الحب وحده لايكفي

٨

تعامل خالتي زاد سوء ويايه وحتى خوات كرار جانو زينات وكامت تغيرهم عليه
ابوه طول اليوم شغل وميدري شكو ماكو بلبيت
اخو كرار ومرته يجون بلشهر مره ومرته تصير بت خال كرار وعدهم ٢ ولد كلما يجون خالتي تستقبلهم احسن استقبال وتظل تمدح ببت اخوها وتعيرني وتفشلني كدامهم
تريد طول اليوم كبالها وبس اشتغل وقت الصلاة يصير وكمت ااخر صلاتي لان بس اعوف شغلي تظل تدردم وكرار يصعد يرزلني
واني من وراهم كام يصير شغلي ويه الصلاة لان حياتهم مخربطه
كرار موذاك كرار ويايه كام يتاثر بحجيهم لان يعيرو من يشوفو يحبني ومداريني
رغم كل مداراتي الهم ونظافتي والتزامي اني بنظرهم موزينه ولامره مدحوني بكلمه
شكد اتمرض ماشوف اي رأفه من عدهم
من غير الحجي لان حامل ببنيه
جنت احاول شكد اغيرهم واكسبهم من انصحهم بشي عبالهم دانتقص منهم وميحبون يغيرون باي شي بحياتهم ولايتثقفون
حياتي صارت ممله حيل وممرتاحه ابد
جنت اروح لاهلي مره او مرتين كل شهر امي جانت تتفاجئ من تشوف صلاتي صايره ركض ومو بوقتها وتشوفني صايره اخذ بغيبة الناس وهواي شغلات تغيرت بحياتي بسببهم
- ماما ميصير هشكل مهما صار لاتخلين الظروف تغير من اخلاقج او التزامج يا ماما شلون تصفى حياتج وانتي علاقتج بربج موزينه ارجعي شجن القديمه واليحجي وكلي امره بيد رب العالمين
فعلا انقهرت من نفسي ليش هشكل صرت وتغيرت

مره جانت عدنا عزيمه عازمين كرايبهم مسوين ثواب للموتى جنت حامل ٧ اشهر
كعدت بيومها من ال٧ الصبح نظفت وطلعت ع الكراج وحضرت شغلات العزيمه وهمه نايمين لل١٠ يله كعدو خالتي بدت تطبخ والبنات وياها صارت ب١٢ ترخصت كلتلهم اصلي وارجع
صعدت اصلي بس لان بطني جبيره وثكلت صارت حركتي ببطئ وكوه الصلاة على كيفي واتاخر شويه بينما صليت وكملت ١٢ ونص نزلت كلعاده لكيت الوجوه مكلوبه
خالتي احجي وياها بس تاشر وماتجاوبني لو تباوعلي وتفر بايدها
- خاله اساعدج بشي
- هو شباقي حبيبة هو باقي ع الصب هسه البنات يصبون بلامنيه
ماتحملت كلمره مااجاوبها بس فورت اعصابي
- خاله صاير شي ليش هشكل تحجين ويايه قصرت بشي
- لا وبدل ماتعتذر تطول لسانها عليه بت المثقفين
- لا خاله العفو ماطولت لساني اني مجرد دااسالج
وكامت تعيط عليه وترزلني كدام النسوان الي بلمطبخ ماتحملت عفتها وصعدت غرفتي انفجرت بلبجي شويه وصعد كرار
- شسويتي انتي كم مره محذرج ماتجادلين امي
- مجادلت اني هيه ميعجبها شي مني ولازم تطلعني غلطانه كرار بس اسالك سؤال جنت تحسسني انو انتو متدينين ومحافظين بس اريد اشوف الدين الي ببيتكم وينه؟؟
كلشي عدكم عبايه وصلاة بس اسقاط فرض هو هذا الدين بنظركم؟؟ تره كف الاذى والغيبه عن الناس واحترام المقابل هاي كلها دين
حقوق الناس عد رب العالمين اهم من لبس العبايه
ماحس الا ضربني راجدي وهاي جانت اول مره بحياتي احد يمد ايده عليه ظليت بس اباوعله ودموعي تجري وجسمي يرجف وعافني ونزل