انت دائي و دوائي

25

#روايه انت دائي ودوائي
الحلقه 25

( الفصل الخامس والعشرون )

نظر طارق لحمزه مصعوقاً من كلمات الطبيبه ومن منظر حمزه الذى لأول مره يراه يبكى بشده
حارب طارق دموعه وقال بصوت مهزوز : انا هتبرع لها بدمى ،خدوا الى انتوا عايزينه بس بلاش ال..
الطبيبه: للأسف مبقاش ينفع ،حضرتك هتتبرعلها بالدم بس أكيد بعد مانوقف النزيف الى مش راضى يقف والحل لازم استئصال الرحم والا هيكون فى خطر على حياتها

مسح حمزه دموعه بعنف وقال بحزم : اعملى الى انتى شايفاه صح يا دكتوره، اى حاجه المهم هى تبقى بخير مش مهم اى حاجه بس هى تبقى كويسه
الطبيبه: هو حل واحد بس يا أستاذ حمزه زى ماقلت لك هو أست...
فقاطعها حمزه بعنف : أستئصليه ، اعملى اى حاجه بس هى تعيش
تنهدت الطبيبه: حاضر ،ادعيلها

قالت ذلك وذهبت الى غرفة العمليات

أنهار حمزه على أقرب كرسى فهو كان يشعر ان قدميه ماعاده يحملاه ،جلس طارق بجانبه ووضع يديه على ركبة حمزه وقال : حمزه ،مش عارف اقولك ايه
سكت حمزه قليلاً: هتقولى ايه يا طارق ، الحمد لله على كل حال المهم انها بس تقوم بالسلامه
طارق : هتقوم بالسلامه ان شاء الله
حمزه: يارب

بعد قليل خرجت الطبيبه من الغرفه فأتجه اليها حمزه مسرعاً وقال بلهفه ،: طمنينا يا دكتوره
الطبيبه: الحمد لله يا استاذ حمزه قدرنا نوقف النزيف بأعجوبه بس هى طبعاً فقدت دم كتير وهتحتاج نقل دم

طارق : انا موجود يا دكتوره ،مستعد للكميه الى انتوا عايزينها
الطبيبه : طب اتفضل معانا
تدخل حمزه قائلاً قبل ان تنصرف الطبيبه : دكتوره،.... هو حضرتك يعنى شيلتلها .. الرحم زى ماقلتى

الطبيبه بأسف : اه للأسف يا أستاذ حمزه ،انا آسفه جداً بس هو ده كان الحل الوحيد والا كانت هتبقى حياتها فى خطر
تنهد حمزه بحزن: الحمد لله ،المهم هى تكون كويسه وبخير

الطبيبه بأبتسامه مطمئنه : ان شاء الله هتكون بخير
حمزه : ان شاء بس ليه رجاء يا دكتوره
الطبيبه : اتفضل
حمزه: ممكن رنا ماتعرفش بموضوع أستئصال الرحم ده ،على الاقل دلوقتى ،كفايه عليها ان بنت من البنات ماتت مش هتتتحمل الصدمتين
الطبيبه : اه طبعاً مفهوم ،ماتقلقش خالص يا أستاذ حمزه
حمزه: متشكر جداً

ذهبت الطبيبه بعدما أمرت بدخول رنا التى كانت مغيبه عن الوعى الى غرفه بسريرين حتى يتم عملية نقل الدم من طارق الى رنا

نظر حمزه الى طارق الممد على السرير وتم توصيل أنبوب طويل لسحب منه الدم فقال : انا مش عارف اقولك ايه يا طارق ،تعبناك معانا
طارق مستنكراً : ايه الكلام الى بتقوله ده ياحمزه رنا زى.... وسكت قليلاً وقال: رنا زى أختى يا حمزه وانت أخويه الى لو أطول اديله عمرى ماتأخرش عليه
حمزه : تسلم يا طارق ،ده العشم برضو