#ضحايا_١٣
#زينب_الموسوي#
تركتوني المحققين بغرفه لوحدي افكاري مشوشه صعب اركز اول مره اكون بهذا الوضع وزواجي الاول عبالك ذراع اخطبوط داخل حضيض كل مااحاول ابعد يرجعني
دخلت بعد ساعتين حنين بيدها اكل وچاي
اكيد جوعانه واعرف عراقيه تحبين الجاي
منو اله نفس ياكل بعد الي سمعته منكم اكو واحده تسووي الي تريدوه اترك زوجي المريض واختفي من حياته والله الموت ارحم ولا لحظه يفكر تركته ومليت منه وچماله ارجع للقتل والجرائم واشهد ضدهم
عشتار اعتبريني اختج هذي مخابرات اقوى دوله بالعالم يعني اذا اقتضى الامر بصور مفبركه لزوجج يطلگچ او سياره مسرعه وحادث يموت بيها وتصيرين ارمله وانتي تدخلين سجن بامريكا تعرفين السجن هناك شنو يوميه يزفوج لوحده من المسجونات الشاذات والمدمنات تعرفين نزيلات السجن اذا عرفن بيج مع داعش ياكلن من لحمج وانتي حيه
اني مو بداعش
لا بداعش متزوجه منهم وتطبخين للمجاهدين وتنظفين تلمين بقايا جثث الضحايا وتاخذين فلوس وذهب لو تحبين انس لاتورطيه بجرائمج لاتصيرين غبيه نعرف شنو مرض زوجج مو فد رجال حتى متمسكه بيه في غيره
عمت عينچ انس رجال وغصبن ماعليج
اذا تحبيه ساعديه لاتخلينا نستخدمه ورقه ضغط عليج
تريدون تقتلوه يعني انتم هم عصابه ماكو فرق
لچ ناخذج لامريكا وهناك تبدين حياة جديده
مااريد حياة بدون انس واهلي وحتى بلدي بعد مااگدر ارجعله طلعوني منا
متطلعين ابقي معانده يطبج مرض وهذا تلفونج عندي هسه اتصل بيه واگله عشتار ويه واحد ثاني ومن يسمع يجوز ينتحر او يترك العمليه لج فكري هو عافج وراح منو گال يبقى عليج
اعرفه يحبني وميتركني
يطبج مرض ظلي هنا وتاليتج بالسجن داعشيه
تركتني وطلعت واخذت الاكل وياها صار اليل هسه انس يتصل والبنات يدورون عليه ياربي شلون شنو الحل
بقيت اليل كله افتر بالغرفه واسمع اصواتهم برى والجوع مزق احشائي بچيت ونمت على الارض حتى حمام مخلوني ادخل
الصبح رجعت حنين كومي داعشيه راح نسلمج السلطات ونطالب بسجنج لحد ناخدج لسجن بامريكا
حرام عليكم تعرفون مو داعشيه اني
شسويلج اذا انتي عقلج محجر بياحياة متمسكه اهلج الي تركوج زوجج الي سافر يتعالج ولج هاي فرصه
ماعندي مانع بس تجمعوني بانس ورا مااشهد خلوني اسافر وياه لالمانيا او جيبوه عندي لامريكا
انتي راح تشهدين ضد عصابه خطره وراح يعرفون الي شهدت عايشه بامريكا والناس من تشوفج فجاءه وصلتي لامريكا تبدي التساولات حولچ
اذا رحتي يمه رجال العصابه باوربا راح الناس تحجي شلون حصلتي لجوء. وحصلتي اقامه رجلج اكيد هسه حجى مرتي كانت عند داعش وشافت وصورت راح يحجي لاصدقائه وبيومين تنذبحين
جيبوه لامريكا وياي
المشكله انتي لم قدمتي للامم المتحده كتبتي ارمله وطشيتي قصتك. بكل مكان الناس راح تحجي وانس عنده اصدقاء مسولفلهم وهذي ملفات سريه والعراقيين العايشين هنا عرفوكم وكل واحد راح يحصل لجوء بلد مختلف وكل واحد يسولف بكيفه اي شخص راح يشوفكم بامريكا اثنينكم راح يعرف ويسال شلون اجتمعتوا بامريكا
العالم انملى لاجئين حنين اخيتي انتي راح نكول اني حصلت لجوء بامريكا وطلبته
الله يخليج اهلي ميخالف انساهم بس انس احبه والله ويحبني هسه يمكن التلفون حرگه عليه اتصالات
شوفي عشتار اني اتفق وياج اتفاق سري محد يعرف بيه اني وانتي بعد متخلص القضيه وتسافرين اساعدج تجتمعين بانس بامريكا اشوف طريقه ما وعد هذا
ياطريقه اذا راح تنگطع اخباري عنه راح يتصور تركته ويكرهني
راح اجيبلج التلفون وتكتبيله رساله بس بدون متفهميه شي زين گوليله راح اختفي انتظرني
خلي اخابره احسن هو باجر عمليته سوده عليه
لا اتصال لا
رساله وبعدها تنطيني التلفون ترى دا اخاطر علمودج
جابت التلفون
طارت الكلمات مني شگله فدوه خلي اتصل بيه وباجر وهو بالعمليه ادزله رساله
يله اني اوگف بالباب
كان متصل بيه والبنات متصلين
اتصلت عشتار وينج الف مره اتصلت وام احمد تگول عند الدكتور من البارحه لليوم اتصل ماكو
انس حبيبي باجر عمليتك لاتشغل بالك بيه وانشاالله معافى ياضوى عيوني
شبيج عشتار ليش تبجين
مابيه شي تدري اني شگد احبك تدري لو لا
ادري حبيبتي واني احبج اكثر
مرات الظروف تخلينا نسوي اشياء مجبرين عليها الي اريدك تعرفه ومهما صار ومرت الايام اني احبك ومرتك وراح ابقى مرتك على طول
اذا خايفه من العمليه فطماني الاطباء يگولون سهله
انشاالله سهله عيوني انت انس انتظرني لاتتركني ولاتتصور تركتك ولا تصدگ اخونك لو اعوفك
لا انتي اليوم داخله بدور فلم هندي شبيج يمعوده انتي انتظريني
انتظرك لاخر يوم من عمري راح اروح بس موبيدي ومراح اعوفك والله وغلاتك مع السلامه
مع السلامه باجر بعد العمليه اخابرج
لاتخابر ارتاح اني ادزلك رساله والله وياك واشوفك بخير يارب
يارب
انطيتها التلفون ودخلت نوبة بكاء لحد صار صوتي مسموع الكل دخلوا ويسالون حنين شصار
مصار شي ودعت زوجها وراح تتعاون ويانا
كنت بالارض وماده رجليه وضامه وجهي بين اديه
نزل هذا المسوول عليهم ونصى عليه
لاتخافين احنا وياج فكري بالضحايا الي سمعتي صوتهم يستنجدون
فكري بيهم وهمه مدفونين احياء
فكري بقطع اجسادهم تنباع وتشترى
عشتار هذي مهمه انسانيه بشهادتج راح توگفين تجاره راح ضحيتها الالاف الابرياء احجيلج قصه واحد من الضحايا كان اب لبنات اثنين ارمل تعرف على فتاة اوربيه بالنت وراح يلتقي بيها سافر مع بناته تركهم بالفندق وراح يشوف حبيبته الي كانت. عضو بالعصابه واستدرجته وباعوا اوصاله وبناته تنتظر بالفندق
عشتار انتي راح تنقذين بنات وشباب من هذي الجرائم
كل الي تريدوه اسويه بس انس مااگدر اعوفه اوعدني تساعدنا
اوعدج بس احنا عملنا منفصل عن دائرة الهجره يعني مو مثل الدول العربيه الكل يعرف المخابرات شتسوي لكن انطينا وقت نرتب الامور
اول خطوه تحجين بالتفصيل لمحامي. الي شفتيه كم عدد الناس الي شفتيهم المواقع الي يدفنوهم بيها
وبدت رحله التعاون مع المخابرات الامريكيه
انطوني استماره
املي هذي الاستماره وكتبي الاسم ااجديد الج
ماعندي اسم انتم اختاروا حنين گالت
سموها نغم يلوگلها هذا الاسم
خلص نغم راح تطلعين هسه على فندق يسكنون بيه موظفين السفاره والقنصليه خلال اسبوع راح نكمل ملفج بهذا الاسبوع متتصلين باحد متطلعين ابد لحد تسافرين
اريد اعرف اخبار عملية انس باي طريقه
المسوول جاوبني عدنا وكلاء هناك راح نسال عليه ونعرف الاخبار بدون مااحد يدري
طلعت بسياره سوده مظلله وصلت لفندق الغرفه مجهزه بكلشي احتاجه وحنين وياي
شگد صارلج تشتغلين ويه المخابرات
١٢سنه والدي كان يشتغل معاهم وماعرفنا هذا الشي الا بعد مامات كنا نتصور يشتغل بالتجاره ويسافر من بلد البلد من توفى الاستخارات حبت تكرمه انطوني شغل عندهم وبحجه ادير تجارة والدي
متزوجه انتي مطلقه وعندي ولد
الله يخليه الج تحبين ابنج
اغلى من روحي تصوري فد يوم احد يگلج تخلي عنه وننطيج الجنه وبعد متشوفيه تقبلين
سكتت وباوعت عليه
حنين اني تعذبت هواي انهارت حياتي. بالعراق بلحظه وكنت بالسادس اعدادي مات اخويه بدون ذنب ماما وبابا فقدوا الاحساس بالحياة ناصر طرق بابي وفكرت ولد شاب راح يحبني يدللني ويسولف ويايه على الاقل
الي شفته على ايده مستحيل واحد يتصوره حبسني وكان ينتهك جسمي وكرامتي ليليه عاقبني باهلي اليه ليليه ماانام اذا مافكر وين صفوا عشت بوسط وحوش ومجرمين وقتلى
ماعرفت شنو حب غير ويه انس ماعندي غيره احبه تعرفين شنو احبه
ردت عليه كل هذا الحب وهو عاجز
الحب ماله علاقه انس عوضني مشاعر واحترام ولو يبقى عمره كله عاجز ابقى وياه واحبه وعندي الدنيا بكف وهو بكف
اخاف ساحرلج هذا يمعوده انتي بعدج زغيره والف واحد يتمناج
الف ذولي خليهم الج. ممكن اسالج سوال طليقج كان سليم مابيه شي اكيد
اي كان ثور وحيوان
لعد ليش ماحبيتيه اذا الحب عندج رجال ينام وياج ليش اني ماحبيت ناصر وهو كان ثور مثل طليقج ليش في ارامل تظل عايشه قصة حب مع ازواجهم حتى بعد الموت
الحب هو الانسان الي يمسح دمعتج بايده ويظل مكابلج لحد يتبتسمين
الحب هو الانسان الي اول ميدخل البيت يصيح اسمج عشتار وينج حياتي هذا انس الي كان يوصل للدوام يتصل عليه عشتار اليوم الجو بارد البسي جاكيت من تطلعين صدگيني لو تحبسوني سنين بطولها ارجعله لاتخوفوني بالموت اني شفت الموت وعشته الف مره
حنين ساعديني اذا تحبين ابنج
راح اساعدج بلي اگدر عليه
احلفي بابنج بغلاته عندج
وغلات ابني وليد شمعة عيني اساعدج تلتقين بانس
