الحب وحده لايكفي

٦

استمرت خطوبتي ٤ اشهر بابا جهزني جهاز كامل وصه ماما تشتريلي هدوم بيت وطلعه ونوم واحذيه وجنط ومكياج وعطور وكولشي كلها خطيه هذا حالته على كده خلي علي بس الغرفه والفراش
كلت لكرار وجنت فرحانه توقعته حيفرج بس جوابه قهرني
- شنو قصده ابوج يعيرني يعني جايبلج من ارقى شي تره الفقر موعيب وشبي قابل لبسنا
- شدتحجي كرار شنو هلاسلوب بابا مو هذا قصده ابد بس لانو اني اول فرحته حب يجهزني وهم يخفف عنك الحمل تره بابا طيب كولش وبلعشره حتحبه حيل.
عزموني اهله مرتين خلال خطوبتنا شفت بيتهم بسيط وهمه بسيطين حسيتهم فرحانين بيه
كرار عنده خوات تلاثه وحده متزوجه وثنين طالبات وعنده اخ واحد متزوج وعازل باطراف بغداد لان شغله هناك
امه ربة بيت متعلمه ع كد تقره وتكتب
وابوه عنده محل بلشورجه
حالتهم الماديه مو هلكد بس عادي واردهم يكفي البيت
قبل زواجنا كرار قرر يشتغل العصر بمحل موبايلات ويه صديقه حتى يكفي عيشتنا وميقصر بشي
اكو موضوع جان دائما يطرحه عليه كرار ويقارن بين اهلي واهله بي
انو خواته يلبسون جبب واخته المتزوجه ومرت اخوه تلبس عبايه وهمه ملتزمين بلدين اكثر من اهلي وانو ليش ماتلبسين عبايه لبسج ميعجبني
جنت اكوله كرار صدكني الدين مو بس لبس عبايه او جبه اني لبسي مابي شي مرتب وبنفس الوقت فضفاض ومستور واصلا اني ضعيفه
الدين اشياء هوايه بي اهم من العبايه
صلاتي الحمدلله بوقتها واكعد لصلاة الليل والفجر
اتصدق اصوم مااذي احد مااغتاب معليه باحد احافظ ع الامانه اخلاقي تعاملي ويه الناس هذا هو الدين
جان دائما رده
لعد احنا قابل موهيج احنا هم نصلي وكلشي نسوي بس العبايه واجبه شجن
لا مو واجبه كرار واني استشرعت تريد البس مانتوات او جبب اوك اقبل لخاطرك
قرب موعد العرس ورجع خوفي وكلام بابا وماما رجع باذني
ياترى شلون حتكون حياتي يمهم
حدبرها لولا وصدك حتتحقق الحياة الجنت احلم بيها ويه حبيبي بدون مشاكل حياة صافيه كلها حب
كرار قيدني بلبدلات مخلاني اختار السي الي بنفسي بحجة يغار عليه ويريد بدلات مستوره مع انو فهمته انو محد حيشوفني وحتى بالعرس حلبس شي يغطي شعري وجسمي وحخلي مكياج هادئ بس هو بقه معاند وجبرني اختار ع ذوقه
مجنت اعانده هوايه لان احبه ماريد يصير زعل اريد ابقى باحلامي الورديه
تزوجت وطلعنا ثاني يوم شهر عسل بقينا اسبوع ومن رجعنا اهله راحو وهم بقو اسبوع يعني اسبوعين اني وحبيبي وحدنا مرتاحين وفرحانين ايام تخبل كلها حب
وراها رجعو اهله استقبلناهم جنت محضره الغده كلت اكيد يوصلون تعبانين فرشت السفره اني متعوده ببيت اهلي نصب الاكل ببلم او ماعون كبير وخاشوكة خاصه وكل واحد ياخذ بماعونه ع كد حاجته  علمود لايتدمر الاكل كله وبالتالي ينذب
رتبت الاكل جنت مسويه تمن وباميا ومقبلات وكرار راح شوى كباب
اول ماارتاحو وغسلو صبيت الاكل ووزعت كدام كل واحد ماعون وخاشوكة وجطل
اشوفهم كامو يضحكون
-يله عادي بعدها جديده
-بعدها على عيشة اهلها
خالتي ام كرار كالت : حبيبتي شنو هلمواعين الفارغه واحنا نظل نلزم سره ع الصب لو شنو
شجن: العفو مدافتهم قصدج خاله
ام كرار: قصدي حبيبة تصبين الاكل بمواعين مو حاصرته بماعون واحد واحنه نلكط
شجن ضحكت : هااا لا مادري متعوده هشكل بس تدرين خاله افضل حتى لايصير تبذير بلاكل
ام كرار : لا وين التبذير شايفتنا مبذرين
شجن: لا العفو خاله حشاكم هسه حوزعه بلمواعين ولايهمج
باوعت الكرار شفته خازرني مااهتميت توقعت يتشاقه
وبقينا نسولف ونسالهم على سفرتهم وعادي خلصنا غسلت المواعين ويه البنات وانتبهت ع المواعين كومه اكل انذب بس سكتت بعد ماعلقت
خلصنا ترخصت منهم صعدت الغرفتي لكيت كرار كاعد
- يمه الحب ميكدر على فراكي منتظرني
- شجن تعلمي لاتتجادلين ويه امي هيه اكبرمنج واكيد تعرف احسن منج
- اني؟ شوكت تجادلت
- تجادلتي ع الغده هلموضوع ماريد يتكرر
اني صاعقه وضربتني بس كلت امه وحقه ويجوز متحب احد يناقشها هيه
تمددنا ونزلت وره صلاة المغرب بعد ماصليت بغرفتي
لكيتهم يحضرون بالعشا كبل بديت اساعدهم متعوده كلشي استعمله ماعون خاشوكه اي شي اطلعه من السنك اغسله اول شي
اباوع خالتي مراقبتني الظاهر جان تكول
-نظيفات تره نغسلهم يله نحطهم بلكاونتر ليش تغسليهم بعد
- عادي مو يصير عليها تراب او يجوز حشره تمشي عليهم ومندري متعوده اني اغسلهم حتى ببيت اهلي
- هااا كلت خاف عبالج مانغسلهم احنا وتريدين تعلمينا!
اسلوبها بلحجي يستفزني اني مااقصد شي مجرد دااتصرف على طبيعتي مادري ليش كل تصرف تحسبله حساب

يتبع ....