الحب وحده لايكفي

١٠

ارتاحيت شويه من شفت خالتي فرحت لان سميناها زينب كلت بلكي هلشي يحنن كلبها علينا
رجعت لبيتي وره ٥ ايام فرحانه ببنوتي وكرار هم حيل فرحان مر كم شهر تمام والتهيت ببنتي وقلت ازعاجات خالتي وحجيها وراها رجعت تقره براس كرار ع الولد
بس كرار هلمره مخلاها تتدخل بحجة العيشه والمصرف كللها خلتصير الطفله سنه ونفكر
زنوبه كبرت وصارت تشبه ابوها سوالفها تخبل من عمرها يوم واني ع طول احجي وياها واعلمها واتخيلها تفهمني اسلوبي وياها مثل اسلوب بابا ويانه
وطبعا اهل كرار يضحكون ويستهزؤون بس مجنت اهتم اريد اربي بنتي احسن تربيه ومااقصر عليها بشي حاولت مااخليهم يتدخلون بشي ولو جان هلشي معركة بلنسبه الي
من عمرها ١٠ اشهر يريدون يعلموها تضرب وامنعهم كوه وعقلي يطير 
من صار عمر زنوبه سنه ونص كرار كلي شجن اريد ولد
- كرار كول اريد طفل مو اريد ولد لان موبيدي اجيبلك الولد هلشي بارادة الله
- لابيدج امي كالت اكو طبيبات هسه ديسوون تحديد جنس روحي راجعي يمهم ويجينا الولد وهم امي تفرح
- كرار شدتحجي انت مستحيل هلشي حرام هذا لعب بارادة رب العالمين واني مااغضب ربي علمود ارضي امك الي هيه اصلا ممقدرتني
- شجن ماعندي غير حجي تروحين وتراجعين وانسد الموضوع
عفته بواهسه وكلت مستحيل اسويها لو شيصير اني مؤمنه وكافي شكد قصرت من وراهم
جانت دنيا ظهر وزنوبه متعوده تنام هيج وكت اخذتها نومتها وره شويه فزت تصرخ وتبجي شلتها حاولت جانت فازه من حلم عبالك كلبي وجعني مادري ليش بقيت اقره ايات عليها رجعت غفت نزلت دااكمل شغلي جوه
دخل كرار وجهه مخطوف وبيده التلفون
- صعدي بدلي شجن دااخذج لبيت اهلج
- خير كرار شصاير
- ماكو شي عيني اخذج تشوفيهم
- لا كرار فدوه كلبي لازمني احجي فدوه شبيهم
- ابوج بلمستشفى
- يمه يانظر عيني وك عيني كرار فدوه شبي احجي
- شجن مو وكتها اني مثلج ماادري امشي بسرعه
ركضت بدلت وعفت زنوبه نايمه ووصيتهم عليها الطريق كله ذكرياتي ويه بابا تمر على بالي مثل الشريط
اتذكر اسلوبه تعامله حنيته مافد يوم قهرنا بحجايه حتى مشاكله هو وامي جان يصيحها بلغرفه ويحاسبها مستحيل يتعاركون كبالنا
-ياربي اخذ عمري وانطي لبابا فدوه كرار شكالولك شبي
- شجن انفجار صاير بوقت طلعتهم من الجامعه
- لا فدوه لا ياربي لاتاخذه مني فدوه
وصلنا لبيت اهلي الناس متجمعين وصوت امي سمعته من راس الفرع ياربي اكون بحلم ياربي
بس مجان حلم للاسف
بابا راح
الغالي راح وبعد مايرجع حتى ماودعته قبل مايروح
راح واخذ كلبي وياه منو يعوضنا عنك بابا منو يسد الفراغ بعدك
راح سندنا راااااح وراح كلشي حلو وياه
طول ايام الفاتحه زنوبه يم عيالي بالي يمها بس هم ماريدهم يجيبوها بهيج اجواء وره اسبوع رجعت مشتاقه لبتي حبيبتي بس لكيتها غير زنوبه
كل تعبي وتعليمي رايح
لكيت زينب طفله بس تصرخ وتضرب وحتى غلط معلميها
انضربت بنص كلبي بشوفتها
ماردت اتعاتب وياهم لان اعرف جوابهم اخذتها وصعدت وهيه تضرب بيه واني على اعصابي ورجعت من البدايه وياها بلحجي والاسلوب اني اعلم منا وهمه يخربون كلشي منا وبتي كبرت بعد مو سهله وكرار رجع على موضوع اريد ولد
يتبع ....