التوضيح القصه اخذت شهرين اتاكد من صحتها
الاتصال بصاحبة القصه كان صعب وكل مره بطريقه تختلف وحاولت قدر الامكان عدم التوضيح غيرت الاسماءوالاماكن والولايات بناء على طلبها
متابعه ممتعه
#ضحايا١#
#زينب_الموسوي#
في اللحظه الاخيره
احملني معك كجواز سفرك
لاتدعني اقاسي بعدك
يانجمي الراحل يا. كل ذكرياتي
لاترحل بدوني
القصه حقيقيه اخرى عن الوضع العراقي ومامر به اكثر العراقيين من صعاب وكما عرفتوني سيكون للمراءه دور البطوله في القصه فمأسي العراق كلها حلت واستوطنت على رووس العراقيات
السلام عليكم اختكم عشتار من سكنة بغداد بس الاصل ديالى اعرفكم على عائلتي
عبدالله والدي عالم اثار ومشرف في المتاحف العراقيه
نضال والدتي معلمه متقاعده
دلال اختي الكبيره حصلت على منحه دراسيه في روسيا قبل سنين والتقت بشاب عراقي وتزوجته وبقوا هناك بعد سنه طلبت اختي جنائن بمعاملة زواج لشاب عراقي بروسيا ايضا اني ملحگت عليهن مااتذكرهن
جمال اخويه الكبير متزوج وطالع مدرس
ضياء طالب اخر سنه كليه اهليه اعلام
عشتار اني صاحبة القصة اصغر وحده بيتنا كان دائما هادي مابيه صوت ضياء على طول مع اصحابه وماما وبابا كبار بالعمر لو يتفرجون تلفزيون لو نايمين مرات من يزورنا جمال واطفاله يصير البيت بيه حيويه
باحداث القصة كنت ناجحه للسادس اعدادي واروح دورات ضياء يوصلني وارجع مع صديقاتي جنه وفرح مكنت شاطره بس انجح والموبايل كان عالم الي الجأ اله دائما حتى اكسر الصمت في بيتنا مافي عندي تفاصيل بحياتي تختلف عن حياة بقية البنات الي بعمري رغم الوحده الي اعانيها صديقاتي بيوتهم بعيده نحجي بالموبايل وابتعدت فتره عنهم بسبب معظمهن كانوا عدهم اصدقاء شباب (مكبلات )فما عدهم وقت الي السوال ليش اني ممكبله الجواب اخويه ضياء فتحت عيني للدنيا هو يحب هاي ويترك ذيچ يحلف لهاي باليل احبج واموت عليج ويقسم لذيج مااشوف غيرج انتي الحب الوحيد بالنهار ومن يسد الموبايل يعلق شگد لزگه ماعدچن اهل يربوچن زين هو ماعنده اهل يگولوله اعراض العالم الها حرمه لذلك خليت حولي الف سور وسور صعب شخص يتخطاه كنت احب الاطفال وامنيتي بيوم من الايام اصير ام لذلك كنت اروح لبيت اخويه جمال حتى العب مع اطفاله ومرات احس زوجته تتضايق بس ماعندي غيرهم گرايبنا المقربين كلهم بديالى
المنغص الوحيد كان اخويه ضياء هو كان اكبر هم بحياتنا اصدقاء منعرفهم منين طلب الفلوس ميخلص
طلعات وسهر لوجه الصبح وبنات كل يوم اسم وحده اسمعه يكول الها بالتلفون انتي مرتي انتي عرضي
ضياء كم مرة عندك الله يخليك ترى حتى الملوك والسلاطين مسواها
كم مره گايلج لاتسمعين تلفوناتي
بالعكس خلي اسمعك حتى اخذ عبرة واعرف مستوى الچذب وين وصل عند الولد
شوفي (عش )هذا مختصر اسمي
لاتصدگين بولد ابد حتى لو يتزوجج هم يبقى يچذب
وليش تجذبون متگلي
هذي طبيعه عدنا انتم البنات مو تحبون المكياج والشعر والملابس وتعتبروها وسيله للغش احنا هذا الچذب وسيله للانتقام من غش البنات النا
هسة اخر زوجه عندك شاسمها
وحده تكول اسمي فوفو
وين اكو وحده اسمها فوفو تلگه اسمها فليحه هاي تاليتك فليحه يبووو انت طالع طلعني وياك والله ضايجه
عندي موعد ويايه اصدقائي عندج التلفزيون وتفرجي
مليت من التلفزيون وديني لبيت جمال وباجر الصبح تعال اخذني
لج انتي متفتهمين اليوم خميس هذا يوم المتزوجين العالمي شعندج رايحه گاعده على گلب جمال ومرته
لعد وين اروح فرني عشر دقايق بالسياره ورجعني والله اختنگت
باجر اخذچ وعد اطلعج للمول
والله تاخذني للمول احلف بداعة فليحه
وداعة فليحه الي ماعندي حبيبه غيرها بس ١٦وحده باجر اطلعج
هذا روتين حياتنا لكن مااستمر هذا الوضع
في يوم بعثه دوليه للاثار زارت موقع اكتشفوا بيه مجموعه من الاثار وهذي البعثه موجوده للتاكد من صحة هذا الكنز التاريخي والدي كان معاهم يطلع ويرجع تعبان طلع تقرير بفضائيه عراقيه
والدي تعالي عش اليوم راح اطلع بالتلفزيون صوريني ودزيه للبنات
بابا ليش مااتصل بيهن ويتفرجن
الفرق بالتوقيت بابا هسه نايمات
طلع بابا يحجي عن الاثار واي زمن تعود وقيمة الاثار
كان فرحان مرت يومين اجاه اتصال من مكتب احد المسوولين يريد يقابله
والدي اكيد راح يكرمنا هذا المسؤول معروف باهتمامه بالاثار وانسان مثقف واذا انطاني تكريم راح اخطب لضياء وارتاح من مصايبه
ماما ابو دلال اذا تريد تزوجه اخذ ذهبي وخلي نشتري راحة البال خايفه من لعبه على بنات العالم يذبنا بمصيبه سوده
الله كريم انشاالله اشوفله بنيه من اهلنا وازوجه
راح والدي للقاء احجيلكم عن اللقاء
دخلت على المسوول حسيت بالبرد من قوة السبلت بمكتبه سلم عليه وطلب مني طلب غريب
استاذ عبدالله اتاكدتوا من الاثار يكولون كلها كنوز وتحف
اتاكدنا والبعثه اكدت يرجع للدوله السرجونيه وقيمتها متتقدر
استاذ عبدالله تعرف الوضع بالعراق ونخاف تنسرق هذي الكنوز
تگدر الدوله تخلي حمايه لحد منخلص تنقيب وننقلها للمتاحف ونسويلها ارشفه
اني عندي اقتراح افضل انقلها لمكتبي وتحت حمايتي وكل المطلوب منك موافقتك توقيعك بس وتاكد راح اكون حريص عليها
بس هذا ميصير الاثار مسووليه الوزاره وراح يسالوني عنها باي حق اسلمها الك
طول النقاش والدي افتهم المسؤول يريد يستفرد بالكنوز وباوراق رسميه رجع منهار للبيت وعلى الغدا سمعته حجى لماما
يهددني بالسجن الحرامي
ماما وانت شگتله
شگتله خبرت الوزاره وهمه يتصرفون وياه
اسالك سوال بابا هذا المسوول شراح يستفاد من كم تمثال وكم طاسه مزنجره
عش هذي اثار وتهريبها صار تجاره رائجه
مر اسبوعين كل ميرجع والدي حديثه هو الضغوط عليه وبدوا يهددونا
ماما عش بعد لاتطلعين للدورات انخاف عليج ابقي بالبيت لحد تفض ويه ذولي الي ميخافون الله
انشاالله ماما مدام هيج لاتگعديني الصبح خليني نايمه
بقيت بالبيت واتصل بصديقاتي وبليلة خميس بدل ضياء وتحضر يطلع مع اصدقائه
واني بقيت على التلفزيون سهرانه
انطفت الكهرباء انتظرت تجي المولد واصعد انام
صعدت لغرفتي ورا عشر دقايق سمعت صوت رياجيل جوى وسمعت صوت ماما تصيح
نزلت الدرج نزلته واني ارجف شفت ماما بالصاله تملخ بشعرها وتحاول تتصل اديها ترجف
باب المطبخ مدفوع ومفتوح
ماما شكو شصاير بابا وين
ولج اخذوا وهو نايم شالوه شيل
منو اخذوه ماما
اني ادري ضربوا على راسه واني خلوا المسدس براسي حتى مااصرخ وطلعوا
اتصلي بجمال وضياء يجوون
المن يجوون لايجوون خلي ينهزمون انوب الرجال او ولده
لعد نبقى لوحدنا افرضي رجعوا علينا اتصلي بضياء
جاوب ضياء وينك ضياء يمه
لاتجي للبيت ابوك اخذوه
وجمال بلغه نفس الشي
هذي تاليت الي يعاند الكبار
صعب تبقى شريف بنص بلد يحكموه فساد
وسط الحيره وقلة الحيله عدت ليلتنا اني وماما بالبيت نبچي ونخاف ليطلع صوتنا اخواني يتصلون يريدون يجوون ياخذونا ماما متقبل تخاف عليهم الساعه اربعه الفجر وگفت سيارة ضياء رحت افتح الباب شفت في سياره ثانيه يم بابنا منتظره ومن نزل ضياء اجوي عليه اخذوه شافني باوع عليه وگلي فوتي جوى وقفلي الباب
حبست الصرخه داخلي ورجلي ماعادت تحملني داخل البيت
وصلت شبه مشلوله
ماما اخذوا ضياء بسياره شفتهم
راحوا بابا وضياء
ماما هنا ماتحملت ظلت تصرخ
يله عش البسي ملابسج وننهزم هسه يجوون علينا همين
ماما اخاف. اطلع والله گلبي راح يوگف اكيد حيرجعون علينا لان شافوني
امشي بسرعه يله ندك الباب على يحيى جيرانا ياخذنا يم جمال تحركي بسرعه انطيتها ايدي حتى تسحبني لان الخوف مقيدني طلعنا دگينا الباب على الجوارين ماعرف شبينا بس اخذنا بسيارته
خاله ام دلال اكو شي صاير الحجي وين سيارة ضياء هذي بالباب اخاف تتباك
يمه بس وصلنا الله يستر عليك واذا سالوا علينا لاتنطي العنوان
منو الي يسال عليكم خاله
عصابه خاله عصابه خطفوا الرجال وابنه وصلنا لبيت جمال دخلتنا زوجته ام مصطفى
اريد احجي مااگدر من يصدك ناس امنين ابيتهم ويدخلون عليهم
ام مصطفى الله يخليج شويه مي مااگدر اكوم اشرب ورياگي يبست
سوده عليه عشتار وجهج اصفر وشفتج بيضه على كيفج اهدي ماكو شي انشالله
ماعرف شلون طلع الصبح عيوني من اغمضها تاذيني من البچي والسهر
جمال راح اطلع ابلغ الشرطه لازم اسوي بلاغ يمه تسمعيني
مكانت ترد فاتحه عيونها بس مترد اديها ورجليها ميبسات حملناها لسياره جمال وام مصطفى وياها واخذوها للدكتور. بقيت مع اطفالهم اتمنى انام وسوال محيرني الي ديصير حقيقه وبابا وضياء راحوا لو يرجعون
وشنو الجريمه الي ارتكبها بابا
زهراء بنت اخويه بقت تبجي گمت اسويلهم ريوك اديه متاخذ على الشغل سويتلهم اي شي بس حتى يسكتون تمددت عاى القنفه ونمت
ورا ساعتين انفتحت الباب
رجعوا من الدكتور ومفهمهم ان عدها صدمه عصبيه نتيجة الخوف
ماما حبيبتي تعرفيني تگدرين تحجين ويايه اني عش ماما خليني انام على حضنج والله خايفه
اخذتني بحضنها وهي تنحب وتبجي
طلع جمال وبلغ الشرطه واجوي حققوا ويانا
ماما گدرت تحجي وياهم بس خفنا نجيب طاري الاثار والمسوول
ماگدروا يقدمونا شي واحنا مانعرف شلون نتصرف نفكر ومنوصل لنتيجه
باليل جمال اخذنا كلنا لبيت اهل زوجته وهو راح يم صديقه وبقينا بس التلفونات بينا
وكان يتصل بالجوارين يسالهم
في احد سال علينا
يجاوبون لا
مر علينا اطول تلث ايام بحياتنا يوم الاثنين اتصل يحيى بماما وبلغها الحجي رجع للبيت ومريض وتعبان وتلفون ماعنده اجي اخذكم
ماما لا يمه احنا جايين يمه صدوك تحجي انطيني اسمع صوته
حجيه والله تعبان ودخل للبيت واني اتصلت بيكم
خبرنا جمال ورجعنا للبيت اول مفتحنا الباب
بابا دنگ ويبجي حضناه كلنا وهو يبجي
ضياء راح ضياء راح
ماما شتحجي ابو دلال وين ضياء
بابا عدهم رهينه لحد مااترك العراق يتركوه
ماما ليش نترك العراق شمسووين
بابا وقعت على الاوراق واخذوا الاثار وانطوني تلث ايام اترك العراق وينزلون خبر بالفصائيات سرقه الاثار وهروب الموظف المسؤول وضياء رهينه لحد انفذ
جمال يابه عرفت منو همه نبلغ الشرطه الدوله متايهه
بابا همه الدوله كلها
بابا انت شفت ضياء حجيت وياه
بابا لا بابا عش بس خبروني هو عدهم
اني باجر اسافر لسوريا وانتي وامج تبقون هنا ادبر امروي وتجون ورايه
ماما اني مااطلع اذا مااشوف ابني ضياء ابني جيبولي ضياء انعل الاثار لا الجابنا عليهم كله منك انت لو مطاوعهم خايف على شويه طين وحجار هو البشر بالعراق ماله قيمه وانت خايف على اثار
ظلت ماما تعاني نوبات عصبيه وانهيار
مرت اليومين طلع بابا من العراق لسوريا
طلعت الاخبار ان والدي سارق الاثار وعنده عصابه للتهريب وتورط ولده ضياء بالموضوع ومر اسبوع نحاول نعرف ضياءوين مسجون ماگدرنا
والدي كان يتصل احسه ميت وهو يحجي ويانا اول واخر سواله عن ضياء
بعد عشر ايام اتصل بينا محامي وفهم جمال ان هو محامي منتدب من المحكمه عرفنا ضياء مسجون بتهمه سرقه اثار
