الحب وحده لايكفي

٤

خلصت العطله تقريبا كليوم يدزلي مسج كرار مرات يرجع يفتح الموضوع ومرات مجرد يسال عليه ومكدرت انطي جواب ابد وقررت من يبدي الدوام اتناقش وياه بلموضوع واساله عن عائلته واتعرف علي اكثر حتى اكدر احسم الامر
بده الدوام ورجعنا لكعداتنا مرات ويه الكروب وكرات وحدنا بحجة اقري كرار وكمت اتطرق لمواضيع هوايه وياه لان هواي اسئلة ببالي استحي اسالها بس افتح مواضيع واشوف ردة فعله واحكم
مجنت اشوف علي اي غبار وعرفت انو اهله عائلة بسيطه بس اكيد طيبين مثل كرار
حسيت بديت انجذب لكرار اكثر بس ماريد ابينله صراحة مجنت اريد اكون علاقه وهلسوالف اخاف على سمعتي وسمعة اهلي
فديوم تمرضت حيل واضطريت اتغيب اسبوع عن الكليه صرت افلاونزا كولش قويه وع المغذيات واتقيء وفدمره حالتي
خلال فترة مرضي حسيت كرار مو يحبني لا يموت عليه وحسيت سكد خايف ومهتم بيه طول اليوم يراسلني ويوصيني بنفسي وصوته يرجف من يحجي ويايه ومره من المرات فاجأني اني جانت غرفتي فوك وبصفها باب للسطح بيومها متمدده بغرفتي وصلني مسج كرار يسال عليه وسالني
- شجن انتي تكدرين تكومين من الفراش
- اي عادي داكوم الحمدلله بس قليل
- ها زين تكدرين تطلعين بلكراج؟
- كرار شنو الفلم خوفتني
- شجن مستحي اكولج بس
اشتاقيتلج ماكدر فدوه اريد بس اشوفج واروح والله
- عزه ليش وين انت كرار
- كبال بابكم
- عزززه هاي شدتسوي يمعود لا احد يشوفك
- بس اشوفج ولو من بعيد
- لاماكدر اهلي جوه كاعدين بس حطلع بلسطح وشوفني من بعيد
- كلشي اقبل بس اشوفج
فتحت باب السطح وباوعت من السياج لمحته
مربي لحيه ومبين تعبان جان كاعد ع الرصيف شمرتله حصوايه فز وابتسامته ترست وجهه وظل يباوع عليه بنظرات كلها حنان واشتياق ودزلي مسج
- شجن اني والميت سوه بدونج
- اسم الله عليك مابقى شي اسبوع الجاي اداوم انشالله

داومت واول منزلت من الخط لكيته واكفلي لمحني واجه بسرعه وعيونه تريد تاكلني وكلشويه يسالني يعني زينه هسه انتي فدوه خوما راسج يوجعج دايخه شي وكلشويه يجيبلي عصير لو اكل ولكيته مستنسخلي كل المحاضرات الفاتت وملخصاتهم وترجمتهم هم
شفت اهتمام منه مشفته باي احد خلاني احبه حيل وفعلا اعترفتله بهلشي بعد مكدرت اضم اكثر
وبدت علاقة حبنا واستمرت سنتين جانت احلى سنتين جنت من اصفن بحب كرار الي اكول شكد سعيدة حظ اني معقوله حيجي يوم وتصير بيناتنا مشاكل بلزواج يمكن حتى زعل مانتزاعل
مواقفه ويايه وشهامته وغيرته عليه وحرصه جان خيالي
طبعا جنت اسولف لماما وخواتي
بس ماما جانت ع طول تكولي بنتي مااوكف بوجه سعادتج بس انصحج تره الحب وحده موكافي العشره حتبينلج كلامي صح بس انت عاقله وتعرفين تميزين ومارح اتدخل بحياتج
الفرق بين حياتي وحياة كرار جان جبير بس مجنت احس بي لان حبه ودلاله غلب كلشي ومخلاني اشوف الجانب الاخر
اول ماتخرجنا كرار دور تعيين و راسا اجه خطبني
بلبدايه جوي نسوان ماما ماعجبها الوضع بس تدري احبه سكتت بس رجعت نصحتني بنتي القرار الج بس كتلج التوافق اساس العلاقه الزوجيه
وراها مره لخ اجوي عائلة كرار بابا عزمهم راد يتعرف عليهم بشكل هاص حتى ننطيهم جواب
وره ماخلصت العزيمه حسيت بعدم الارتياح على وجه بابا صاحني رحتله
- بابا النبي محمد عليه افضل الصلاة والسلام يكول زوجوا من ترضون دينه وخلقه
اني مااهتم للماده ابد ولا للمظاهر بس برأيج انتي تكدرين تعيشين ويه اهل كرار لان الولد ماعنده امكانية يعزل حاليا وماحب افشله واطلب هلشي منه
وانتي شفتيهم كلهم اليوم شنو رايج انتي احب اسمع منج

بقيت ساكته خفت من حجي بابا
- بابا كرار كلش خوش ولد واكيد اهله مثله ومثل طيبته
- بابا الزواج مو بس حب وطيبه لا الزواج يعني تطلعين من عائله وتنحسبين على عائلة ثانيه ف هل انت مستعده ؟؟
سكتت واخذت نفس عميق وفكرت بيني وبين نفسي اي اني احبة لكرار ومستعده اتحمل كلشي لاجل عين الف عين تكرم
- اي بابا مستعده
- فكري زين بابا ولاتجاوبيني هسه فكري على راحتج وانطيني جوابج

يتبع ...