رشة عطر

٢١

ما قادره اقرر في دوامة الافكار الرهيبه الانا عايشه فيها هل اتخلي عنو
هل اصارحو هل هل هل ؟؟؟؟؟
في ظل التساؤلات دي جاني مازن قال لي ياريم انا اسف والله وحقك علي
أنا حاسي بالذنب من ناحيتك لأني بحاول اجمل نفسي في عيونك .
انا اسف لأني زول ااناني انتي دايما بتحكي لي اي حاجه عنك وانا كنت بخبي عنك
انا اسف لأنك بسببي نزلتي اغلي دموع في الدنيا
سامحيني لأنو بسببي اهلي خاتين فجوة تجاهك
ريم انتي صديقتي قبل ما تكون زوجتي والحاجه دي انا مفترض ما اتجاهلها
سامحيني لأني كتير المتك .وجرحتك وبعثرت جواك صورتي الكانت في يوم جميله انا الليله مازن بكل ما يحمل من قبح
سكت مسافة قلت ليهو لا مازن رجائا
لو ما حابي تقول لا تضغط علي نفسك
عشاني انا والله مسامحك لو
ما مقتنع بأنك تحكي لي ما تعذب نفسك وتعذبني معاك انا خلاص حصلت مرحلت التعود عادي خبي اعمل اي شئ ما فرقت لانو وجودي وعدمو في حياتك ماليو اعتبار عندك انا احكي وانت تكتم انا ابوح وانت تمسك مازن انا قصدي اشيل معاك همومك عشان احنا واحد عشان ماتشيل الهم براك عاوزه اقيف معاك بس انت بتبعدني في كل مره
قال لي بالعكس يا ريم انا حاليا واقف قدامك وبكل قواي العقلية دي اللحظه المفترض انا اقول ليك كل حاجة بتوجع
بس ارجوك ما تنصدمي مني
مازن الانسان الجميل الشايفاهو قدامك ده
بتجمل عشان عاوز يتغير ويبقي انسان
انا زمان كنت مع شلة نشالين وحراميه
من سرقات وغيرها ما حأحاول ابرر ليك
اي تصرف من تصرفاتي لأنو شمس الحقيقه لازم تشرق برغم اني بسرق معاهم بس غدرت بيهم وكنت بسرقهم يعني "حرامي بسرق حرامي" الشرزمة
دي انا ما بعدت منها الا بعد ربنا كشفهم
في عملية كبيره ... انا ما كنت معاهم واتفقنا انهم ما يجيبو سيرتي
في التحقيقات وبعد مده السجن حقتهم
تخلص انا حأعوضهم بأموال طائلة ما كنت متخيل في يوم الزمن يعد بي ويجي اليوم الانا مفترض انفذ وعدي الوعدتو
زمان ما كنت حاسب حساب يوم زي ده
عذاب الضمير الكان عندي اقوي من اي شئ وبمساعدات من الطبيب النفسي الوديت ليهو اخوك ساعدني لأنو السرقة العندي دي كانت مرضة رغبه اني اتحصل علي اي حاجه ما حقتي"حب التملك" ايام فتره المراهقه وياكي ياريم شايفه وضعنا المالي .... الزول الاتصل علي ده من الشرزمه ديك وكان عاوز قروشو بعد ما طلع من السجن الكان ماسك القضية ياريم حمااي اللهو ابوكي
عشان كده اهلي بتصرفو معاك كده
وكان معاندين زواجنا عشان انتي ابنة رجل شرطة وانا زول مجرم ريم تصدقي انو المبالغ العاوزنها مني دي انا لا املك ولا حتي نصها عشان كده قررت ابيع البيت
اي تماطل مني في تهديد انو حيأزوك انتي
واي زول قريب مني القصه دي طولت ليها
سنوات مدفونة وماف زول عارفها
حتي احنا رحلنا من المكان الكنا قاعدين
فيهو عشان ننسي مرات الشخص بكون مضطر انو يسيب حاجات
كان بحبها ومتعلق بيها لأنو بتذكرو بماضي ما حابي انو
يكون معاهو في المستقبل عشان كده
ياريم كنت مستخسر حبك ده
انا انسان رخيص ما استحق حتي الاحترام
الانتي مدياني ليهو مساعدتي ليك من زمن الثانوية كانت بدافع الحب والخوف من اول وهله شفتك مع نجلاء كان عندي شعور ما قادر احددو وكميه حقت خوف عليك عاهدت نفسي اني اكون حماكي وسندك في الدنيا دي بهتم بكل تفاصيلك مهما كانت صغيره
حياتي كلها لا حبيت ولا كنت صادق وشفاف مع غيرك انتي ......
ريم ليك الحق الان انك تواصلي حياتك
مع مازن الكان حرامي وتقبليني بماضيا او انك تتطلقي مني
لاني بعد ما كنت نقطه بيضاء في حياتك
لطخطت ايامك كلها بالسواد افرضي علي اي عقاب اي حاجه عاوزه تعمليها
فيني انا ما معترض فيها لأنك نعمة من الله
وانا كفيت نعمتي بيدي مع الاسف انا كنت بعرف ابوكي لكن هو ما بعرفني انا هسي ضميري مرتاح لاني قلت ليك الكلام الكان لازم
يتقال من زمان . .
قعدت في السرير ما بين مصدقه وما مصدقه ما بين الوجع والصدمة اتلعثمت كل احساسي بكمية افكار ملخبطه منسابه في داخلي
قلت ليهو ونجلاء علاقتك بيها كان غير شريفة صاح وزيها كتير
قال لي كفاية ياريم انا صاح سئ وكنت حرامي بس عمري ياريم ما مديت يدي علي بنت الا انتي وبشرع ربنا ارجوكي ما تسيئ ظنك بطريقه تخليك تظلميني
ما حسيت الا بنفسي لبست توبي ورجعت بيتنا كملت الدموع ثلاثه يوم ما قادره احكي ولا اتكلم بي حاجة بعد تحانيس جاتني نجلاء حكيت ليها قالت لي ياريم انتي لازم تاخدي فترة نقاهة عشان تقدري تستعيدي نفسك وما تتخذي قرارات ممكن تندمي عليها طول العمر
وساعتها الندم ذاتو ما حينفع عندي اهلي في ارض المحنة "الجزيره" والوقت داك كان داخل علينا الشهر الكريم مشيت قعدت
معاهم قرابة الشهر مازن ما حاول يتصل علي لأنو متأكد اني حأجرحو اكبر
جرح كان ليهو لمن اتخليت عنو في عز
همو .......
رجعت بيتنا بعد فتره غياب بنفسيات انسانة
بتحاول تتعايش مع حياه اسود وابيض ما فيها اي لون قاعده فيها
جسد بلا روح صاح عايشة وبتنفس
بس من جواي انسانة جامده واحاسيس ميتة
بعد ما وصلت بيتنا المهم اطمنو اني كويسة كان لازم اضع النقاط علي الحروف واقرر حأعمل شنو !؟
هبة جاتني قالت لي يا ريم الليله الواحد
بيعصي ربنا ولمن يتوب ربنا بغفر ليهو
فمالك انتي انسانه ما قادره تسامحي اتعلمي الغفران ولا أعلمك انا؟؟!!
ريم لاول مره حأقيف ضدك عشان ارجعك لوعيك انتي انانية مازن الحرامي ده رضي بوحده مدمنه وهو عارف كده كويس لو اتطلقتي حتكوني متطلقه
مرتين ودي ما كويسة في حقك ياريم راعي لنفسك شوية عليك الله
وبعدين كده حتعيدي نفس الغلطة العملها عباس فيك أتذكري دي ما اتقبلك بماضيك وطلقك
انتي كده فرقك منو شنو "بنبره حاده شديد "
ريم اتعلمي ما اي شئ في الدنيا كامل لانو
الكمال لله ......
وكيف انتي تسمحي لنفسك تعاقبي انسان
بحاجه حصلت في الماضي وكل الانتي بتعملي فيهو ده ما بغير شئ
ريم لو اي زول بمسكوه بماضيهو الدنيا دي ما كان في زول حيحب ليهو زول او يتمسك بيهو ماضي لانو راح وما حيرجع حيجي يوم
وتتذكري كلامي ده وحتندمي بتمني انك تسامحي قبل فوات الامان ريم مازن بحبك وشاريك والا ماكان صبر عليك السنين دي كلها بس خليك فاكره انا
ابديت كل ما في نفسي يا اختي الغاليه ريم" وانتي بعد كده ادري بمصلحتك اول مره تتكلم معاي بحده ونبرات فيها نوع من القسوة
كلام اختي هبة الحاااار ده قطع لي قلبي من الوجع بتعرفو احساس الوجع بس انا
كنت موجوعة شديد لاول مره احس
نفسي ضعيفة وما قادره اقيف
ملامح الطفولة الفي وشي طمسها لي الحزن والهم والسهر .
وروحي الحلوة خلاص شاخت قبل اوانه
فجأه كده وبعد شهر من التهميش جاني اتصال من اخت مازن الكبيره
قالت لي ياريم لمتين حتبقي كده
حاولت اتقاطم معاها بس قالت لي
اسمعي عائلتنا اتعرضت لحادث حركة
ومازن كان اصابتو بليغة ولسه الحال في حالو كلمتك لانك في النهاية زوجتو
ومازن ما عندو سيره غيرك من وقت خليتيهو غايتو الله يسامحك قلبتي كيان عيلة كاملة مازن كاتب وصية طويله عريضه لو هو اتوفي كلها عنك انتي
في الساعه دي حسيت بخفقات قلبي بتذيد خوفت اموت وما اشوفو او هو يموت خوفت شديد عليه
قلت ليها طيب دقايق انا جاية المستشفي مشيت وانا ما فاهمه اي حاجة من الخلعة اول مره اعرف اني بحبو للدرجه دي
لقيت ناس في عنبر ببكو بكاء حار طوالي
خشيت فيهم مازن مازن
فجأه جاتني اخت مازن قالت لي يا بنت انتي جنيتي ولا شنو .؟؟؟ المات ده ما مازن ده راجل تاني شوية قلبي ارتاح لمن حصلت لقيت مازن واقف بكرعينو شكلهم
مخرجنهم من االمستشفي من شفتو نفسي اقول ليهو يا زوجي العزيز مشتاقين بس الكبرياء الما ليهو لزمه ده خايفاهو يخرب حياتي
قال لناس بيتهم خلونا شوية كده
قلت ليهو بس يا مازن احنا في مستشفي وده ما وقت للكلام انا جايه اطمن عليك وماشيه قال لي والله ياريم انا خايف من جيتك دي وفي نفس الوقت خايف من
مشيتك ما عارفه الحصل علي شنو
بس كنت مصممة إني امشي قال لي
خليك عارفة من بعدك يحرم علي الحب لمن اموت واندفن تحت التراب
اصلي حاليا ميت بس لسة ما سكت القلب الكلو نبضة بتنادي ياريم ريم انا بحبك 🌸😪
قلت ليهو اسمعني يا مازن انا مسامحاك ومن قلبي بس انا وانت محتاجين فترة
نرتب فييها ارواحنا من الارهاق ده
ولا شنو ؟؟؟
قال لي شنو يا ريم خلاص طيب تصدقي إنك بكلامك ده نفضتي لي الغبار الكان
مالي صدري وضويتي لي العتمة الفي حياتي عاينت ليهو مسافة قلت ليهو
انت في فترة نقاهة بطل كلام كتير يلا فتك عافية وعلي كده طلعت منهم لمن مشيت بيتنا كلهم اتلمو فيني "هبة وابوي وائل" شكلك كده احسن من أول
ابوي قال لي ياريم الولد ده عاملك عمل ولا شنو مشيتي مهمومه ومغمومه وهسي فرحانة وعينك بتلمع من السعاده
يا عيني عليك يا مازن المهم هسي اخدي راحتك في التفكير واحسمي الصراعات النفسية دي ياريم دي اكبر فرصة تؤكدو
فيها حبكم الصادق واوعك تغلطي تخلي زوجك البتحبيهو سامعاني يا بنتي
قلت لأبوي انا عاوزاك في موضوع وعشمانه فيك يابا تساعدني ؟؟
ابوي قال لي لو طلبتي عيوني ياريم بديك ليهم
اديتو الرقم الكان جاتني منو الرسالة
وحكيت ليهو الحكايه الحاصله كلها ساعات وجابو لينا خبر الراجل الكان مهدد مازن . من ابوي اتدخل في الموضوع
الراجل خاف وسافر مكان تاني واتنازل عن اي قرش
مرت علي ايام في بنات من الحلة فاكرني اتطلقت وحدات جايات يشمتن فيني ووحدات بعرضن لي بالكلام من كترت الكلام ابوي قال لي لو ما رجعتي بيتك برجعك انا .في نفس اليوم العصرية مازن جاء بيتنا
بعد قعده طويلة مع ابوي واخوي . . . . ابوي ناداني
قال لي ياريم تعالي .... مشيت في ابهي طلة لي سلمت علي مازن قال لي ياريم
بقيتي سمحه خلاص حأتشاكل معاك كل يوم لو الشكله بتخليك كده انا جاي اسوقك بعد كده فتره النقاهة دي خلاص انتهت ولا ما كده يا عمي !
ابوي قاليهو ريم زوجتك من حقك تسوقها في اي وقت انت عاوزو ..... حمدلله امورنا اتسهلت ورجعنا البيت لقيت اخواتو البسمه لي أخر ضرس ويضحكن ويتونسن الحاجه دي انعكست علي نفسياتي لدرجه انو حسيت بثقه في نفسي وضقت طعم بسمة طالعه من جوووة القلب يومنا داك
عديناهو مع نسابتي برغم الموقف ده الا
انني ما غيرت راي في اني اسكن سكن
مستقل عنهم بعد رجعنا بيتنا اتكلمنا في حاجات كتيره كان محتمه علينا مرات بنحتاج نبعد عشان نعرف قيمة بعض مازن في عز بسمة الا انو في نبره انكسار فيهو
قال لي تصدقي اني شايل هم البيت الحأبيعو ده قلت ليهو لا يا مازن ما حنبيع حاجه المشكلة اتحلت من وقت ابوي اتدخل فيها ومن ساعتها حياتنا مستقره
التفهم والمناقشات المثمره هي البتوصلنا لحلول والمحبة بتستمر دائما اذا كان الاطراف متمسكين ببعض من جانب اخر زوج امي حس بالوجع السببو لينا طول حياتنا وحاول انو يعوضنا بس ما فلح لانو عرف الحاجه دي متأخر ومتأخر شديد طبعا الكلام ده بعد الصادق ولدو اتجرأ واتكلم معاهو انا عن نفسي كنت قاسيه ما سامحتو لأنو بالنسبه لي
غلطو ما بغتفر مهما حصل ماف حاجه زي الام وانا كنت بأمس الحاجه ليها وهو حرمني منها
وحمدلله ربي انعم علي بثلاثة اطفال وزوج محب زي مازن .
القصة دي مرت سنين طويله عليها ودي من مذكرات حياتي هسي اولادي كبار ماشاءالله خالد محامي ومريم طبيبه واسعد باش مهندس قدر الدنيا رشة العطر الكانت في حيااتي اسعد لأنو اول شعور بالامومه في حياتي
عيلة صغيره بس جوانا تفاصيل فرح
مفصله بالمقاس علينا ونجلاء صحبتي اتزوجت حسين بعد صراعات بينهم اتحسمت لصالح زواجهم ويمكن دي اكتر صديقه متواصله معي حتي الان .......
واحلا حاجه ابوي بقو يقولو ليهو يا"جدو"
هبة اختي راجلها سفير بقيت بشوفها في السنه مره اها مع السلامه ياها واقفه في الباب
#شكرا__لكل_المتابعين
لنا لقاء في روايات اخري
#فطوم_الهادي الساعه؛39؛.10م
الموافق 3سبتمبر 2015

*الطلاق شتات للاطفال قبل ما يكون راحه للاباء
*الماضي ما مفترض يأثر في الحاضر لانو
احنا بنعيش في اليوم وليس في الامس
*الصاحب ساحب
الثقه بالذات اهم دافع للنجاح
الانكسار لا يعني النهايه بل بدايه البداية ....
الاموال لا تعوض الام
القسوه لا تمثل الرجولة "ذياد" مرات بنحتاج لمواقف تحرك مشاعرنا عشان نعرف حجم الحب الشايلنو بين قلوبنا