قاموس العشق للعاشقين

الأجندة الذهبية

في يوم من الأيام وجد نادر والده ياسين يطرق الباب...
-اتفضل
-ايه اخبارك يا نادر
-انا الحمد لله بذاكر والدنيا زي الفل
-سيبك م المذاكرة ،نادر انت ابني من صلبي يعني انا اكتر واحد هيحس بيك ،واحنا اتعودنا ع الصراحة
-بابا انا من كتر الموضوع مانا طالع فيه اهبل مكسوف اقولهولك
-احيانا بنحتاج نطلع هبل عشان نفوق... زميلتك آيه صح ؟
مذهولا: صح ...عرفت ازاي ؟؟!!
-اولا بالنظرات يا سيدي لما كنت باجيلك احيانا عشان نروح سوي ،والمود رينج اللي ظهر في ايديكوا في نفس الوقت ،والواد أحمد اللي من فترة لابدلها ومن سعتها وانت متغير
مبتسما: الله...ده انت عارف كل حاجه اهو
-يابني انت مفضوح، ده انت ناقص تحط مقاس بوكسراتك ع السوشيال ميديا ،المهم انا عاوز اقولك اننا مش بنتعلم ببلاش والمهم تكون اتعلمت انك تحكم ع الناس بعقلك قبل قلبك لان القلب ليه في الخيال واحنا يا نادر مسجونين في ارض الواقع ،جدك الله يرحمه لما كنت في سنك ،كان واقف مكاني وانا كنت واقف مكانك وقاللي نفس الكلام ،عشان كده لازم اقولهولك... هو وصاني يا نادر (تدمع عين المهندس ياسين ويحتضن ابنه نادر ويهم بالخروج):علي فكرة انا عرفت ان بحثك بيتكلم عن العلاقات العاطفية ودي غريبة اوي من الدكتور السنة دي ،المهم مكتبه جدك هتلاقي فيها كتب كتير عن المواضيع دي يمكن تساعدك ،وياللا قوم كلم سارة وابدأ بحثكو متنامش في الطريق وتعمل المجروح
(يغادر ياسين بعد مزاحه مع ابنه)...
تنفس نادر الصعداء وهو يمرر نظره علي المكتبة وهو يفكر: ياااه كان علي ايامهم لسه الكتب بتتعمل من ورق ومجلدات ،مش عارف جدي استخدم  ال(إي بوكس) ولا لأ،انا مستغرب اساسا ان مكتبه الكتب دي لسه موجوده هنا ،ولولا غلاوتها عند بابا كانت اتباعت اثار وسابت مساحة نحط فيها اي حاجة،الله يرحمك يا جدي...
ظل محدقا في المكتبة يقرأ مقدمات الكتب ويتركها مللا ،إلا أن وجد صندوقا صغيرا من الخشب مطعم بالأحجار الكريمة ومطلي بماء الذهب ،فتحه فوجد أجندة أوراقها مدهبة مكتوب عليها "عام 2015 " كانت حالتها جيدة جدا حتي مع مرور 50سنة ،طريقة الحفاظ عليها عنت أنها مهمة جدا وبعد أن بدأ بقراءة ما فيها قطع حبل أفكاره رنين هاتفه الخلوي...
-سمسم ايه الاخبار؟
ردت بغضب بالغ...
-تصدق إنك ماعندكش دم...ليا اسبوع باقول ده نادر اللي انا عارفاه وواثقة فيه وبكرة يعقل ويفهم
-استني بس
-استني ايه بس ،انت انسان اناني ومهمل
-ياستي مهمل وزي الزفت...حقك بس ده لو انا مش شغال بادور علي ماتيريال للبحث
-والنبي ؟!!!
-والله لقيت ماتيريال مش موجود غير عندي في العالم كله
-انت لسه بتتفرج علي الافلام الاوفر بتاعت بداية الالفية التانيه دي؟؟
-استني بس...قوليلي انك مش زعلانه وبكرة في الاكاديمية هفهمك
-امممم...مسامحاك بس مش اقل من شوكلاتيه 250جرام
-ده انا اجيبلك المصنع كله يا جميل
-احترم نفسك ياد
-ماشي يا برنس ...خلي بالك من نفسك يا سمسم .باي...
في اليوم التالي ذهب نادر الي الاكاديمية لأول مرة منذ فترة والضحكات التي إستضافها وجهه أخيرا تتلألأ في زهو ،وجدها جالسة علي منضدة تراجع مادرسته في بعض المواد و أمامها كوب قهوة وساندوتش ،جلس دون سلام وتناول القهوة عنها
( صاحت في غضب): ياغلس يا جزمة الهي تنزل في بطنك سم...
لم يرد ولكنه اخرج لوح شوكولاته من حقيبته وهو يكمل شرب القهوة...
تغيرت ملامحها الي اريحية مصطنعة: حبيبي يا ندورة والله مش عارفه من غيرك كنت عملت ايه 
-يا سلام مش كان سم من ثانيه
-مانت عارف اني ادعي علي ابو ندي واكره اللي يقول امين ...هات بقي
(وسحبت لوح الشوكولاته)
-ايه الاخبار ،فين ياعم كنزك اللي مش موجود غير عندك
-انا هاقوللك ،امبارح كنت غطسان في مكتبة جدي الله يرحمه بين رفوفها وكتبها
سارة مقاطعه:ايه؟!!! كتبها !! انت بجد لسه عندك كتب ورق كده تتمسك بالأيد
-حبيبتي المكتبة دي من 50سنة
-بلاش حبيبتي دي ياد ،المهم كمل
-المهم لقيت فيه كتاب مكتوب بخط اليد ومتحافظ عليه اوي ،المهم يا ستي لقيت مكتوب ايه في غلاف الكتاب؟
-لقيت ايه؟
-مقدمه جامدة هي اللي شدتني
-طيب ممكن تقول وتخلص عشان خلاص المحاضرة هتبدأ
-يا سلام يا ختي اجي الاكاديمية بكتاب ،عشان يقولو عليا متخلف والفيناتي وفيه اللي هيقولي ايه الكتاب ده يا جدو
-خلاص ماتأفورش، يعني انت زي قلتك في الاخر
-لا ياسطا انهاردة مستنيكي عندي في البيت
(بمزاح)-وانت عارف عني كده يا سافل .انا بتاعت شقق؟!!
-مين اللي بيأفور دلواقتي يا زفته ،اخلصي انا استأذنت من باباكي وهو عارف ان البحث بدأ واني مأخرك كمان ،اظاهر ان فيه حد تالت خالص بيجيب سيرتي بالخير كتير
لملمت أشيائها بسرعة...
-طيب الحق انا المحاضرة...يارا استنيني
نادر في سره:اه يا جزمه ماشي ...
خالد يأتي من بعيد مع زملاؤه
-ابو ندي السكرة
-خلود ايه الاخبار ...ازيكو يا جماعه
-ايه يابني ،اعتزلتنا؟
-وانا اقدر ده انتو الخير والفركة
-ياجماعه معلش ثواني عاوز نادر في حوار
(ابتعد مع نادر مسافه بسيطة وجلسا يتحدثا)
خالد:نادر بالله عليك انت كويس؟
-ربنا يخليك يا خالد والله الحمد لله
-بص...انا عارفك من امتي ؟
-من 3سنين
-عاوز اقوللك ان طول ال3سنين دول عمري ما شفتك بتبكي غير لما سيبتو بعض ،مهمة بالنسبالك يا نادر؟،انا ممكن اكلمها واصالحكو
-خالد احنا صحاب من 3سنين هل فيه مرة من المرات اذيتك في حاجة ؟
-عمرك...ده انا افديك بحياتي للي شوفته منك من صديق راجل بجد
-تخيل بقي انك لو عاوز تؤذيني، صالحنا يا عم خالد
-ياااه للدرجاتي ؟!
تدمع عينا نادر :اه للدرجه دي
-صلي ع النبي يا نادر...اناااا...انا اسف والله اني فكرتك
-مافيش مشاكل يا خالد ربنا ما يخليك تختبر احساس انك تصعب عليك نفسك
-انت عارف ان انا وانت ومحمود حسينا الاحساس ده قبل كده...بس فعلا المرة دي اصعب عليك يا نادر ،انت كان ممكن تديها روحك عشان هي تعيش حتي لو انت تموت...بس خلاص انسي اللي يبيع ،باعتك بالفلوس بيعها بالتراب
-انا الحمد لله اتخطيتها من زمان بس احيانا بافتكرها في مكان كنا فيه او وجبه اكلناها سوي او كلمه سمعتها في الطريق وهي كانت بتقوللها
-بص حواليك وانشغل بالدراسه وغير كده هتلاقي جمبك ناس كتير احسن منها ويتمنولك السعادة واجدع بمليون مرة منها ...الظاهر انها بتيجي ع السيرة ،سارة جايه اهه انا ماشي بقي زي مانت عارف مش بحب كلام ال(نيردز) ده، اللي اللقاء يا ابو ندي
(خالد ما مشيش عشان مش بيحب الكلام انا متأكد انه سابلي مساحه لانه عارف سارة مش بتكلمني غير لما اكون لواحدي)
سارة:طبعا عشان اصطبحت بوشك
-ايه...داخلة بزعابيبك ليه ؟
-السيكشن اتلغي يا فقري
-ده شئ جميل ،ياللا بقي نفطر سوا
-انا فطرت من زمان يا مهمل
-علي فكرة كان نفسي نفطر سوا ،علي حسابي طبعا
-امممم انا فطرت... بس مش هاقول لأ لساندويتش يعني
-طيب ياللا يا سمسم
-باهزر ...بجد والله فطرت ،انا ماشية دلواقتي وانت اقعد عشان سيكشنك
-اوووووه يا جاااامد انت ياللي بتتلغيلك سكاشن وبتمشي بدري
-يارب اوصل البيت سليمه من عيونك دي
-النهاردة مستنيكي كفاياكي اهمال واستهتار بقي
بضحكة هادئة انغلقت فيها عيناها...
-ماشي يا معيد...باي...