إتغيرنا ..
اه كلنا اتغيرنا و بنتغير و هنفضل نتغير .. التغيير ده شيء اساسي نتيجة اننا بنقابل ناس جديدة و نروح اماكن جديدة و بنخسر حاجات غالية علينا و في نفس الوقت بنكسب حاجات مكناش نتوقعها .. ناس قريبة مننا بيجرحونا و احنا كمان بنجرحهم .. الالم و الوجع بيغيروا الانسان و الصدمات اللي بتيجي ورا بعض دي .. كمان الحاجات الصغيرة اللي محدش بياخد باله منها .. الحياة عامةً بكل ما فيها بتغيرنا .. التفاصيل الكتير و الزحمة اللي بتكون في افكارنا و الصوت العالي اللي جوانا و الصراع النفسي شبه اليومي .. الناس اللي بنثق فيها و بيخذلونا .. الوعود المنسية .. النظرات اللي بتدخل جوه قلبك دي و بيكون ليها معنى كبير حتى لو من ناس بعيدة عنك .. الحاجات الغير متوقعة من ناس حكمت عليهم قبل ما تعرفهم كويس .. الناس اللي بيفهموك غلط في الوقت اللي انت محتاجهم يفهموك صح .. احساسك بالوحدة و انت وسط لمة .. احساسك بعدم الانتماء للمكان اللي انت فيه .. الخوف .. التوهان .. الظلم .. عدم التقدير .. لما تحب حد قوي و تحطه في أولوياتك و تضحي بحاجات كتير عشانه و هو مش معبرك اصلا .. لما الناس البعيدة عنك تفهمك من نظرة عينيك و القريبين مياخدوش بالهم .. لما حد يفرحك بحاجة صغيرة .. لما تتكلم مع حد و يقول حاجة توصف وجعك و تبص بعيد عشان ميلمحش الدمعة اللي في عينيك .. لما تحس ان كلهم مزيفين .. لما تكون مش عارف تنام من التفكير .. لما تيجي على نفسك اوي و تلومها و هما اللي غلطانين .. لما تساعد كل الناس و متلاقيش حد يساعدك .. لما تحاول تفرح حد بحاجة بسيطة و في الاخر ميقدرش .. لما تتكلم مع ربنا لانك متأكد انه هو الوحيد اللي عارف نيتك ايه .. لما تسمع آية توصف حالتك و تحس ان ربنا معاك و بيساعدك دايما .. لما تفتكر حياتك زمان و توحشك نفسك القديمة البسيطة .. ساعتها بتحس انك اتغيرت.
____________________________________
كتبت الخاطرة هذة المرة بالعاميّة .. أيهما تفضلون الفصحى أم العامية؟
أنت تقرأ
11:11
Randomأكتُبُ كُل ما يَجُول في خَاطِري .. وبعضٌ مِما أشْعُر بِه. - خَواطِر وقِصَص قَصِيرة ..
