الحب وحده لايكفي

١١

صار ليل نهار ماكو موضوع بيناتنا غير الولد عبالك مخلفه ١٠ بنات حاولت اقنعه انو نعوفها على الله ويجوز يجي ولد بدون مانغضب رب العالمين جاوبني بنظرة استهزاء
- هه واذا جتي بنيه بله شنسوي ست شجن؟!
- كرار هاي شبيك مداصدك هاي انت وبعدين اني شنو بيدي هذا امر الله اذا بنيه واذا ولد حرام عليك اتقي ربك
فز من مكانه بعصبيه وعاط بوجهي
- لج .... مو انتي الي تعلميني الحرام والحلال تره ادفنج بيدي اذا تجادليني بعد !!
وعافني وطلع مثل كلمره وصار هذا اسلوبه ويايه صياح وغلط وشتم وحتى ضرب مرات يضربني
وخالتي رجعت لاسلوبها القديم واتعس
ويوميه مسمعيني حجي
زنوبه وره ماطلعو عينها وعلموها سوالف مكسره كامو يضربوها وتعاملهم وياها كله صياح وحسره اذا وصخت شي او لعبت بشي
نفسيتي تدمرت اعصابي تلفت ياربي شاسوي وهاي الطفله شنو ذنبها تعيش بهيج اجواء
كلت خلابدي من جديد واحاول اكسبهم
غيرت اسلوبي ويه كرار كمت يوميه احضرله مفاجأة بلغرفه من يصعد لو شموع لو كتابات ع الميزتواليت لو هديا بدون مناسبه لو فد نوع حلويات يحبه ردت بس اكسبه
عيالي ادلل بيهم واخدمهم واحير شاقدملهم وماكو فايده
كرار بده شويه يرجع زين ويايه بس يوميه يكولي اذا تحبيني تروحين تسوين تحديد جنس ماريد بعد تجيني بنيه
اخير شي قررت استسلم والبي طلبه بلكي تصفى حياتي تعبت اريد يوم ارتاح وافرح تعبت من شوفة دموع بنتي لو اثار ضرب بجسمها
وفعلا رحت دكتوره ونفذت رغبته وصار الحمل
وجان اتعس من حملي السابق بلوحام والدوخه والتعب
خلصت اشهر الوحام واخذت سونار وطلع ولد والكل فرح وكرار كام يعبدني عباده
وخالتي بطلت خباثتها وكامو ماالهم علاقه بزنوبه بس هامليها كولش
جنت كل شهر اروح اطمن على حالة الطفل ويكولولي زين وكولشي تمام
اول مادخلت التاسع رحت اطمن ع الطفل بس جانت دكتورتي مسافرة واضطريت اروح لغيرها وصدمتني الدكتوره
- ماما انتي مماخذه سونار ابد؟
- بلي دكتوره كل شهر اخذ
- ماما الطفل مشوه شنو محد كايللج؟!
هنا حسيت الدنيا كلها وكعت على راسي
وكعت من طولي ومااحس بعد الا اصوات اجهزة وهوسه ووشة باذني فتحت عيني امي وكرار فوك راسي
- اني وين؟
امي تبجي : حبيبتي بلمستشفى هسه دقايق وتدخلين الصالة
- ياصالة ؟!
- صالة العمليات ماما لاتخافين الله واهل البيت واكفيلج
سحبت حسرة وبجيت : ماما ابني طلع مشوه وره كل التعب ماراح اتهنه بي ماما
ويه هلحجي مااحس الا كرار عيونة تجدح ولزم ايدي حيل: شنوووو؟؟ هاي من شوكت هلحجي ؟
اني: اااخ كرار ايدي ايدي
امي: على كيفك كرار وياهه هيه شعليها هسه بلغتها الدكتوره
كرار بصياح : كذااابة احجي من شوكت هلشي وشسويتي بابني اني ادري هاي اكيد فنون منج حتى تعاقبيني مو ؟! بسيطه اني اعلمج
هلاثناء دخلت الممرضه على صياح كرار وطلعته بره لان حالتي جانت خطره وضغطي معلك صدمتي بحجي كرار خلت حتى دموعي تنشف ظليت بس فاتحة عيني حيل واون وماما تبجي وتقره على راسي ايات
ضربوني ابر بلمغذي وره دقايق بعد ماحسيت بشي...
يتبع ...

حبايبي لاتنسون التصويت
احتاج دعمكم ❤️❤️❤️