الحب وحده لايكفي

7

مشى اليوم عادي نمنا كعدت ثاني يوم الصبح جان جمعه ومتعوده اكعد ب٩ ببيت اهلي لكيتهم نايمين بديت احضر بلريوك وانتظرت ماكعدو صعدت اكعد كرار كال رجعي نامي اهلي ميكعدون من وكت
بس اني متعوده اكعد من وكت كلت يله خلانظف لعد بينما يكعدون بديت انظف بلبيت مجان نظيف كولش نظفته تنظيف زين ودخلت ع الحمامات سمعت صوت واخيرا كعدوا اباوع ساعه ١١
صفنو ع البيت وريحته ونظافته والريوك جاهز فرشت السفره وحطينا الريوك ونزل كرار هم اتفاجئ وابتسملي تريكنا وسوالف وضحك لل١٢ بس ديتريكون كمت لملمت السفره وياهم كتلهم خلنصلي وبعدين نجي نغسل المواعين ونحضر غده
اخت كرار : لا امي تحجي خلنكمل فدمره ونصلي
شجن: لاعفيه شلون ااخر الصلاة ماكدر حرامات اليوم جمعه نصلي ع الاقل الظهر ونجي ماتاخذ وقت
رحنا نصلي اني فوك واسمع خاله تصيح بلبنات
-اي عفيه المواعين بلسنك والغده مامحطوط ع النار وكاعدات يتعبدن
صفنت هاي صدك تحجي
جانت ماما معودتنا من تصير الصلاة نعوف كلشي ونتفرغ نصلي
نزلت ع السريع
-خاله شتريدين اسوي غده ؟
- حطيت دجاج ع النار سوي سوب وتمن
- صار بعيوني خاله تامرين
اول ايام زواجي جنت البس كلابيات بلبيت او فساتين مرتبه
مجان عدنا احد بس البنات وخالتي
عمي يطلع من الصبح وميجي للعصر
ف كمت بعدين البس برمودات او بنطرون وبدي
كلما انزل لابسه شي اشوف نظرات عدم رضى من خالتي لو تفر بايدها لو تأفأف همه متعودين يلبسون دشاديش طويله بلبيت
حماتي الصغيره جانت ناجحه للاول متوسط جبتلها هديه برموده حلوه وبناتيه مالعمرها
خالتي من شافتها مقبلت تلبسها
- ليش خاله ماعجبتج
- لا احنا بناتنا ميلبسن هيج لبس شني تريديها تطلع رجليها وزنودها وتلبس ربع
- خاله هو منو اكو بلبيت ابوها واخوها والبجامه مو ضيكة ولا مدلعه مجرد ربع ردن وبنطرون برموده
- لا خاله فدوه لعينج لاتطلعين عين بناتي احنا عائلة متدينه وملتزمه
قهرتني حيل حجايتها لعد اني شنو مثلا شبيها ديانتي
عدهم الدين مظهر ولبس وهمه صلاتهم متاخره اكلهم كله تبذير ليل نهار غيبه صلاة الفجر محد يكعد
من غير اسلوبها القاسي ويايه هو هذا الدين؟؟!
مرات اكون دااحضر بلغده او شي وتصير صلاة اعوف كلشي واتفرغ اصلي مايطير الشغل تظل تدردم وتحجي عليه غير تكملين شغلتج واذا اجاوبها كرار الكاه بلمرصاد وبس نصعد يرزلني اظل ساكته ماريد مشاكل
ليل نهار تحجي ع الناس ومرات بالباطل واني ماكدر اسكت اكولها لا خاله تره فلانه مو هشكل كبل ترزلتي ---شنو قصدج اني مو خوش واحجي باطل
-خاله مقصدت هيج بس داوضحلج ليش حرامات يجيج اثم وانتي مؤمنه اخاف عليج
-لا معليج بيه عليج بنفسج ولبسج هذا
صوج رجلج ماعرف يلبسج عبايه
متكبره علينا عود شوفوني اني من هاي المنطقه اني راقيه
ابقى مدنجه راسي ودمعتي تجري
الله شاهد لاتكبرت عليهم فديوم ولا ابد كل قصدي جان اعلمهم انصحهم( الدين النصيحه ) بس همه فاهمين الدين غلط
الي يشوفهم بلشارع يكول ماشاء الله وداخلهم فارغ
وحتى كرار رغم كل حبه الي بس ميقبل اتجادل ويه اي احد بلبيت ومن يصير موضوع يوكف بصفهم مينصفني ابد
وره شهرين من زواجي اكتشفت اني حامل فرحت حيل وكرار هم جان طاير من الفرح اول اشهر جانت صعبه حيل وحام موت احمر جنت اريد بس اظل نايمه
خالتي يوميه مسمعتني حجي لو تسمع كرار
-هاي مرتك بزر دلال خلفناكم ولايوم نمنا بفراش ولاتدللنا بس هذا بزر الدلال بس حبلت تدللت
-يوم خطيه متاذيه تره من الحمل فتره وتعدي انشالله
-اي دافعلها امدايه وامده خلفتي عود فرحانه مخلفه رجال صاير خروف لمرته
جان هذا الحجي يحرك كرار ويغيره عليه
مرت الاشهر الاولى ورحت اخذ سونار
طلعت بنيه فرحت حيل وكرار جان ويايه هم فرح والطريق كله نتخيل شكلها ونفكر شنسميها وصلنا للبيت فرحانين ودخلنا نبشرهم
اشوف الوجوه انكلبت وبلذات عمتي
حتى ماباركتلي اني هم جنت تعبانه اترخصت وصعدت اتمدد
يتبع...