الحب وحده لايكفي

١٤

تستاهل واتنمالك انه الخيــــــــــر
صح فرصه مثلهه من الصعب تلكه
خلي اذنك على صدري سمعت الصوت؟؟
تسمع فرح كلبي تسمع الصفكه
بقى عندي فرح زايد حرام ايضيع
مر اخذه بطريقك ساعة الفركه
بي تلكه ابتسامه تلكه ضحكه بصوت
انته ادخل بروحي بكيفك استنكه
انه هسه فرح بالروح مامحتاج
مايحتاج فرحه الينوخذ حكــــــــــــه!!

كرار: شجن خلنفتح صفحه جديده
شجن بعبره والم : مبروك زواجك كرار
كرار : شجن ...
شجن قاطعته: حلوه؟؟
تحبك بكدي ؟
تهتم باصغر تفاصيلك؟
ام بيت؟
تقبلتها كرار ونسيتني مو ؟!
نومتها بحضنك واخذت مكاني مو؟!
رضت هسه عليك خاله؟!!
كرار: شجن كافي الله يخليج
شجن: تتهنون انشالله
كرار: شجن حبيبتي ...
شجن قاطعته بعصبيه: اسمي شجن وبس !
طليقتك شجن !
وعفته ورحت للقاضي : يله استاذ فدوه بنتي اريد اروحلها خلصنا دارجع

رجع القاضي  وردد علينا كلمات الطلاق رددناها بعيون دامعه والف حسره بالكلب والف شهكه
كلشي انتهى الحب مات الذكريات انطوت التضحيات صارت منسيه
والكبرياء طغى على كلشي
طبعا كرار تنازل عن بنته ووقع على هلشي بس اذا راد يشوفها ماامنعه بشرط مايدخل للبيت
طلعنا من غرفة القاضي وكلمن مشى بدربه التفتنا واحد للاخ لاخر مره والنظرات البيناتنا يحتاجلها كتاب كامل حتى يفسرها
دورتك انه بشدتي .. شفتك وطن حنيتله
لكن لكيتك غربتي
احتاريت منهن ياهي اصح
مابين ذلي وعزتي
اختاريت اعوفك حتى لا
تكسر قرارك دمعتي
وونيت سكته ماردت يتشمتون بونتي
صح اضحك بنبرة فرح
بس ركز بصوتي بعد تسمع انين بضحكتي
هم مثلي كلبك مانسه؟!!
وهم بعد من تمشي درب تذكرني خطواتك بعد
تترك فراغ لخطوتي؟!!!
لاتسكت ال (لا) بينت وبين اثرها بعبرتي
ولاتلتفتلي بس ردت انطيك اخر مابقى
وهو شبقى؟!!
مني خذت كلشي وبقت
دمعاااات ليك بذمتي !!!

ولهنا انتهت قصتنا
اسفه لان النهاية كانت حزينه
اتمنى تكون وصلتكم العبرة منها
نصيحتي للبنات الحب مو عيب ولاممنوع لكن من تحبين اختاري الشخص الي تشوفي يستحق يكون صاحب بيتج وابو اطفالج ويكون كد هلمسؤوليه
الزواج مو بس حب وكلام جميل لا
الزواج يعني مسؤوليه وبيت واطفال ومجتمع جديد
والشي الثاني المهم جدا بلزواج هو التوافق
اختاري الي تحسي نفس طبقتج نفس تقاليدج نفس مجتمعج مااقصد الماده ابدا ابدا وانما اقصد طبيعة العائلة سلوكياتهم عاداتهم اخلاقهم مستواهم الثقافي
وماغلط ابو المثل من كال :
( الياخذ من غير ملته يموت بعلته)

اسفه ع الاطاله حبايبي
لاتنسون تصويتكم اذا حبيتو القصه وتعليقاتكم الحلوه

شنو تحبون يكون موضوع قصتنا الجايه
احب اشوف ارائكم ❤️❤️❤️