انت دائي و دوائي

30

#انت دائي ودوائي
#الحلقه 30
(الفصل الثلاثون ) الجزء الاول

رنا: لأ انانيه ... انانيه عشان مش هقدر اقولك طلقنى ولا هقدر أقولك أتجوز عشان تخلف لانى ببساطه لاهستحمل أبعد عنك ولا هستحمل تشاركنى فيك واحده تانيه

أبتسم حمزه وقال: والله انتى عبيطه ، انتى مش شايفانى متعلق اوى بالولاد لدرجة انى أفكر فى اى حل من الحلول دى
رنا: بس مامتك
حمزه: سيبى ماما عليه وانا هوعدك انها عمرها ماهضايقك
رنا بخوف: هتقولها
حمزه: هو انت خايفه كده ليه ،يابنتى دى حاجه مش بأيدك واكيد امى مش بالسوء لدرجة انها تعايرك بحاجه ملكيش ذنب فيها
رنا:........
حمزه: هى من يوم ولادتك قالت لك حاجه عن موضوع البنات ولا اى حاجه
رنا: لأ خالص ،دى حته مبسوطه اوى بهنا وبتحبها اوى
حمزه: شفتى ،هما كلمتين قالتهم بس كانوا من منطلق الى اتعودنا عليه الولد وابن البكرى والى بيشيل اسمه ... يعنى الكلام الخايب الى اتربينا عليه
رنا: مش عارفه ياحمزه ،مش عارفه
حمزه: ممكن ماتفكريش وتنسى الكلام الخايب ده وتمحيه من دماغك خالص ... ها ممكن
رنا: حاضر
حمزه: حضرلك الخير ، امال هنا فين
رنا: نايمه فى الأوضه التانيه
حمزه وهو يغمزلها : طب بقولك ايه ماتيجى نمثل فيلم اهمد ياحمزه
ضحكت رنا برقه وقالت: والله انت رايق ياحمزه
حمزه: وما اروقش ليه ياختى ،مراتى وبنتى جم م السفر عشان خاطر مش قادرين على بعدى يبقى اروق ولا ما أروقش
رنا: أتعشيت ولا أحضرلك العشا
حمزه مجعداً أنفه: أومهاتى اوى الجمله دى

........................

بعد أسبوعين وقف حمزه امام المرآه يعدل من رابطة عنقه ورنا خلفه تساعده على ارتداء سترتة بدلته السوداء
حمزه: برضو مغيرتيش رأيك وهتيجى معايه
رنا: مانت عارف ياحمزه ،هسيب هنا ازاى

التفت حمزه لها وأمسك بذراعيها وقال: رنا ، انتى عارفه ان ماما عرضت انها تيجى تقعد بيها انتى الى رفضتى
رنا: معلش ياحمزه انا مش هبقى مطمنه
حمزه باستنكار: مش هتكونى مطمنه عليها مع امى ،ليه هتاكلها
رنا: مش قصدى ،بس انا مش بحب اغيب عنها
حمزه: على فكره دى حجه ،انتى مش عايزه تروحى
رنا: بصراحه اه ،انت عارف ان جو الحفلات ده مش بيعجبنى
حمزه: بس دى مش اى حفله ،سيف عامل الحفله دى مخصوص بمناسبة اننا خلصنا المشروع بتاعنا سوا ،فالطبيعى انك تكونى معايه
رنا: انت قلت لى قبل كده مش هغصبك على حضور الحفلات
حمزه: بس المره دى مختلفه ،دى حفله خاصه بيه انا
رنا: روح انت وانا هستناك... انا لا بحب الحفلات ولا بلاقى نفسى فى وسط المجتمع بتاعكم ده
حمزه باستنكار: مجتمع بتاعنا ، بتاع مين؟! ، هو انا من مجتمع وانت من مجتمع.... زفر وقال : نفسى يبقى عندك ثقه فى نفسك وتبطلى تقللى منها كده
رنا وهى تخفض رأسها بأسى : لو كان عندى ثقه فى نفسى زمان ولو قليله ،دلوقتى بعد الى حصل بقيت زيرو

هتف حمزه بغضب: أيه الى حصل ؟!
رنا: انت عارف
حمزه: على فكره انا ابتديت أزهق ،انا بقيت حاسس انى طول الوقت بحاول اثبتلك ان الموضوع مش فارق معايه وانتى مصره تفكرينى وتفكرى نفسك وتحطى تخيلات فى دماغك وتزعلى