الحب وحده لايكفي

٩

بيومها ماكدرت انزل بعد بقيت بس ابجي ومصدومه معقوله هذا كرار ومعقوله اني هشكل حياتي معقوله هذا جان اختياري
دخت من البجي وبلا اكل ومحد فكر يصعد يشوفني او يكول حامل خطيه خلنصعدلها اكل
للعصر دخت كولش ومحسيت بعد بشي
بس اسمع كرار يصيحني
-شجن تسمعيني فدوه جاوبيني شجن شجن اسف حبيبتي
فتحت عيني كوه لكيته كاعد ومخليني بحضنه ويغسل بوجهي وايدي
- الحمدلله والشكر ربي شبيج حياتي شيوجعج ؟
- دايخه
- هاج اشربي شويه لبن صعدتلج
باوعتله وبديت ااصحصح
- هسه تذكرتني لو شنو
- اسف حبيبتي
- كرار من ال٧ اني واكفه على رجلي اشتغل مثل الحيوانات وصعدت ب١٢ ولل ٥ العصر مفكرت تشوفني تكول ماتت عاشت مماكله شي خاف داخت هسه
ماتفكر بيه فكر ببتك شنو ذنبها؟!
هو بقى ساكت
- كرار بس كولي اني شنو بلنسبه الك وين حبك وين وعودك شنو البدر مني وخلاك بهلقساوه ويايه شنو ذنبي
- ماالج ذنب بس ياشجن كتلج لاتجادلين امي
- اني محجبت وياها شي هيه مو حقانيه خلتخاف الله بيه تخيل لو وحده من خواتك بمكاني تقبل يعيشون عيشتي
خدامه من الصبح لليل ومااسمع كلمه طيبه حجي وياهم كله عيني واغاتي وممقدريني بحرف لا ومثكله عليه لان حامل ببنيه اتقو الله حرام عليكم
من ال٧ اكرب وهمه نايمين بلعسل صعدت بس غسلت وصليت نص ساعه انكلبت الدنيا
- حقج شجن بس اني شنو بيدي امي هاي
- لا مو لان امك بس لان يعيروك من تدافعلي
- شجن احترمي نفسج
- اني من يومي محترمه كرار انتو الي خليتوني هشكل اصير من رخصتك اكوم انام
- انزلي اعتذري من امي واكليلج شي شجن
- مااعتذر مغلطانه اني
- شجن لاتعصبيني
- اتعصب واضرب براحتك كرار مانازله ومااعتذر
باوعلي بغضب ونزل
بقيت لليل وحدي ساعه ابجي ساعه ادوخ لحدما غفيت وفزيت حسيت كرار يمي يلعب بشعري
- ساعه بيش ؟
- ساعه ١ حياتي
- شعجب منايم
- حبيبتي زعلانه ومماكله ماكدر انام
انداريت علي حضنته وبجيت
- مشتاقتلك كرار مشتاقه لحنيتك كرار فدوه داموت يوميه اني من اشوف تعاملك ويايه كرار بعدك تحبني لو شنو ؟!
- والله احبج شجن والله ماتغير حبج بكلبي كبر مانقص بس صدكيني موبيدي تريدين يكولون عليه مو رجال ومرته تمشي؟
- واني بشنو امشيتك كرار يعني اذا تحبني وتعطف عليه هاي معناها اني امشيتك تره هاي رجوله واخلاق
- ميخالف حبيبتي اهلي واعرفهم وانتي عاقله فدوه مشي الامور لخاطري
- كرار فدوه خلنعزل والله مدارتاح اني
- لاحبي وين نعزل ماكدر واصلا ماعندي امكانيه
- كرار نأجر فدوه راتبك وشغلك العصر واني ادرس  طلاب عود بلبيت وتدبر العيشه فدوه لخاطري
- لاحياتي انسي هلسالفه وتحملي هسه بس تجي بنوتتنا يتعلقون بيها وتقل المشاكل وداعتج

سكتت وقررت اتحمل مدام يحبني كله فدوه اله ولبتنا الجايه
قرب موعد ولادتي واني اطلك كرار جان يشاقيني يريد يخفف عني وهمسلي شنو رايج نسميها زينب على اسم امي
فتحت عيني علي : مستحيل زينب وحده مكفيتني
- حياتي الي قصد والله بلكي من تشوفنا مسمين على اسمها تفرح وتغير تعاملها وياج وهم تحب بتنا
- اوووف كرار الوجع ماكلني وانت بيش تفكر هاهيه بكيفك
وصدك شرفت البنوته وسميناها زينب جبت بلمستشفى واخذوني اهلي وياهم
بالليل اجه كرار واهله
ابو كرار : ماشاء الله تبارك الرحمن شسميتوها
كرار واني : زينب
الكل صفن وخالتي باوعت صفح: هااا شعجب هلاسم
كرار : يوم شعدنا غيرج وهاي اول حفيده بنيه بلبيت
ام كرار بفرح شالت الطفله : تتربى بعزكم انشالله
يتبع...