زوجتــــــي والتابعـــــة

Untitled Part 7

☆زوجتي والتابعة☆
بقلمي السيدة العلوية
الجزء7
ان من اهم اسباب نجاح الحياة الزوجية هو التلاقي الروحي والمحافظة على ادق التفاصيل والاسرار..ان الزوجين مثل العصفورين كل منهما يعطي الاخر..فهو يعطيها الدف والامان والبيت وهي تعطيه السكينه والراحة الروحية فاذا اختل هذا الميزان وادخل غريب تهدمت العلاقة مهما كانت متينة ورصينة..
صباح اليوم التالي اتصلت ب شمش : شموسة حبابة اني محتارة ..عادل يريد يشتري ذهب باجر تعالو ويانه كمت اخاف..

شمس:من شنو تخافين(سويت نفسي نسيت )
زهراء: من عادل من يوم اللي كلتي ع الفنجان..وهو يعرف بنات..
شمس: امشي يمعوده ..هو فنجان ..اهاااا لعد عندي حل ..
زهراء:شنو عفية..
شمس: اي شغلة يكولها بلغيني حتى انصحج شلون تتصرفين وياه..وتكسبينه

نعود لزهراء والمجموعة
ام عادل: امشن نتوضأ..
شمس:خالة اني متوضية بالبيت ..وام حسين اجابت بنفس الشيء..
ام عادل:تعاي يمة لعد وياية زهراء ..اخاف اعثر بالدرج..
بدأت اتوضأ وانتبهت لزهراء بغير عالم
ام عادل: يمة بنيتي بيج شي؟؟ شو احسج مو على بعضج..
زهراء : لا خالة بالعكس بس صفنت شوية..
ام عادل:هنيالة الماخذ عقلج؟؟ يمة بنتي اريد اسألج عن شي واني خالتج وامج!!
زهراء: انتي روحي واكثر..
ام عادل: شعجب اليوم حاطة مكياج وانتي ابد ماتستعملينه والنوب يم الامام..
زهراء: مو.. مو.. شمس كالت هيج علمود اطلع حلوة كدام عادل !!
ام عادل : يمة ابني مايحب هالشي وحيل زعل ..لان مايرضى مرته احد يشوفها بالشارع متمكيجة ..
زهراء: بدأت دموعي تنزل..اول تالي ..
ام عادل: غسلي وجهج حبيبتي انتي اصلا كمر.وامشي خل نزور وابد لاتكولين لاحد عن كلامنا هذا..
بعد الزيارة وصلنا الى اماكن بيع الذهب..

عادل بداخله(الحمدلله اني متمكن خلي اخليها تشتري اللي يعجبها..خل افرحها هاي يتيمة)
دخلنا وتفاجأت بزهراء جدا كانت تسمع لشمس فقط..الذي تقوله شمس توافق عليه والعكس صحيح..
(اني هيج سالفة ماتصرفلي ..راح تمشي برأي غيرها وتلغي شخصيتها ووجودي ... قررت اتصرف)
عادل بحزم: خالة اختاري انتي ..انتي اعرف بذوق زهراء..
الام (حسيت بعادل):اي يمة ..هسة نختار..وفعلا اختاريت شي بسيط لان اعرف بنتي هيج ذوقها ..
زهراء: حسيت بعادل زعلان وضايج بس ماعرفت اتصرف..

♥عادل♥

جنت اعرف بنفسي من اصير عصبي شكلي يتغير وهاي خطية اليوم فرحتها لهذا قررت اغير شوية..

اخذت خالتي على انفراد..

عادل: خالة انتن تعبتن خطية..شتكولن لو اخذلجن سيارة وترجعن..

ام حسين (بمكر):اي.. وانته يالنسيب وين تروح..

عادل:من رخصتج خالة اخذ زهراء واني راجعها..