الحب وحده لايكفي

٥

بيومها مانمت ابد بقيت للصبح افكر بحجي بابا وماما
كرار اتصل راد يعرف الاخبار كتله ديفكرون ويسالون عليكم يله نعرف
كلشويه اتذكر علاقتنا وحبنا واتحمس اي موافقه واريد باجر ننخطب
وارجع اخاف ويكرصني كلبي اذن الفجر كمت صليت ودعيت ياربي احبه ياربي اجعله من نصيبي
الصبح سمعت اهلي كعدو واني بعدني مغافيه
راسي وجعني حيل نزلت اتريك وياهم واخذ علاج
- صباح الخير
- صباح الخيرات
- شو وجهج اصفر ماما
نصيت صوتي كتلها  - منايمه ابد
جاوبتني بصوت ناصي - علكيفج ويه نفسج ماما حتى همه الجماعه مكالو شي كالو فكرو على راحتكم واسالو خلنسال عليهم ويصير خير ابوج ميوكف بطريقج
بابا- يابه متنا جوع شدتتبسبسون
اي جايين
بابا: شلونها اميرتي المدلله
ابتسمت كلش احب من يكولي اميرتي
بابا: ياربي دوم اشوف هلابتسامه بوجهج بابا
- حبيبي بابا الله لايحرمني منك يااعظم اب
بنفس اليوم بابا راح سال عليهم بلمنطقه
منطقتهم جانت شعبيه مو مثل منطقتنا
ومدحو الناس بيهم ورجع بابا طمننا
اني فرحت حيل وشويه راح مني الخوف
ورجع بابا سالني
-كتله بابا اني ماعندي اعتراض والقرار الك
-فكرتي زين بابا
-اي بابا فكرت
-خلص على بركة الله
حضنني واحس دمعة عينه
-انشالله اشوفج اسعد البنات باباتي
رجعنا خبر لاهل كرار وحددنا موعد خطوبه رياجيل
وصارت الخطبه واتفقنا نطلع نجهز للمهر من ذهب وبدلات وشغلات ويكون المهر والعقد بعد اسبوعين
جهزنا كلشي اختاريت تخم نازك وخفيف مردت اثقل على كرار وبدلتي هم جانت بسيطه وماما اخذتلي هاشمي اعقد بي واشترينا صواني المهر
وهمه اشترولي قاط طلعه تنوره وستره حلوات وحذاء وجنطه وشال يعني لبس كامل كبداية للنيشان مردت اشتري كلشي هسه ردت من نعقد نطلع سوه نجهز
اجه يوم المهر يوم خطوبتي لحبيبي  يوم تتمناه اي وحده تحب جانت الكاع مشايلتني فرحانه حيل افتر بلهاشمي واطكطك صور
اجوي واجه وياهم سيد يعقدلنا بدت مراسيم العقد كعدوني ورجلي بمي وياس وبيدي قران وكبالي صواني وبيها شموع والسيد قرالنه كم ايه بلقران تخص الزواج وبده يردد كلمات العقد بده كلبي يوجعني ورجليه ترجف احساس بي رهبه وحده تحس انو بهلكلمات حتصير ملك شخص يوما ما كان غريب عليها وماتجمعها بي اي صلة
حتطلع من بيئتها لبيئة ثانيه حتصير مو حرة نفسها
اني سارحه بافكاري وخوفي حسيت السيد يصيحني
-شجن بابا تسمعيني
- اااا نعم اسمعك
- رددي بعدي يابنتي لعد كولي نعم وانت وكيلي
صفنت لحظه وغمضت عيني
- نعم وانت وكيلي
وبدت الهلاهل والكولات والجكليت مادري منين ينطش
ابتسمت حسيت راح الخوف وره شويه كالو حيدخل العريس
كلبي راد يطلع من ضلوعي
دخل حبيبي لابس القاط والرباط وطالع يخبل ومبين بوجهه الفرح
كعد بصفي وهمسلي
- مبروك علينا حبيبي
- الله يبارك بيك (جنت ابد ماكوله حبيبي بوجهه جنت استحي منه بلبدايه)
باوعلي ورجع اندار - شعرج يجنن طالعه كمر
خجلت ودنكت
جانت حفله حلوه كرايبه مابطلو ركص وكولات وهلاهل
واهلي احسهم ممرتاحين بس فرحانين لفرحتي
خلصت الحفله وتمت خطوبتي بخير وسلامه اتصل بيه كرار اول ماوصل للبيت
- اموت عليج
- ههههههه اني هم احبك حياتي الله لايحرمني منك
- اني زعلان وباجر اجيكم اريد تعويض
- ليش حبي اسم الله
- انخطبنا وصرتي مرتي وحلالي وهم مكلتيلي احبك
- ههههه حبيبي اصبر عليه تره اليوم جان اول يوم
- فرحانه حبي؟
- ايييي طبعا حياتي ماكو احد شايل فرحتي اليوم
- الله يقدرني واخليج فرحانه العمر كله
- اكيد حياتي مجرد وجودك يخليني اسعد انسانه
يتبع ....