رشة عطر

٩

طبعا انا المره دي احساسي كان مختلف حسيت بأنو مازن ده بكذب علي عشان يستفزني وحبيت اتأكد اكتر قبلت علي نفسي اني امش حنتو وفعلا من
جيت خاشه كده وبعاداتنا وتقاليدنا العريس بختو ليهو حنه في رجلينو والزغاريد والدلوكه وعرس عديل كده بس ده
كلو يا جماعه وانا مذهولة ومطيره عيوني ما قادره اصدق لمن شافني
قدامو ملامح الفرح الفي وشو راح وبقي بعاين لي قعدت لي في كرسي حق بلاستيك كده بالطرف وكان مكسور وانا ما منتبهه وطق لقيت نفسي واقعة في الارض كل الناس الفي الحنة ضحكو علي ياساتر انتي ما بتشوفي ؟؟ مازن عفص الحنة حقتو لا هماهو العرس لا غيرو وجاء مسكني من يدي وقال لي انتي كويسة؟
اغرب موقف مر بي في حياتي عمري ما بقدر انسي الاعين الفضوليه الكانت بتلاحقني بالنظرات الاستفزازية الكثير من علامات الاستفهامات والتطفل وفي وبقو يجوطو
كيف عريس يقوم من مكانو قاليهم البت وقعت ولا زول فيكم يتبرع يرفعها ماف العرس ده حقي وانا عمري ما حأرضي زول تتهان كرامتو في حاجه تخصني
الموقف ده خلي مازن يكبر في نظري شديد
طبعا ما كنت فاكره انو الموقف ..... حيكون وراهو نتايج كارثية بعد ثلاث ايام
سمعت انو العروس قالت ما دايره مازن ده لأنو تصرفو بدل علي انو في حاجه بينا او انا عامله ليهو عمل
اها للمره التانيه العرس فركش ومازن خلاص استلم عملو والامور
عادية جدا بالنسبه لي والحمدلله انا عال العال بمش جامعتي ومع الاسف ما انتبهت لدراستي بصوره جديه الا في سنة رابعة اتندمت علي الثلاثه سنوات المرت علي بس دايما اتعلم اني ما اندم علي حاجة راحة اكتر حاجه محيراني الشخصية الغريبة الاسمها مازن بس كثيرا بقيف ضد الفضول القاتلني وبقول في حاجات في الدنيا لازم تبقي زي ما هي من غير ما نحاول نعرف ماهيتها
يوم كده قاعده سرحانة جاني اتصال هاتفي من نجلاء . اتخلعت لمن شفت رقمها اتكلمت معاها شويه كده واطمنت علي اخبارها وصحتها حسيت بي صوتها ما طبيعي قلت ليها نجلاء مالك
صوتك متغير كده قالت بنتها مريضة عندها
انميا وحالتها كل مره ماشه اسوء كل يومين كده كنت بتصل عليها قالت لي البت عيانه وساقوها المستشفي حاالتها كانت خطره بعدها رجعت لي قالت لي البت ماتت والله ما قدرت اتمالك نفسي
وكان لازم امش لنجلاء حتكون دي الزياره
الاولي لي بعد ما هي رحلت
ما كلمت ابوي ولا اي زول من بيتنا بالمشية حقتي واتوجهت علي بيت نجلاء ,
#يتيع