ﻛﻞ ﻣﺎ ﺗﻤﺮ ﺍﻻﻳﺎﻡ .. ﻭﺍﻟﺴﻨﻴﻦ ﺗﺘﻮﺍﻟﻰ .. ﺑﺘﺪﻱ ﺍﻻﻧﺴﺎﻥ ﺩﺭﻭﺱ ﻭﻋﺒﺮ ﻓﻲ ﺍﻟﺤﻴﺎﺓ .. ﻛﻞ ﻗﺼﺔ ﺗﺤﺼﻞ ﻗﺪﺍﻡ ﻋﻴﻨﻴﻚ .. ﺑﺘﻌﻠﻤﻚ ﻗﻮﺍﻧﻴﻦ ﻓﻲ ﺍﻟﺤﻴﺎﺓ .. ﻛﻞ ﺷﻲ ﻓﻲ ﺍﻟﺪﻧﻴﺎ ﻛﺎﻧﻪ ﺑﺘﻜﻠﻢ .. ﺍﻟﺒﺤﺮ ﻭﺍﻟﻨﺠﻮﻡ ﻭﺍﻟﺮﻣﺎﻝ ﻭﺍﻟﺠﺒﺎﻝ ﻭﺍﻟﺸﻮﺍﺭﻉ ﻭﺍﻟﺤﻴﻄﺎﻥ ﻭﻛﻞ ﺷﻲ .. ﻛﺎﻧﻪ ﺑﻘﻮﻝ .. ﺑﺎﻟﻠﻪ ﺍﻟﺒﺸﺮ ﺩﻳﻞ ﻣﺎﺑﻔﻬﻤﻮ ﺍﻟﺒﺤﺼﻞ ﻗﺪﺍﻣﻬﻢ ﺩﻩ؟؟ .. ﻓﻲ ﺣﺎﺟﺎﺕ ﻛﺘﻴﺮ ﻣﺘﻜﺮﺭﺓ .. ﻟﺪﺭﺟﺔ ﺑﻘﺖ ﻣﻔﻬﻮﻣﺔ .. ﺣﺘﻰ ﻟﻠﺠﻤﺎﺩﺍﺕ
ﺍﻧﻬﺎ ﻗﻮﺍﻧﻴﻦ ﺍﻟﻜﻮﻥ ﺍﻟﻌﺠﻴﺒﺔ ﻭﺍﻟﻤﻌﺮﻭﻓﺔ .. ﺍﻧﻮ ﺍﻟﺒﺸﺮ ﺑﺲ ﻣﺎ ﺑﺘﻌﺎﻣﻠﻮ ﻣﻌﺎﻫﺎ .. ﺯﻱ ﺍﻟﻜﺎﻧﻬﻢ ﻣﺎ ﻣﺼﺪﻗﻴﻨﻬﺎ .. ﻣﻊ ﺍﻧﻬﺎ ﻳﻮﻣﻴﺎ" ﺑﺘﺜﺒﺖ ﻟﻴﻬﻢ ﺍﻟﺼﺤﺔ ﻣﻦ ﺧﻼﻝ ﻗﺼﺔ ﺟﺪﻳﺪﺓ ﻭﺣﺪﺙ ﺟﺪﻳﺪ
ﻗﺼﺘﻨﺎ ﻣﻊ .. ﺧﻀﺮ ﺍﻟﻔﺮﻩ .. ﻭﺍﺣﺪ ﻣﻦ ﺍﻟﺸﺒﺎﺏ ﺍﻟﻜﺎﻧﻮ ﻟﻴﻬﻢ ﻓﻬﻢ ﻓﻲ ﺍﻟﺤﻴﺎﺓ .. ﻭﻋﻨﺪﻭ ﻣﺒﺎﺩﻱ ﻣﻌﻴﻨﺔ ﻣﺎﺷﻲ ﻋﻠﻴﻬﺎ .. ﺯﻭﻝ ﻣﻦ ﻋﺎﻣﺔ ﺍﻟﻨﺎﺱ ﻣﺘﺨﺮﺝ ﻣﻦ ﺍﻟﺠﺎﻣﻌﺔ .. ﻭﻛﺎﻟﻌﺎﺩﺓ ﺷﻐﺎﻝ ﺍﻋﻤﺎﻝ ﺣﺮﺓ .. 28 ﺳﻨﺔ .. ﻭﻋﻨﺪﻭ ﻓﻬﻢ ﻓﻲ ﺍﻟﺒﻴﺎﺽ ﻭﺍﻟﻨﻘﺎﺷﺔ ﻭﺍﻟﻜﻬﺮﺑﺎ .. ﻭﻏﺎﻳﺘﻮ ﺷﻐﺎﻝ ﺑﻤﺎ ﺭﺯﻕ ﺍﻟﻠﻪ .. ﻣﺴﻤﻨﻮ ﺧﻀﺮ ﺍﻟﻔﺮﺓ .. ﻻﻧﻮ .. ﺟﺮﺍﻱ ﺟﺮﻱ ﺷﺪﻳﺪ ﻓﻲ ﺍﻟﻜﻮﺭﺓ .. ﻋﺸﺎﻥ ﻛﺪﺍ ﻣﺴﻤﻨﻮ ﺍﻟﻔﺮﻩ .. ﻭﺍﻟﻔﺮﺓ ﺩﻱ ﻃﻴﺮﺓ ﺧﻠﻮﻳﻪ ﺑﺘﺸﺒﻪ ﺍﻟﻘﻄﺎ .. ﺳﺮﻳﻌﺔ ﻓﻲ ﺍﻟﻄﻴﺮﺍﻥ ﺷﺪﻳﺪ
ﺯﻭﻝ ﻛﻼﻣﻮ ﻛﺘﻴﺮ .. ﻟﻜﻦ ﻃﻴﺐ ﻣﻦ ﺟﻮﻩ .. ﻭﻧﻀﻴﻒ ﻭﺻﺎﺩﻕ
ﻣﺸﻜﻠﺘﻮ ﺟﻨﻮ ﺑﻨﺎﺕ .. ﻭﻣﺸﺎﻛﻠﻮ ﻣﻊ ﺍﻟﺒﻨﺎﺕ .. ﻻ ﻟﻴﻬﺎ ﺍﻭﻝ ﻭﻻ ﻟﻴﻬﺎ آﺧﺮ .. ﺍﺻﺤﺎﺑﻮ ﻓﻲ ﺍﻟﺤﻠﺔ ﺗﻼﺗﺔ .. ﻭﻣﺸﻬﻮﺭ ﺑﻲ ﺣﺎﺟﺔ ﻭﺍﺣﺪﺓ ﺍﺻﻼ" ﻣﺎ ﺑﻜﺬﺏ .. ﻟﻮ ﻗﻄﻌﺖ ﺭﺍﺳﻮ .. ﻣﺎ ﻣﻤﻜﻦ ﻳﻜﺬﺏ
ﻭﻋﺸﺎﻥ ﺍﻟﺼﻔﺔ ﺩﻱ ﺑﺎﻟﺬﺍﺕ ﺧﻀﺮ ﺍﺳﺘﺤﻖ ﺍﻧﻮ ﻃﺎﺭﻕ ﺍﻟﻠﺒﻴﺐ ﻳﻜﺘﺐ ﻋﻨﻪ ﺭﻭﺍﻳﺔ .. ﻻﻧﻬﺎ ﺻﻔﺔ ﺍﺻﺒﺤﺖ ﻧﺎﺩﺭﺓ ﻓﻲ ﺯﻣﻨﺎ ﺩﻩ
ﺍﻫﺎ ﻫﺴﻲ ﻗﺎﻳﻢ ﻳﺘﻮﺿﺄ ﺩﺍﻳﺮ ﻳﺼﻠﻲ ﺻﻼﺓ ﺍﻟﻀﻬﺮ .. ﻭﺍﻣﻮ ﺑﺘﺘﻜﻠﻢ ﻣﻌﺎﻫﻮ ...
ﺍﻧﺖ ﻳﺎﺧﺪﺭ ﺍﻟﻠﻴﻠﺔ ﻣﺎﻟﻚ ﻣﺎﻣﺸﻴﺖ ﺍﻟﺸﻐﻞ ..
ﻗﺎﻟﻴﻬﺎ : ﺷﻐﻞ ﺷﻨﻮ ﻳﺎﺣﺠﺔ؟ ﺍﻧﺘﻲ ﻗﺎﻳﻼﻧﻲ ﺍﻧﺎ ﻣﻮﻇﻒ ﻭﻻ ﺭﺟﻞ ﺍﻋﻤﺎﻝ؟ ﻣﺎ ﻳﺎﻫﻮ ﺷﻐﻞ ﻋﻠﻰ ﺑﺎﺏ ﺍﻟﻠﻪ .. ﻳﻮﻡ ﻧﻠﻘﻰ ﻭﻳﻮﻡ ﻣﺎﻧﻠﻘﻰ ﺍﻟﺒﺎﺭﺡ ﻓﻲ ﻭﺍﺣﺪ ﻗﺎﻝ ﻋﻨﺪﻭ ﺷﻐﻞ ﻓﻲ ﺍﻟﺠﺮﻳﻒ ﺷﺮﻕ .. ﻭﻗﺎﻝ ﻟﻲ ﺑﺘﺼﻞ ﻋﻠﻴﻚ ﺍﻟﺼﺒﺎﺡ ﻭﺍﻧﺎ ﻫﺴﻲ ﻣﻦ ﺍﻟﺼﺒﺎﺡ ﻣﻨﺘﻈﺮﻭ .. ﻣﺎ ﺩﻕ ﻋﻠﻲ
ﻗﺎﻟﺖ ﻟﻴﻬﻮ : ﻃﻴﺐ ﺍﻟﺘﻠﻔﻮﻥ ﺩﻩ .. ﺍﻟﺼﺒﺎﺡ ﺿﺮﺏ ﻛﺘﻴﺮ .. ﺍﻧﺖ ﻛﻨﺖ ﻧﺎﻳﻢ .. ﺍﻣﻜﻦ ﻳﺎﻫﻮ ﺯﻭﻟﻚ ..
ﻗﺎﻝ ﻟﻴﻬﺎ : ﻻﻻ .. ﺭﺍﺟﻌﺖ ﺍﻻﺭﻗﺎﻡ ﺍﻟﻀﺮﺑﺖ ﻟﻲ .. ﻣﺎ ﻳﺎﻫﻮ
ﻗﺎﻟﺖ ﻟﻴﻬﻮ : ﺍﻧﺖ ﻓﺎﺿﻲ ﻣﻦ ﺍﻟﻨﻮﻡ .. ﺗﺴﺎﻫﺮ ﺍﻟﻠﻴﻞ ﻛﻠﻮ ﺗﻈﺒﺰ ﻓﻲ ﺍﻟﺘﻠﻔﻮﻥ
