اللقيطة

3

وصلنا الصاله ، انا قلبي دا عمل شح كدا كلبشتا في يد مزن و داخلين ورا عماد ، امة وخلق ماشاءالله وناس راقيين من دخلنا عماد يسلم بكل الاتجاهات ، يا مزن وينو زولك يخ متشوقه اشوفو ، هههه كلبه خلاص عملتيهو زولي يا اختي هو لا حاسي لا جايب خبري اساساً ، قاطعنا عماد ، ارح ديك طاولتنا ماشين قصاد الطاوله و فيها ستة كراسي تلاته فيهم اصحاب عماد ، وووواي يا ميس امسكيني ، يا بت مالك ؟ هداك ليهو هداك ليهو ، منو دا 😳، ميس ياخ الكلمتك عنو ، سمح وينو ؟ ماشين عليهم لابس بالرمادي ، اممم في اتنين لابسين رمادي ياتو فيهم ؟ الفي النص ، بس عليكي الله كان ما ساي يا مزن اسي دا حلاتو شنوووو ؟ هسسس اسكتي استكي

وصلنا و سلمنا عرفنا بيهم الفي النص زول مزن دا اسمو طه و امجد و بدر الدين ، التلاته احلا من بعض و امجد و بدر ديل لمن خجلوني والله ، ميس يا بت ، عايزة شنو ؟ امجد دا داير ياكلك ولا شنو ؟ امممم يعاين للسنة الجايه م عندي ليهو شي ، بررريه منك يا ميس ، سمح ركزي في طه حقك دا وانا خليني اتم لعبتي ، دقايق مافي جاتنا خاله كدا توب ودهب يسوي كدي👋 سلمت علينا انا قلتا اكيد مزن بتعرفا لمن اتفاجاتا مزن بتقوليها انتي منووو ؟ قالت ليها انا خالة العروس و في شغل كان بينيزوبين عماد بتم لي اجراتي في جوازات الاولاد طوالي في اي صعوبات بتواجهنا . مش انتي اخت عماد ؟ ف اللحظة دي عماد جا وسلم عليها سلام حارر ، سكتت وبتعاين لي ، قالت لينا والله شوفو انتو زي اولادي وانا بجيكم بالكلام دغري ، انا والله يا عماد دايرة البنيه الصفرا دي لي مقداد ولدي كلنا عملنا كدا 😳😳😳😳 انا قلتا اكيد مزن ، مزن ضربتني من تحت التربيزة 😂😂 بتهمس الله ايااامك وانا بقوليها ايامك انتي م انا 😂😂 طه نطا قاليها تقصدي منو يا خاله ؟ والله قصدي ام اسود دي ، فجاه كدا عماد قام ناطي و طه نارو بردت ، هههه دي اشارة حلوة لي مزن غايتو ، انا م خليت الموضوع ياخد زمن ، امجد وبدر مركزين ، شوفي يا خاله رغم ان دا اول لقاء لينا لكن حبيتك والله من جوة قلبي و عشان اكون معاكي صريحه انا بدرس طب وحملي تقيل و الفكرة دي مؤجله لقدام شديد ، طيب يا بتي ولدي زاتو فاينل طب عندو سمستر واحد واحد بس وبتخرج و بننتظرك و مبدئياً نعمل خطوبه والبرامج دي ، يا خالتو مش يمكن م اعجب ولدك اساساً الحاجات دي اختيارو و والله صعبه ، ما صعبه ولا حاجه انا رقمي مع عماد والجمعه الجايه معزومين عندنا غدا كلكم ، عماد قاليها ان شاءالله ، وقامت مشت وفجاه وجوهنا كلها عبسست ، انا نعستا شديد و ديل قامو يرقصو لمن بنعس م بتفاهم امجد بحاول يتونس معاي وانا م مركزة قال داير رقمي اديتو ولا جايبه خبر لتصرفي ، ديل جو انا نمت عديل و رجعنا البيت نمته نوووم ، الصباح زي سته كدا قمته خشيت الحمام اتوضيت و انا طالعه لقيت عماد داخل من الصلاه ، لابسه البجامة وم اتوقعت زول يجي لانو الحمام قريب للغرف ، دايرة اهرول امشي قالي صباح الخير ، قلت ليهو صباح النور ، وخشيت جري الاوضه وقلبي دا داير يقيف لبست التوب وصليت ، نزلت المطبخ اشرب مويه بكب فيها عماد جا قال لي كبي لي معاكي ، قلت ليهو حاضر ، ناولتو الكبايه وشايله كبايتي و طالعه قال لي : ما توافقي وقفتا اتلفت ليهو قلت ليهو بصوت وشوشه شان ناس البيت نايمين ، علي شنو اوافق ؟ قال لي علي المرة القالت دايراكي لي ولدا ، قلت ليهو ليه ؟ قرب مني وانا راجعه وهو بقرب ، قلت ليهو عماد ف شنو وقفتا قلتا اشوف نهايتو شنو ، وقف قدامي لدرجه انفاسو دي كلها في وشي بسالو عماد ف شنو في شنو في شنو من شدة ما اتاثرتا بي انفاسو لمن صوتي وطا بقوليهو عماد في شنوو لمن سكته ، وهو لا بتكلم لا داير يزح من قدامي ، اقسم بالله انا لمن اعصابي باظت وقلبي دا داير يمرق ، قرب شديد لدرجه لو اتككلم حيلمس وشي فجاه بعد قال لي ولا حاجه و طلع ، انا قلبي طلع معاهو اتصمغتا ربع ساعه في مكاني دايرة استوعب الشي الغريب دا ، طلعت الغرفه و انجدعتا ف السرير بس ببكي، ما فاهمه للحظة حسيتو اقرب زول لي بقيت بفكر لمن نمته .. صحيت بصوت تلفوني بضرب قمته مخلوعه لقيت ادم قلتا بس دا م بتصل الا في المصايب ، رديت وطوالي قلت ليهو ادم امي كويسه طوالي قال لي لا من غير تردد بس قمتا ناطه امي مالها قال لي نحن ف المستشفي من بليل ياتو مستشفي .... بس بي توب ام مزن و بالسفنجه و جريت جري مزن مخلوعه ي بت ف شنووو وانا جاريه وهي جاريه وراي لمن مسكتني جسمي كلو برجف ، ف شنو مالك ؟ قلت ليها م في زمن امي من امس ف المستشفي وعايزة امشي ليها وبقبت ببكي ف اللحظة دي عم سليمان وعماد جو داخلين من الجامع اتخلعو في منظرنا ، قالو مالكم قلت ليهم حاصل كذا كذا ، ركبنا سرعه و مشينا المستشفي ولافين وجارين في العنابر لمن لقيناهم ، اتخيلو بس براها مجدوعه لا هند ولا هنادي ادم زاتو اتصل بي وفات ، عماد لم ليهو ف دكتور دا تابع حالتا من جات و قاليهو والله الحجه دي عندها انيميا حادة ولازم دم وصدرها تعبان هي بتشتغل شنو ؟ جيت انا قلت ليهو بتعوس كسرة قالينا بس توقفا بعد دا واسي عايزين دم ، عماد سالو من الفصيله قاليهو فصيلتا +o قلت ليهو انا بديها قالي فصيلتك شنو قلت ليهو م عارفه عمل لي تحليل طلعت +b اتصلت بهنادي طبعا سمعوني فارغ حتي جو المستشفي عشان يتبرعو ، فصيلتهم طلعت O+ الا انا طبعا رفضو يتبرعو طوالي عماد اتصل بي اصحابو وم قصرو ومن ضمنهم بدر و حمدلله ادوها دم والمسا خرجونا ، و وصلونا م قصرو طوالي من خشيت البيت مسكت غرفه فيها سرير نضفتها و دخلت سرير تاني و شلت حاجاتي من غرفه هند و دخلتا امي جمبي ف السرير عشان ابقي قريبه و متابعاها ... فاتت الليله دي علي بي هم كبيررررر اهاااا ي ميس حتتصرفو من وين بعد عيا امي محتاجه علاجات ومحتاجه و محتاجه .... بتقلب كدا تلفوني ضرب مزن و عماد بطمنو علي امي .. ختيت التلفون كدا استلمت رساله واتساب ..