انت دائي و دوائي

43

#روايه انت دائي ودوائي
الحلقه 43

( الفصل الثالث والاربعون)
(وماقبل الاخيره)

وصل طارق الى القسم مسرعا بعدما ابلغه حسام صديقه ان اخيه قبض عليه ولم يذكر تفاصيل

وصل طارق وهو يلهث الى القسم ودخل الى مكتب حسام وصاح: حسام ...فين حمزه

حسام: اهدى بس ياطارق

طارق: اهدى ايه بتقولى حمزه اتقبض عليه وعايزنى ابقى ريلاكس

حسام: طب اقعد بس عشان افهمك

جلس طارق عن مضض وقال: ممكن بئه تفهمنى

حسام: انت تعرف ايه عن ا لكمباوند الى مشارك فيه اخوك

طارق بتفكير: معرفش كتير ..معرفش غير انه مشارك فيه سيف الجيار وهو داخل بمواد البنا وسيف داخل بشغل المقاولات والى اعرفه انهم خلصوا المرحله الاولى ولسه التانيه

حسام: هما بالفعل رموا اساسات المرحله التانيه

طارق: مش عارف معنديش معلومه ...بس ايه علاقة ده بالقبض عليه

حسام: المرحله التانيه كانت عباره عن اساسات وانهارده اربع عماير من الى مرمى اساستهم وقعوا

طارق: ايه!!!...وقعوا ازاى

حسام: مهو ازاى دى هى المشكله .... الاساسات انهارات على سبع عمال اتنين ماتوا والباقى حالته خطره وبعد الكشف فى الموقع هناك اكتشفنا ان السبب ان مواد البنا الى استخدمها العمال مغشوشه وطبعا مواد البنا دى من عند شركة حمزه وتم البنا بموافقة سيف فبالتالى الاتنين متورطين فى الى حصل

صاح طارق باستنكار: ايه الى انت بتقوله ده ياحسام ...انت فاهم بتتكلم عن ايه شركتنا دى من ايام والدى الله يرحمه واستلمها حمزه وكبرها ومن يومها وهى ليه اسم فى السوق وعمر ماحد اشتكى من شغلنا ابدا وكمان سيف الجيار وشركته اسم لا غبار عليه ...يبقى الوضع ازاى والى حصل ده حصل ازاى

حسام: ممكن تهدى انت ظابط وعارف ان النيابه ملهاش علاقه بالكلام ده ...النيابه عايزه ادله

طارق: ادلة ايه ...دى واضحه جدا دى مكيده

حسام: مكييده..كده بدات تفكر صح ..انت بئه عندك فكره مين ممكن يكون الى عمل كده

طارق: لا طبعا انا مليش علاقه بشغل حمزه خالص

حسام: يبقى تقعد معاه وتعرف منه ايه الى حصل وتعرف منه مين ممكن يكون عمل كده

طارق: طب هاته ..وسكت قليلا وقال : اوعى تكون نزلته الحجز تحت

حسام: انا لما جيت كان نزا الحجز ولما بعته له وطلعته من تحت عشان اخليه يقعد فى الاوضه الى جمبى ..بصى لى بكل برود وقالى انه مستريح تحت