني احب ماما بس مااحب تصرفاتها.. سمعتها باخر مشكله تكول ازوجها واني متعقده من الزواج
كلت مابقى يمها بعدابد ..
