رشة عطر

١٣

هبة قالت لي اها ياريم نتصرف كيف في الورطة دي .... قلت ليها يا هبه انا ما عندي
راس افكر بيهو ما عندي اي افكار حاسه بنفسي ملخبطه لخبطة شينة
هبه __ طيب ياريم شنو رايك نخلي مازن ده يتكلم
معاهو لأنو احنا لو واجهناهو اقلاها حينكر الموضوع ومن موقع الهجوم حيبقي علي الدفاع وحيسألنا احنا عرفنا كيف
وفي النهايه احنا الحنطلع غلطانين اخوي وائل زول لماح وبعرف يطلع كيف من اي موقف بعد فتره كده الباب ضرب لقيتو
ده عباس جاء من الشغل يدوب قطع علينا كلامنا هبه نبهتني اني ما احكي ليهو حاجه عن مشاكلنا الخاصة مرات بجيني شعور بالذنب ناحية عباس ده لأني بعاملو زي غريب مع انو مفترض يكون قريب وجهو
كان بشوش قال لي ياريم عندي ليك خبر
حلو اكيد حتفرحي لي وشكلو هبة اختك
كراعها بارده علينا قلت ليهو خير فرحنا معاك قال لي انا اتنقلت من مكان شغلي لشغل احسن في المصحة البعالجو فيها المدمنين اتهجمت هجمة
احترت اقول ليهو شنو !؟ كلمه مبروك استخسررتها
فيهو كده الزول ده حيعرف ماضيا
ويا عالم الامور ممكن تحصل وين
هبة اتلافت الموقف وقالت ليهو ماشاءالله
يا عباس والله عجبنا لييك قاليها تسلمي
وانتي ياريم مالك قال ولا ما عاجبك
بتلعثم شديد قلت ليهو ومعقول ما يعجبني اي حاجه بتفرحك اكيد بتفرحني بس من جواي حاسه نفسي كأني بدعي الفرح وكلامي ده كلو مزيف ما صادقه نهائي معاهو والفرق العمري ده كان ورطه انا فيني روح الشباب المندفع وهو واصل مرحلة النضج والعقل ... تحس بي جادي كده لدرجة الملل جاتني عقده نفسيه تاني يوم من الصباح هبة رجعت بيتنا وطوالي بدأت اتصالات مع مازن والزول ده وافق انو يتكلم مع وائل يوم العصر كده مازن لاقي وائل في الشارع وبحكم انو في معرفة قديمه بينهم المهم الجلسه الاولي اخد واعطي معهو في الكلام ومع مرور الزمن وائل اتعود يقعد العصرية مع مازن اها وبحاول يدردقو في الكلام بس وائل حريف
ولا كلمة ما نطق بيها مازن قاليهو
بلبل ومجاهد
علاقتك بيهم شنو يا وائل ؟؟؟
وائل سكت مسافه كأنو السؤال ما ليهو
مازن كرر عليهو السؤال انت علاقتك شنو بي بلبل ومجاهد ؟؟؟
طوالي وائل وقف علي حيلو قاليهو انت مالك ومالي خصاك في شنو خلي عشان اتونست معاك يومين ثلاثه يبقي خلاص من حقك تقحم نفسك في حاجات ما بتخصك طبعا مازن لمن جاء حكي لي قال لي اخوك ده مكابر شديد ومن ردة فعلو دي قدرت احدد علاقتو مع الشرزمة دي .... بس يا ريم اخوك ما حيكابر كتير اكييد حتجي اللحظه الحيصحي فيها ضميرو بس بتمني ما تكون اللحظه دي بعيده هبة كانت مراقبه تصرفاتو في البيت
وبتدينا المعلومات اول بأول ...........
اها مرت اسبوعين علي الحال ده
وائل مشي لمازن في المحل البقعد فيهو واعتذر ليهو عن التصرف حقو وكده
قاليهو يامازن اانا ما عارف الجابني عليك
شنو بس حسيت بيك خلاصي الوحيد
انا الفتره الفاتت دي كلها بنوم وبصحي علي كوابيس واحلام مخيفة وحاسي بي خوف شديد ما عارف لشنوو انا خلاص انتهيت انا وانا وجسمو كلو يرجف مازن قاليهو
عاين يا وائل اذا سمعت كلامي واعتبرتني اخوك الكبير ماف عوجه بتجيك ولو حاسي بأي حرج انا عندي صحبي اسمو دكتور حمد الماحي دكتور نفساني وبعالج كل المشاكل فلو ما عندك مانع انا بمش معاك والله يسهل الأمور وائل بعد تفكير عميق وتردد واضح قال لي مازن انا موافق ان شاءالله باكر انا كنت متواصله مع مازن وبوريني بكل المستجدات الحاصله اول بأول بدون كلل او ملل وحسيت انو خلاص في بصيص امل
في حياة وائل اها مازن دبر ليهو موعد
مع الدكتور وائل خش علي الطبيب طبعا الجلسة الاولي الطبيب لازم يكسب ثقة الحاله الجاياهو وبدأ يعرفو علي نفسو
وشويه يضحك معاهو عشان يشيل جو
التوتر الحاصل ده بعد جلستين ثلاثه وائل اعتاد علي الدكتور مقابلاتهم كانت بتكون خارج العيادة لانو الدكتور شاف كده احسن
اها بدأ وائل يحكي ليهو عن بلبل ومجاهد
وعن فطرتهم الغير سليمه ورغباتهم المريضه وممارستهم لجريمة اللواط اللي وائل اقحم نفسو فيها ...... وبعدها صارت حياتو غير صحيحه متخذه منحني الخطر الدكتور قاليو يا وائل تسمح لي اقول ليك
يا ابني لأنك في مقام ولدي طبعا الدكتور
بقدر المستطاع بحاول يخلق جو من الثقة والألفه قال ليهو يا وائل الجريمة دي بقت منتشره شديد وسط شبابنا مع الاسف ياوائل لو عاوز تتخلص من المشكله دي قبل ما تستفحل بيك خت الاعتبارات دي في راسك
الجريمه دي بتنقل مرض الايدز والامراض المنتقلة جنسيا بتسخط عليك غضب ربنا
انتهاك للحرمات وقوع في معاصي وكفر
اذي لنفسك عدم الراحه النفسيه ..... الخوف من اقل الاشياء غايتو الدكتور ده ماقصر
استخدم مع وائل كل وسائل الترهيب والمصايب الممكن تحصل عليهو
وائل قاليهو بعد صمت مضني با دكتور انا عأوز اتعالج عاوز اكون انسان تاني اعمل شنو .قاليهو لو فعلا عاوز تتعالج تسمع
كلامي ده كويس يا وائل واخلاص انك تنفذو
ما عشان خاطري انا عشان ربنا ما يغضب عليك اول امشي بادر بتوبه نصوحه لوجه الله وادعي ربنا قارن بين اللذه البتجيك
وبين العاقبه المنتظراك فكر بأنو الفاحشه
دي بتفوت عليك متاع الدنيا والاخره
اشغل نفسك بأعمال مفيده اقرا قران
ساعد ناس البيت يا وائل صدقني ده
حلك انت وكمان امش المسجد كتير
وشوف حلقات تلاوة وائل الكلام ده
كلو وقع ليهو في راسو وحسي بكميات
الخوف العندو قلت ....... بس ابوي
جاء فجأه عليهم وشكلو كان غضبان جدا