رشة عطر

٨

كنت حاسه بي شرايين الدم الفي جسمي
بقت عباره عن شرايين سموم مليانه حقد مشيت ليها في مكان عملها
فريده كانت بنت متخرجه من سنه وبتقضي الخدمة الوطنيه في مكان قريب من بيتنا موصلات وحده ولقيت نفسي حصلت
لقيتها طالعه وقفتها قلت ليها أنتي فريده قاالت لي ايوه بس معليش ما عرفتك؟؟
عاينت ليدها لقيتها لابسة ليك دبلة قلت ليها مبروك الخطوبه بس تصدقي إنو مازن
ده ما بستاهلك والله انا حاسه كأني افعي سامه بتنفث السم الزوله دي مليتها ليك كلام لمن قعدت في الشارع وبقت تبكي كان في عذاب ضمير من جوة ونداء للتوبه بس عنادي ومكابرتي ما
خلوني شايفه حاجه قدامي رجعت البيت حاسه بي انبساطه خسيسة كده
وقلت خلاص انا انتقمت من مازن ده
مرت الايام ومازن اختفي من حياتي تماما
يوم الاحد كانت النتيجة الثانوية
ما بين خوف وارتباك طلعت نسبتي ما كويسه شديد كل البقدر اقولو أنو نتيجتي نضيفة كنت متردده هل ارجع امتحن مره تانيه ولا اواصل دراستي بالقروش ابوي لمن عرف نتيجتي ولأول مره احس انو ابوي
بقارني بهبة اختي اختك اشطر منك اختك خشت الجامعه بنسبتها اختك متفوقة
والله انا زهجت شديد بس الحاجه الحلوه
أنو هبة بتحاول تخفف علي اللهجه الحاده
الكان بكلمني بيها ابوي عشان ما يكون في فجوه بينا بعد حوارات ابوي
قال حيقريني خاص في احد الجامعات
جاني احساس بأني ثقيلة علي ابوي وحادفعو كتير
هبة كانت قريبه مني بس بالرغم من كده
حاسة بي وحشه وحزن بعد
ابوي تم لي الاجراءات التسجيل للجامعة في عز حيرتي دي اتصلت علي نجلاء
سألتها من احوالها واخبارها قالت كويسة
بس في مكالمتي وصلني احساس غريب كأنو دي ما نجلاء البعرفها .... قالت لي
يا ريم أنا قررت أني احتفظ بالطفل وما حأجهضو لانو برئ ما عندو اي ذنب عشان
يدفع ثمن غلطه ارتكبتها أنا والزفت حسين
(الولد الاصفراني داك ) وحأكرث حياتي لطفلي وباب الرجال ده أنا قفلتو خلاص
طبعا أنا اتخلعت والله من كلامها ده
قلت احتمال الوحده لمن تحس انها شايله روح داخلها احاسيسها تتغير وختمت مكالمتي معاها وانا مندهشة شديد
لمن سألتي من اخباري ما كلمتها بالعملتو في فريده تاني يوم الصباح انا وهبة كان ووائل اخوي مشينا السوق نظام ماشة الجامعه وملابس جديده وكده
في اثناء مشيتنا للسوق لاقيت مازن
اتحاشيت اني اعاين ليهو في عينو الملانه
شرار قال لي يا ريم زحيت من اخوي شويه عشان ما يسمع كلامنا قال لي حرام عليك يا ريم أنا عملت ليك شنو؟؟
ده كلو عشان اعتبرتك أخت وشلت مسؤوليتك والله لساني التقول اتعقد ما عرفت ارد عليهو ولا بحرف قال لي ما تردي مالك ساكته !!؟ انا لسه ما خسرت فريده ... علي فكره ريم أنا حابي اقول ليك
كلمة واحده بحقدك وحسدك ده عمرك
ما حتتقدمي في حياتك كلماتو دي بقت
زي الصدي بتتردد علي مسامعي بعد مكابده من الغصه الواقفه لي في حلقي
دموعي ديل زي المطر قلت ليهو مازن عاين لي نظره استحقار ومضي في طريقو وائل اخوي واقف قدامي قال لي يا ريم انتي بتعرفي الولد ده من وين؟؟؟
وقال ليك شنو خلاك تدمعي قلت ليهو احنا هسي في الشارع بعدين بحكي ليك بس توعدني انك ما تقول لهبة
ولا ابوي ولا اي زول اعتبرو سر بيني وبينك
قال لي سرك في بئر ومشينا السوق
وكلي هموم وغموم في واحد فردتنا في السوق انا ونجلاء . قال لي مالك ياريم شايله هموم ووين نجلاء طولت ما طلت علي وائل استغرب قال لي دي نجلاء السيرتها علي كل لسان إنتي علاقتك بيها شنوو ؟ والله حسيت نفسي في مكتب حق مباحث وتحريات قلت ليهو كانت بتقرا معي
وائل انا عيانه ممكن نرجع البيت ....
بس عاوزه وعدك يا وائل ما تقول لزول حاجه اختك حزينة شديد والله
وعلي كده رجعنا بيتنا الاسبوع البعدو كان أول يوم لي في المرحلة الجديده