اللقيطة

11

طبعا نهائي ما رد علي كلامي و لا فتح خشمو معاي بكلمة ، لمن وصلنا البيت انا وصلت هلكانه ، كلهم قالو لينا عصافير الحب ايامكم ، ابتهال قالت : كان تعزمونا معاكم

انا ابتسمت ابتسامه صفرا كدا صراحه مرهقه

مريوم قالت لي اتصلت بيكي تلفونك مقفول ياخ رجعتيني البيت و امي قالت لي جابك شنو وانتي تقولي كانت عايزاني 😒

قلت ليها اولا تلفوني بكون طفا شحن و تانيا يا خالتو انتي نسيتي شكلك ، اخدت الزوغه قبل ما اتفضح ،، جريت طلعت غرفتي وصلت تلفوني ف الشاحن خشيت استحميت و صليت الصلوات الفاتتني ، اتزكرت سبا قلت لازم اسال منها واطمن علي اختها ،

مسكت التلفون لمن فتح ، استلمت رساله من رقم مكتوب فيها * حتندمي يا لقيطة *

اتخلعتا شديد لمن م قدرت امسك التلفون نزلتا النمبر بوم ، ودخلت الرقم لقيتو ظهر لي باسم ( عمدة ) قلتا ايووواه ، تمام بعد دايرة احظرو قلت خلي ، اتصلت علي ميس اداني مشغول ، رسلت ليها ف الواتس وطلعتا ..

رقدت شويه و مشيت غرفه مريم قلت اتونس معاهم مطوله منهم ، خبطت الباب قالت لي خشي ، خشيت قعدت جمبها في السرير لقيتا بتتكلم تلفون قلت ليها انا بطلع اخدي راحتك لمن تخلصي تعال غرفة ابتهال

مسكتني من يدي قالت لي لالا خليكي ..

قعدت جمبها وختيت راسي في رجولها وبعاين للسقف وبفكر فجااااااااة اسمع مريم بتقول ليهو ، كدا يا عمدة زعلت منك

انا من سمعت الاسم قمتا ناطه متر لا اراديا كدااا ، قلت لي مالك ، قلت ليها في نمله في ضهري قرصتني ياخ ، قالت ليهو اقفل حبيبي برجع ليك شويه كدااا ، قالت لي تعالي ، يا حليلها بقت تفتش لي في ضهري وتدعك لي ، انا دمعتي دي نزلت

يا ربي اسوي شنو ما دايراها تتاذي هي الدنيا ضيقه للدرجه دي ، اتصرف كيف لازم احميها ، طيب يمكن يكون بالجد حابيها و دايراا

بقيت استغفر و طلعت منها قلت ليها جيت اتونس معاكم مطوله منكم خلصي و نتجمع بعد المغرب في مكانا ( الحديقه ) قالت لي ظريف ، مشيت كلمت البنات و اتفقنا ، قالو دايرين كيكه ،، مشيت المطبخ و بالي ما معاي بس اللهم شغاله بسوي فيها ، بفكر اسوي شنو بخصوص مريم جاتني فكرة ، وبقيت سغاله سرعه سرعه ، دخل هاني المطبخ لقاني سايطه الدنيا ، قال لي يا سلام كيكه ، بحب كيكتك ( الزول دا حاجه من اتنين ، يا عفوي و طيوب وقلبو ابيص وما عندو شدايد ، يا اما بعاني من انفصام ، اعذروني ما قادرة افهمو والله ، و شاب في واجهتو دي م عارفه مفترض يكون شقي و لعاب ما ممكن يكون بالرزانه و الهداوة دي ) المهم قلت ليهو تسلم ، قال لي حتعمليها بشنو ؟ قلت ليهو كيف يعني ؟ قال لي نكهه ، قلت ليها لسه م عارفه قال لي انا بحب الكرز ممكن تعمليها بصوص الكرز ، قلت ليهو لا ما ممكن ( بي نهرة ) والله شميت نفسي ، تاني راجعتا نفسي قلتا مالي انا ضاديت ود الناس ، داير يطلع من المطبخ قلت ليهو جيب لي الكرز مافي في البيت قدامك ربع ساعه ، ياخ ابتسم ابتسامه كدا شلحت قلبي شلح ،،