الحب وحده لايكفي

٢

حالتنا الماديه جانت زينه بس مو زناكين كولش ولا فقره لا وسط بس مع ذلك مجانو ماما وبابا مخلين بنفسنا شي سفرات وونسه وطلعات اشكال وكل عطله يسجلونا دورات تعليم حياكة لو رسم اي شي نلهي نفسنا بي ونتثقف
ومثل ماكتلكم جنا متعودين ع الحشمة لبسنا عادي مانلبس جبب ولا عبايات بس لبس حلو كشخه كلش ومستور بنفس الوقت
بلبيت جان بابا ناطينا حريتنا نلبس براحتنا وبلمناسبات هم اذا بس بنات
من التلفزيون يختارلنا برامج ومسلسلات حلوه ونكعد كلنا نتفرج سوه ونتونس
تلفونات عدنا بس تربيتنا جانت درع حصين مافديوم اخطأنا التصرف بتلفوناتنا او خننا ثقة اهلنا
وصلت سادس اعدادي جنت ادبي دخلته لان امنيتي اصير استاذة بكلية الاداب مثل بابا
طلعت معدل زين وانقبلت اداب انكليزي وطرت من الفرحه
اخذني بابا وين محل راقي وكلي بابا اختاري شيعجبج ملابس حجابات احذيه جنط وراج دوام كليه
وتحضرت للعالم الجديد ماعرف شمضموملي بس فرحانه حيل واريد بس يجي الدوام
بده الدوام اول يوم بابا راح ويايه طبعا بابا مو نفس جامعتي اني جنت جامعة بغداد وهو مستنصريه بس اول يوم قرر يجي ويايه علمود مااضوج
داومت عادي اندليت كليتي وشفت بنات مرحلتي على نص الدوام وبابا كلي خلص بعد سويت العليه حرجع لكليتي بابا عندي محاضرات
شجن: ماشي حبيبي تعبتك اني
بابا: ليش كم شجونه عندي اريدج ترفعين راسي بابا بكليتج
بقيت ويه بنات مرحلتي تعرفت بيهم اكثر وراها دخلنا محاضرات وتعرفنا ع الولد هم
واستمر دوامي عادي جانت شخصيتي قويه وبنفس الوقت مو معقده وشاطره لان جانت رغبتي هلقسم من البدايه
مرت السنه الاولى عادي ماكو شي وبلعطله احذت دورات تقويه انكليزي تفيدني بكليتي وعادي سافرنا تركيا تغيير جو وتونسنا من غير المطاعم والسفرات بابا فدوه لعينه ممبقي شي بنفسنا
بدت المرحلة الثانيه صرنا كروب جبير ولد وبنات من مرحلتي وعلاقتنا قوت اكثر
جان اكو ولد ويانه اسمة كرار اسمراني طويل عيونه صفر حادة صراحة شكل حلو جان ويجذب
حسيت مهتم بيه وعيونه تروح وتجي ويايه وين ماروح ويسالني هواي اسئله عن اهلي عن اطباعنا عن شحب وشأكره
فديوم جنت كاعده بلسنتر اراجع وحسيت احد فوك راسي
-ها هلو كرار فززتني
- هلو شجن شلونج صباح الخير
- صباح الخير تفضل اكعد
- ها اكعد .. ااا اي خلاجيبلنا شي شتشربين
- هسه شربت عصير بس اذا تريد اوك جيبلي كابتشينو
- اي دقايق
راح واجه جايب الكابتشينو الي واله وكعد
-اي شلونج شكو ماكو
- والله عادي ماكو اي جديد وانت
- اممم اني زين عادي
وسكت اريده يحجي مستغربه شعجب اجه كعد ويايه اكيد اكو موضوع
رجعت اتصفح بلملزمه لان ماكو موضوع افتحه
كال ااااا شجن
- اي كول كرار
- ها شجن هاي الماده انتي زينه بيها
- اييي الحمدلله احب هاي الماده كولش
- ها لعد ليش ماتحنين عليه اني العبد الفقير
- ههههه ليش شبيك
- مادري موزين بيها ابد اااا شنو رايج تقريني
- اي تدلل هسه
- لالا موهسه يعني اقصد كلما عدنا مجال نروح للمكتبه او كافتريا اي شي وتقريني بلكي اضبطها قبل الفاينل
- بس هاي تدلل يمعود يله مابقى شي للمحاضره خلي نكوم

يتبع...