اللقيطة

4

زعلانه شديد من موقف المقطع الاتنشر لي ، مزن حست بي وحاولت تتونس معاي وتغير لي مودي ، قلتا ليها مزن عايزة افتش شغل و شكلي حجمد السنة دي في الجامعه الحمل علي بقي تقيل 💔 قامت ناطه زي الطقتا عقرب قالت الجامعه دي فكرة انك تجمدي السنة شيليها من راسك في كل الاحوال انتي بتقري بمنحه ماعندك مصاريف ، مهما كان يا مزن البيت محتاج مصاريف 😒 يا ميس بالعقل كدا انتي اصغر وحدة تشيلي هم شحوط قدر ديل ؟ هما ما يشتغلو ليه و يصرفو علي امهم ؟ ما امهم براهم ي مزن امي انا كمان و ليها علي حق ، امك بي وين ؟ الدم وصل لي راسي كييييييف يعني امي بي وين انتي ليكي فترة بتلمحي لي ، في شنو انتي يا مزن ليه ما امي ؟ يا ميس في شنو براحه انا ماقصدت حاجه بس التعبير خاني انا اسفه حقك علي ، لا يا مزن انا البعتذر اصلا زهجانه و اتفشيت فيكي .. حضنتها وبقيت ببكي بس ما عارفه ببكي في شنو حاسه بروحي وحيدة لولاها انا كان استسلمتا ، في نفس اللحظة باب الغرفه فاتح عماد كان واقف ما حاسين عليهو لمن قال اححححم ، ختيت طرحتي في راسي قلنا ليهو اتفضل ، قال لي مالك بتبكي ؟ قلت ليه مافي حاجه ، فجاه هجتا فيهو من غير ذنب ، انتو بياتو حق يا عماد تنشرو لي مقطع في النت انت طلبت مني اغني عشان تعملو لي كدا !!! وقف علي حيلو في حالة ذهول ، ميس لحظة براحه بتتكلمي عن شنو انتي ؟ سكتا ..

مزن قالت ليهو هاك شوف .. قاليها منو النشرو ؟ والله ما عارفه بس منتشر لقيتو في كذا حته و كلهم عايزين يعرفو البتغني منو ،، سكت مدة وقال لي ميس تعالي عايزك ، قلت ليهو عايزة امشي البيت بعد كدا ،

قال لي ما حاخرك و حوصلك البيت ، قلت ليهو لا بمشي براي ، قالي م صح اقنعني ودعت مزن وامهاا ونزلتا منتظراهو تحت لحد ما جا ، فتح لي باب العربيه قدام اتحركنا و ساكتين بس دموعي بجرو ما عارفه من شنو بس الدنيا دي كلها مزعلاني ، عماد وقف العربيه و قبل علي عاين لي في عيوني شديد و ما حسيت الا بي يدو بتمسح دموعي ، شوفي بغض النظر يا ميس عن الاحساس الجواكي و مسبب ليكي الدموع دي انا حاسي بيكي ، وحاسي انا السبب بس بالجد انتي غريبه ، الناس بفتشو للشهرة وانتي زعلانه خصوصا ان الحاجه دي ممكن تصلح ليك وضعك ، ما انكر انا زعلت لمن شفت المقطع دا بس عقلتها ، قاطعتو ، انا صوتي دا لنفسي و انا بقرا طب كلها سنة واتخرج وعندي طموح اكبر من اني اغني بس مهما كان الزول النزلو دا ما ليهو حق من غير علمي ، قال لي معاككي حق وانا حعرف منو العمل كدا وحقك بجيكي ، قلت ليهو لا حاجه حصلت وانتهت و لي خير ي عماد ، بس بقي متنح فيني ما قلتا ليكم جواهو كتير ، يلا عماد نتحرك عشان احصل البيت بدري ،، وصلنا البيت عماد واقف لحد ما دخلتا البيت بي دقايق سمع صوت كوراك انا دخلتا البيت لقيت هند قاعده في وشي ومعاها واحد ومقربين من بعض و بتونسو ،انا الوضع ما عجبني و من موقف هنادي انا قالبه منهم و اتمادو شديد ، دخلت قلت ليهم سلام عليكم : الولد وقف علي حيلو بعاين لي بي تعجب وعليكم السلام هند لوت قدوما وقبلت مني ، قلت ليها دا منو ؟ قالت لي ما يخصك ، قلت ليها لا يخصني ، دا كمان بيتي والبتعملي فيهو دا غلط و بجيب لينا السمعه ، قامت لزتني لورا وانا كمان ما كذبتا لطشتها كف من قوتو لمن يدي وجعتني ، قلت ليها اسمعي كان انتي شحطة قدر دا وماعاقله انتي واختك انا بعقللكم و بالجد فتو حدكم و دي بقت قله ادب ، بس مسكتني تضربيني انا قلت ليها ولو ما فكيتني حتشوفي شي ما حيعجبك ( م كنت كدا بس بالجد كتروها )، وشكله قومة وقعده .. كل دا عماد واقف وسامع كوراك وجوطه و بقي علي اعصابو ، طردتا الولد وتربست الباب قلت ليها ابقي مرة كرريها و مشيت لامي ، بوستها في راسها وقلت ليها رضاك قالت لي يرضي عليك في شنو انتي وهندة صوتك عالي مالكم بتتشاكلو ،، قلت ليها متشاكلين في بلوزة و اتونست معاها لحد ما نامت ،،