الحب وحده لايكفي

٣

بقى كرار كلفتره يجيني اقريه نكعد بلمكتبه او بلكافتريا او مرات بلقاعات اي مكان ونقره
علاقتي بي قوت هو حباب ومؤدب وشهم حيل وشكله يجذب تعودت علي بهلفتره وجنت احس اكو شي بداخله يريد يكوله كلمره ويرجع يتردد وبقت اسألته مستمره
بعدين كام يكولي نقره بملزمتج اوضح من ملزمتي وعود اخذها للبيت انقل الترجمه والتلخيصات واكوله اوكي ماكو مشكله ومجنت اعرف شنو السبب
بعدين من ارجع اقره بيوم الامتحان الكه كتابات هاي شنو شوكت منو كاتبها مادري
كتابات كلها حب ورومانسيه لو كلمات مالاغاني
ومره اخر يوم بامتحانات الفاينل مالمرحله الثانيه اجاني كرار مستعجل
- شجن فدوه اريد ملزمتج دقايق استنسخ شي
- شكو يمعود ليش مفاول ع روحك امتحنا وخلصنا
- لالا مو ممجاوب واخاف دور ثاني ووين الكاج بلعطله
اخذها وره شويه رجع نطانياها وباوع عليه بنظره وعيونه تلمع يله من رخصتج اشوفج بخير وراح ركض
هذا شبي دامشي حسيت شي وكع من الملزمة باوعت ضرف هاي شكو
فتحته لكيت رسمه تشبهني ومكتوب جواها
ساختصر ابجديتي بستة حروف ... ادمنتك
طبعا كرار جان رسمه يجنن عنده موهبه
هنا حسيت ولاول مره كلبي دك سريع ورفعت راسي تمنيت الكاه بعد بس ماشفته
بهاللحظه اتذكرت هذا اخر يوم وباجر عطله انقهرت مادري ليش حسيت تعودت علي
شنو هاي شجن معقولة احبه
لالا يجوز معجبه بي بس ماتوصل للحب لا
رجعت للبيت وكلشويه اصعد لغرفتي واطلع لورقه واظل اقره الكتابه واباوع الرسمه
اني جنت حنطاويه طولي متوسط وضعيفه  وجهي مدور عندي رصعات ثنين عيوني كبار سود محجبه وشعري كستنائي طويل
بقيت يوميه اباوع الرسمه واشتاق لكرار اتذكر ضحكته سوالفه نظرته الحاده والكتابات الي جانت بملازمي اي اني جنت حاسه هوه ماكو غيره اوووف شلون مؤدب وخجول شكد جان يتردد يصارحني
هناك وتذكرت بابا شكد اتمنى اخذ رجال يشبه بابا نفس طبعه عجبا كرار حيطلع مثل بابا
حيحبني ويحتويني مثل بابا ويعاملني برقه ونزاكة بقيت بافكاري لحدما تعبت
بالليل بقيت اتكلب مجايني نوم كلت خلافتح فيس اشوف شكو ماكو
جان عندي كرار ضمن الاصدقاء لكيته منزل قصيده
مشتاكلك والليل وحشة
ودمعتي التنزل ثكيله وصوتها من تطيح عالي
وحتى محد يدري بيها اركض اتلكاها بيدي من تمر انت على بالي
انت وين ؟! وانه نص موعد بدونك
مدري ياهو يسد مكانك
وحشة فراكك جبيره ....

سمعت القصيده وغمضت عيني احس دمعة نزلت على خدي اوووف شديصير
لا ماريد شنو هلسوالف اني رايحه للكليه حتى اتفوق واحقق حلمي وارفع راس اهلي مو كاعده ادور حبجيات ردت اطلع من الفيس شفت واصلني مسج
اباوع كرار
-عجبج الرسم؟!
مجاوبته وسديت الفيس ونمت
بابا ربانه ع الثكل والرزانه والاحتشام محبيت اضعف واصير خفيفه اني مو مال هيج سوالف
بقيت فتره طويله مفاتحه فيس والرسمه هم ضامتها بلكنتور وسجلت دورات والتهيت
فديوم فتحت فيس وكبل جتي عيني على منشور كرار
منزل اغنيه هلمره
عذبني اقبل...
اجرحني اقبل ...
بس لاتكولي انك نسيت
تزعل احبك ترضى احبك
وبكولشي منك اني رضيت
امليني هم وجراح عذبني خلارتاح
صدكني وانت بعيد.. عمري هجرني وراح

سمعتها واحترك كلبي بلرغم ماحب اسمع اغاني
بقيت حايره مادري ادزله مسج لولا
كلشويه افتح المسجات وارجع اسدها
زين اذا ردت ادزلة شأكوله
ارزله مثلا لو شاسوي
بعدين دافكر ووصلني مسج

تسوى الدنيا عندي من اكعد وياك
وبدونك كلشي ماتسوى دنيتي ...

ايدي اخذتني بلاوعي وجاوبته راسا
- اسم الله عليك كرار شبيك ليش هشكل تكول
- شجن واخيرا رديتي عليه
- اسفه مجنت افتح فيس
- شجن معقوله مدتحسين بيه
بقيت مجاوبت
- شجن اني ..
-ارجوك كرار علاقتنا حلوه ليش تريد تغير بيها
- مارايد شي شجن والله اريدج حلالي شجن الله شاهد مدالعب ولا الي غايه والي مثلج ماتستاهل الاذيه
شجن وحق الله حبيتج يابنت الناس لاليلي ليل ولانهاري نهار
بقيت ساكته
- شجن جاوبي انطيني امل لو تموتيني لاتبقين ساكته
- ماعرف شاكولك
- هاهيه افتهمت شجن اسف
- لحظه شفتهمت كرار
- اني مو من مستواج وحقج ماتريدين تعيشين بمستوى اقل
- كرار منو كال هلحجي صدكني مافكرت هيج ابد احنا ناس ماندور مظاهر وشكليات ندور اخلاق وامانه وطيبه
وانت ماناقصك شي من هذا والف من يتمناك بس انت صدمتني واني نهائيا ممفكره كل بالي ويه دراستي وبس
- شجن يعني فكري فدوه اروحلج فكري وبردي كلبي
شجن موبيدي صدكي الحب هيج شعور يجي غفل والكلب اختارج شجن
- الله كريم اترخص هسه تصبح ع خير كرار
وطلعت من الفيس بسرعه
اريد اغفى ماكدر افكار تجي وتروح
ماكدر اركز اني احبه لو بس معجبة بي
انطي امل لو ارفضه
واذا رفضته يجوز بعد مستحيل نكعد سوه واني تعودت على وجوده بحياتي وسوالفه ووكفاته ويايه
اخاف اتندم مادري وبعدين اني ماعرف عنه شي غير بس الي اشوفه كدامي
بقيت افكر حدما غفيت...