ضحايا_١٦
#زينب_الموسوي#
بعد مرور شهر من الاتصالات بانس كنت استخدم التلميح حتى يفتهم مثل من يسالني شلون وصلتي لامريكا
اجاوبه اعمامي قدمولي معامله
وقبل اي اتصال ادز رساله راح اتصل مو تحجي وهو همين نفس الشي تعودنا على السريه
بعدها صار قرار من جماعتي انتقل لولايه مزدحمه ونقلت بديت اخذ راتب منهم واشتغل بمكتب محاميه امريكيه وكانت عندي سياره
عرفت من ام وليد بدوا يتصلون بانس ويمهدون لوصوله عرفت منها مفهميه يترك المانيا بقطار لدوله مجاوره ومناك ياخدوه هنا عرفت حصلوا اوراق لدخوله ومفهميه يقطع اتصاله باصدقائه واهله بالعراق معارض واتصل بيه عصبي
تعرفين يريدوني اترك ناسي واهلي
ديربالك ابو محمد لاتحجي تفاصيل
ترى هاي ماطلعت لاتحجي لاتكول مااريد اجي ابقى بالمانيا انتي تخليتي عن كلشي لان ماعندج اهل اصلا اني اخواتي واخواني اصدقائي
واضح صاير عصبي بعدين نتصل باي
اول مره يجرحني بكلمه ماعندج اهل
كلامه بمحله لو اهلي موجودين ماصار كل هذا
اتصل بعد عشر دقايق
زعلتي مو بالله
لا ليش ازعل ماكلت شي غلط ماعندي اهل غيرك انت
اسف عشت.... محروم اگول اسمچ
واني همين مثلك هانت حبيبي لاتصير. عصبي وتضوج لازم في طريقه نتواصل ويه اهلك وناسك ولاتنسى اني بحاجتك
انشاالله حبيبتي بس خايف يگولون تعال نغير شكلك همين
ههههه انت كمر بعد شيغيرون
يسووني ميس كمر
هههههه ميخالف هم قابله
الامر المطمئن ان انس ماذاكر اي قصه عني لاصدقائه وكل الي گايله زوجتي بامريكا بقية القصه ممتطرقلها
وباتصال وياه سالت عن وصال وعسل وام احمد
أگولك بنات خالي طلعوا من تركيا لو بعدهم
البنات المخطوبات طلعوا تهريب وصلوا لازواجهم وكل الي جهزوه من ملابس وغيرها تركوا بتركيا لان طالعات تهريب
خطيه بس المهم اجتمعوا ويه ازواجهن
والمره الچبيره ام الجهال باقيه وتقنع بزوجها يرجع لتركيا لان ملت وهو منتظر مقابله اذا رفضوا هالمره يرجع
الله يساعدها تعبت هواي
سألوا عليج هواي وتواصلوا ويايه اشهر وهمه يدورون بعدين شكوا بذاك النذل مشعول الصفحه اهله خاطفيچ
خوش تحليل
منطوك خبر شوكت تجي يمي
لا وانتي متعرفين
مااعرف بس دارتب الشقه حتى من تجي ترتاح بيها
والشقه الي راح تريحني ها مو بالله
اي شي يريحك كولي واسويه
انشاالله بس اجي نتفاهم واعوضج عن كل العذاب الي شفتيه احنا ماتهنينا حياتنا انسلبت منا بس وعد مني انسيچ كل هم شفتيه
بقينا سبع اشهر ننتظر بين موافقات وكفاله وموافقه امنيه لحد مليت وفقدت الامل وانس كل شويه متعارك ويايه ويردد مليت وفضيها خلص صبري
واتصل بام وليد تگولي مابيدي شي انتظري ومرات مترد اتصالي
كنت بالدوام واتصلت بيه
ها نغم شخبارج
شعجب اليوم مخابره انتي حتى اتصال متجاوبين
مااجاوب لان ماعندي اجابه لسوالج هسه عندي
شنو عندج راح يجي ابو محمد
المفروض مااگول بس حبيت تسمعين الخبر مني باجر بالتسعه باليل يوصل
صدوگ تحجين انتي احلفي
وداعة وليد روحي استعدي وانتظريه
رايحه الله يخليج ويخلي وليد ويسعدج يارب
اريد اشوفه هذا ابو محمد الخاصبتني بيه وأحاچيه اگله شگد تحبك
تعالي علينا وشوفيه هي طياره تصيرين يمنا بس لاتجين باچر
انشاالله حبيبتي محتاجه شي كولي
لچ راح اموت گلبي من هسه يرجف باي اروح اخذ اجازه
حجيت مع المحاميه وخبرتها زوجي جاي انطتني اجازه اسبوع
وبديت احضر كلشي وانتبه على نفسي اسوق واضحك انظف وارتب اضحك
اتصلت بيه كان فرحان اكثر مني
تصدگ باچر نتشاوف
غير يجي باچر حتى اصدگ
انطوت الساعات والمسافات والتقينا اني وانس بالمطار شفته صار الخطوات ثقيله هو ميگدر يركض لان رجله واني مااگدر لان گلبي يرجف كنت امشي باتجاهه وبالي كل سنين العذاب والمرار الي شفتها
واعدت نفسي من هذا اللحظه اعيش حياتي من جديد مع انس الي اول موصلت يمه مسح دموعي قبل ليبوسني
الدقائق الي بعده صعب تنوصف بكلمات
لحن حب عزفته گلوبنا وغنتها شفايفنا وادينا
ماتذكر الكلام الي گلناه وبالسياره ماگدرت اسوق
مااگدر اسوق انس
لخاطر الله سوقي ولاتگولين الشقه بعيده
لا قريبه ربع ساعه
لچ عشتار ممصدگ والله
وصلنا شقتنا باوعت بعيونه نظراته كلها حنيه ورغبه اليه
خلص الليل نرتشف رحيق الحب حد الامتلاء
وبين الخجل والاشتياق عشت احلى ليله بحياتي
سولفت كل الصار.
وحجالي عن العذاب الي عاشه وهو يتصور تركته او انخطفت او قتلوني
الصبح صحيت على ريحه الچاي
شدتسوي من الصبح
داسوي چاي بالكمب ماعدنا شغل وعمل باليل غير نسهر ونشرب جاي
اكولك انس تعرف لازم نتعود على اسمائنا الجديد وننسى القديمه
صحيح نغم حبيبتي ام العدسات
مقبوله منك فواد ابو محمد
ترى اسم فواد كلش مراهم وين لگيتيه هاي الاسماء شگد
انت فؤادي وروحي
خلينا نعتبر ليلة البارحه بدايه النا ونكتفي بعضنا ونكون اهل واحد للثاني
بدايه جديده حبيبي اثنين عراقيين التقوا بالغربه البارحه بالمطار وحبوا وتزوجوا
بدينا حياة جديده وضع انس خطواته الاولى على طريق تاسيس حياة جديده هنا انتمى الى جامعه يعادل شهادته ويشتغل ويسوق
واني اشتغل استقرينا بهذي الولايه وعدنا علاقات محدوده
اتصاله باصدقائه القدماء معدوم
اهله يتصل بيهم كل مره من رقم مختلف وفهمهم اسمه الجديد
تعرفوا عليه وعرفتهم ميختلفون عن انس بالحنيه والطيبه
انس اكتفى من العمليات برجله اليسرى ورضى بقدره وحتى الاطباء نصحوه يتركها مثل ماهيه خوفا على الاعصاب والشرايين من التلف
بعد شهرين يصير سنه من اجتمعنا سوا
عندي اتصال بام وليد ويتم تقييم وضعي الامني كل فتره حرصا على حياتي وحياة زوجي وابني القادم
القصه نقلتها للكاتبه عن طريق رساله مكتوبه بخط الايد وصلتها بدون عنوان ومتعرفني ولا ملتقين سوا ومن خلال متابعتي للبيج حبيت اشارك قصتي
الى اهلي
رغم النعمه والسعاده الي عايشتها الان والمواساه الربانيه بزوج عطوف وحنون
ورغم الالم والخوف والعذاب الي شفته بحياتي
يبقى عندي جرح نازف اسمه اهلي لذلك اختم قصتي بكلام موجه الكم
بابا وماما اذا كنتوا عايشين اتمنى الكم السلامه وطولة العمر ومسامحتكم لكن تخليتوا عني باصعب وقت بحياتي واذا كنتم انتقلتم الى رحمة الله فانشاالله موعدي وياكم بالجنه
اخويه الي سميته بالقصه جمال
اعرف في شخص من عائلتك يتابع هذي الصفحه ومن الاحداث عرفتني
اتمنى مايجي يوم وتعيش وحده من بناتك الي عشته ومايتخلى واحد من ابنائك عن اخته مثل ماانت سويت
الله يحفظك
شكرا لكم على المتابعه
زينب الموسوي طريقة الاتصال كانت تختلف من فتره لاخرى وعلى مدى اشهر مااحب اذكر تفاصيل الاتصالات حفاظا على سلامتها
وهذا نموذج من نماذج الضحايا
بالعراق
