Trapped (Book 1)

Kabanata 21

Kabanata 21: Definition

Halos mahulog ko ang mga librong hawak ko dahil sa dami ng mga ito. Matapos ng klase ay napagpasyahan ko ng ibalik ito sa library since tapos na rin akong mag-notes.

Ngumiti ako sa lalaking nagbukas ng pinto dahil napansin nya na wala na akong bakanteng kamay na maaari magbukas do'n.

Pumunta ako sa table ng librarian. Sinamaan ako ng tingin nung librarian dahil sa pabigla kong pagbitaw sa mga libro.

"Name?" Tanong niya. Masyadong malaki ang nakakatakot na boses ng librarian namin. Parang laging galit. Sabagay ay lumaki syang binata.

Tumikhim ako. "Chelsea Vellarde po," sagot ko. Binuksan nya ang logbook at hinanap ang pangalan ko ro'n. Matapos nyang makita ito ay isa-isa naman nyang tinignan ang mga dala kong libro.

Nanunuod lang ako sa kanya nang hindi sinasadyang mapatingin ako sa babaeng nagtatago sa gilid ng bookshelves. May tinitignan ito sa likod no'n. Pinasadahan nya ng kamay ang kanyang itim na buhok.

"Miss Vellarde?" Napatingin ako sa librarian. Nakakunot ang noo nito habang nakatingin sa akin. "Ano 'to?" Tinuro nya ang isang libro.

Kumunot ang noo ko. "Bakit po?" Tanong ko dahil hindi ko maintindihan kung bakit nya 'yon ipinapakita sa akin.

Napatalon ako sa gulat nang bigla nyang ihampas ang kanyang kamay na puno ng kalyo sa table.

"Hindi mo ba nakikita o bulag ka?" Idinuro nya ang edge ng book. "Bakit may lukot?"

Gusto kong matawa kasi masyado lang maliit at halos hindi ko napansin ang lukot na tinutukoy nya. Hindi ako marumi o pabaya sa gamit kaya malamang na baka dati pa 'yon at hindi ko lang napansin nung hiniram ko.

"Sa susunod na may lukot pa ang librong hiniram mo, ipapabayad ko na sa'yo."

Nakita kong nilagyan nya ng kulay pulang mark ang pangalan ko. Tumango na lang ako. Napatingin ako sa babaeng nagtatago pa rin.

Lumapit ako sa kanya. Bigla syang umatras kaya nabunggo ako. Nahulog ang tatlong librong hawak nya sa sahig. Napahawak na lang ako sa likod ko dahil sa lakas ng pagbagsak ko sa sahig.

"Sorry..." Hingi nya ng paumanhin bago pinulot ang mga libro. Pinulot ko ang isang librong malapit sa akin at iniabot 'yon sa kanya.

Inilahad nya ang kamay nya sa aking harapan kaya tinanggap ko 'yon. Tinulungan nya akong makatayo. Ngayon ko lang napansin ang bilog at maamo nyang mukha. Makinis din ang kanyang kutis at medyo maputi sya sa akin ng konti at lamang naman ako sa kanya ng konting tangkad.

"You okay?" Tanong ko sa kanya.

Napatingin ako sa lalaking lumabas mula sa bookshelves. Yumuko ang babaeng nakabunggo ko at mabilis na tumakbo palabas ng library. Napatingin akong muli sa lalaking nakatingin sa librong hawak nya.

"B-Blaze..." Tawag ko sa kanya. Napalingon naman sya sa akin.

Ngumuso ako nang mapagtanto kung bakit nakasilip ang babaeng 'yon dito. Malamang na isa sya sa mga babaeng may crush kay Blaze!

"Chelsea? Kailan ka pa nahilig sa mga books?" Biro nya. Kunwari ay natawa na lang ako. "Halika. Maupo ka muna."

Pinanghila nya ako ng upuan bago sya umupo sa harapan ko. Ipinatong nya ang librong hawak nya sa table at pinagsalikop ang dalawang kamay sa ibabaw ng lamesa. Naka-school uniform sya na medyo fit sa kanya.

"Hindi mo ata kasama si Jean?"

"Hindi eh, nagpaalam lang ako sandali kasi nag-survey kami." Sagot ko. Malamang na nag-uumpisa na nyan ang mga 'yon sa survey.