الحب وحده لايكفي

١٢

بسم الله الرحمن الرحيم
( اما اليتيم فلا تقهر )
صدق الله العظيم

يمه موتني القهر وانه يتيم
شنهو كافر ما تشمله الايه؟!

وره ماصحيت من البنج لكيت نفسي بغرفه وماما تبجي فوك راسي وحدها وماكو يمي طفل
- وين ابني ماما؟؟
- بلخدج حبيبتي (وصوتها مطبك من البجي)
- شفتي؟
ماجاوبتني ودارت وجهها وحسيتها اختنكت بلبجي
- ماما كوميني اريد اشوفه
- ميصير ياعيون امج منا ل٦ساعات
- وكرار وينه
بين على امي الارتباك : يله حبيبتي خلاشوف الدكتوره تجي تطمننا عليج واجيج
عرفت كرار عايفني ورايح
بقيت بلمستشفى وابني ماشفته عرفت حالته خطره
بالليل كالو تكدر تطلع المريضه بس الطفل يبقى بس اني ماقبلت اطلع كتلهم ابقى ويه ابني
توسلت بيهم اشوفه محد خلاني
ثاني يوم الصبح اجه طبيب اطمأن عليه وطلب مني معلومات
كلبي لزمني سالته عن ابني
كلي :العوض على رب العالمين البقاء في حياتج اختي
هنا الدنيا اسودت بوجهي بلرغم عرفت مشوه وميعيش بس تمنيت ع الاقل اشوفه اخلي بحضني اشبع شوف بي
كل ام ضناها عزيز عليها حتى لو بي عيوب الدنيا كلها
دفنوه وماخلوني اشوفه خافو اتاذه بشوفته ميدرون بنار كلبي سواء شفته او ماشفته
اوووف جنت اريد اسمي نور جنت اتمنى بي احل كل مشاكلي بس الغلط مني من وكلت امري لغير رب العالمين وفضلت رضى عمتي  على رضى ربي
مر على ولادتي ٣ ايام وكرار ماشفته ولاشفت احد من اهله
رابع يوم اجه جابلي زنوبه ووجهه متنك عليه من شافني تعبانه حيل وبس ابجي شويه حن اجه خله راسي بحضنه وكلي المهم انتي سالمه
ماجاوبته ولاكدرت احجي اي شي
ياسلامه هاي واني صرت بلنسبه الك مجرد جماد مجرد اله جايبها حتى ترضي امك
بكلبي نار جانت محد يحس بيها جنت داحترك داموت الف مره باليوم اووووف كرار مو هذا عشمي بيك
بقى كرار يمنا لليل وراد ارجع وياه بس امي ماقبلت الا افتح الخياط يله ارجع
وره عشر ايام رجعت بس رجعت غير شجن
شجن الجانت ابتسامتها تارسه البيت رجعت مكسوره وحزينه
حتى اي حجي وياهم قطعته غير بس السلام
عمتي تسمعني حجي مااجاوبها ابد ولااباوع بوجهها
وره ست اشهر قررنا نسوي طفل ونعوفها على الله شيجي نعم الله
بس رب العالمين مارادلنا
شكد حاولنا ردنا راجعت عالجت ماكو ماصار عندي حمل ابد
رجع كرار يتغير عليه بسبب امه طبعا
وكامت تشجعه يتزوج عليه لان اني مدااحبل بعد
يوميه توز براسه
مرات اسمعه يكوللها ماريد ومرتي احبها وانتظرها ومرات يسكت
مرت سنتين وماكو حمل ومجان بيه شي مجرد تاخير بالحمل
فديوم جنت بغرفتي وصاحتني خالتي نزلت اشوف شتريد
لكيتهم كلهم متجمعين
- باعي يابت الناس تحملناج هوايه واحنا نريد ولد يشيل اسم ابننا مو يظل هيج واليوم اني رحت خطبتله وعرسه اسبوع اليجي خاف تكولين محد كالي وتنكدين على ابني !
اني طلقه وضربتني بصدري انداريت على كرار الي جان مدنك راسه وساكت
رحت علي مثل المخبله وكعدت كباله
رفعت راسه وعيوني تجدح
- جنت رايح تخطب كرار؟؟؟!!!
خطبت واني اخر من يعلم !!
كولي كرار ليش؟! ليش هيج سويت شقصرت اني لييييش؟!
وكمت اضرب براسي واخرمش بخدي مثل الفاقده عزيز على كلبها ظليت اعيط واصيح يردون يسكتوني ماكو فقدت اخر شي جتي خالتي بكل حقد ضربتني راجدي وصاحت بيه
- كافي لج بلا هلسوالف مالعيارات تردين تخربين ع الرجال مكافي متحمل وجهج الفكر ماعرفتي تجيبيله بزره براسها حظ
اني بس صافنه عليها وبلا شعور كلت حسبي الله ونعم الوكيل وصعدت لغرفتي كل هلحجي وكرار ماحرك ساكن
كمت الم بهدومي وهدوم زنوبه وخابرت امي تدزلي احد كالت حيجيني جواريننا ياخذني

يتبع...