الحب وحده لايكفي

١

شجونة ياحلاها ... كصايبها وراها
اجه الخاطوب يخطب ... وابوها مانطاها
شجن(متمدده على رجل امها بابتسامه تخفي الف دمعه): هاي صدك بابا جان هشكل يغنيلي؟!
ام شجن: ايييي ابوج جان ليل نهار مكعدج بحضنه ويغنيلج انتي اول فرحته ودللج هوايه
شجن: اوووف يابابا لو تشوف حالي هسه
الله يرحمك حبيبي(ودمعت عينها)
ماما تدرين افكر اكتب مذكراتي واخلي الكل يقراها اتمنى انصح كل بنيه اشوفها واحجيلها عن تجربتي
ام شجن: شكو بيها يا ماما ابوج ياما وياما نشر كتب وروايات وبلكي تفرغين ضيم كلبج من تكتبين
شجن: اووووف شيفرغة ياامي
ام شجن: عينج بعين الله بنيتي انتي قويه وانشالله ترجعين مثل قبل واكثر اكوم اروح لبيت خالج واخذ زنوبه ويايه هم تتونس وتلعب ويه الجهال وهم انتي ترتاحين فدساعتين وارجع
شجن: براحتج يوم سلميلي عليهم
راحت امي واخذت زنوبه ااااخ زنوبه كل غصه بكلبي عليج ولاغيرها سامحيني يابنتي ماتمنيتج تعيشين هيج حياة
طلعت المفكرة مالتي والقلم وبديت اكتب
قبل مااكتب احس بلاوعي دموعي تتجارى
خلص خلاعرفكم عن نفسي وعن حياتي
اني شجن عمري حاليا ٢٧ سنه منفصله عن زوجي وعندي بنوته اسمها زينب عمرها سنتين
من عائله مرتبه ومثقفه وملتزمه دينيا بشكل جدا حلو
والدي جان استاذ لغه عربيه وبنفس الوقت جان ينشر كتب وروايات بلمتنبي
امي جانت طالبه عد والدي وحبها وتزوجها وحاليا هيه مدرسة
اني الجبيره بين كل بنات كرايبنا
وعندي خوات ثنين بعد ماعندي اخوان
بابا ربانه تربيه حيل حلوة ربانا ع الهدوء والنزاكة والثقافه ماما جانت عصبيه بس مجانت تعيط او تضرب بس جانت تعاقبنا من نغلط لكن والدي جان كله اسلوب وحجي حلو ويانه يكول هذولة بنات مو ولد ولازم نعاملهم برقه ونزاكة
علمونا ماما وبابا الدين والالتزام والحشمة بطريقه جدا حلوه جانو يحببونا بلدين بشكل
اتذكر من صار عمري تسع سنين كعدت الصبح بيوم ميلادي لكيت بصف سريري ع الكومدي علبه مغلفه فزيت من نومي كبل فتحتها لكيت ببطنها تاج كله ورد وحجاب وردي يخبل
اخذته ورحت لبابا فرحانه بابا هاي شنو
بابا : اشو بله؟ اللللله هاي شنو هلجمال بابا انتي تعرفين اليوم شنو
شجن: اي بابا اليوم عيد ميلادي بس منو جابلي هلهديه
ابو شجن ضحك :شجونه تعالي نسولف
باباتي اليوم انتي صرتي مكلفه يعني صار الدين والحجاب والصلاة فرض عليج وهاي الهديه اجتج من سيدة نساء العالمين تريدج تصيرين اميرة وتحضرلج غرفه حلوه يمها بلجنه
شجن: وشلون حصير اميره بابا علمني عفيه اريد اروح لهاي الجنه الي دائما تسولفلي عليها
ابو شجن: اي بابا اسولفلج
باباتي شجونه رب العالمين فرض علينا اشياء اذا التزمنا بيها حتصير حياتنا كلها جنه
فرض علينا الصلاة وهيه ماتاخذ ٥ دقايق لو عشره فرضها علينا لمصلحتنا هاي الحركات كلها رياضه للجسم بلاضافه للسجود بمثابة تفريغ شحنات يعني مثل ماواحد تعبان ويفرغ تعبه بلكاع
وفرض علينا الصيام علمود نطرد السموم والاشياء الضاره طول فترة الصيام وهم راحه للمعده
وفرض عليكم انتو البنات الحجاب والحشمه ليش
لان انتو يابابا جواهر والجوهره المكشوفه تنخدش وتنكسر ولهذا لازم نغطيها ونحافظ عليها
حجي بابا ياخذني بغير عالم يحسسني اني اميره ع العرش يخلي ثقتي بنفسي عاليه ويقوي شخصيتي
جان من يشوفني اضحك بصوت عالي لو العب ويعلى صوتي يجي يمي يحضني ويهمس باذني بكل هدوء
شجونه الاميرات ميعلون صوتهم الاميرات يحجون بنزاكه حبيبتي
طبعا ماما هم اكيد الها دور كبير هواي جانت تنطينا من وقتها تصادقنا وتخلينا نحجيلها كلشي بدون خوف من جنا صغار ونغلط او نتوكح جانت مخليتلنا عقوبات مثلا اليوم ماكو تلفزيون او ماكو سفره او ماكو جنطه جديده بس من كبرنا صارت صديقه مقربه النا

يتبع ...