ضحايا_١٤
#زينب_الموسوي#
بعد ماوعدتني حنين تساعدني وصلتني اخبار ان انس طالع من العمليه والاطباء منتظرين النتاىج بعد عشر ايام الاخبار عرفتها منهم المخابرات توسلت بيهم اتصل بيه
حنين فدوه لعينج انسان مريض واكيد يتصل عليه وميحصلني فدوه بس اسمع صوته
راح اخليج تتصلين من تلفوني كلمتين بس
فدوه لعينج كلمتين بس
اخذت التلفون حسبت كم مره دگ مجاوب
مديجاوب يمكن تعبان ونايم سوده عليه
بعد نص ساعه دگيت جاوب
الو انس حبيبي شلونك صحتك
كان يحجي بطء
وينج عشتار شنو قصتج ام احمد تگول انتي ماموجوده بالبيت وتلفونج متجاوبين
تعاركت ويه البنات وطلعت من الشقه ولگيت سكن
وتلفوني ضاع هذا تلفون البنيه الساكنه وياها
وليش تعاركتي وياهن
ساعه شيطان من نتصالح احجيلك انت شخبارك صحتك
تعبان والبنج مديروح تاثيره والعمليه الاولى نجحت بعد عمليه لازم ورا فتره لان هذي زراعه دقيقه تحتاج وقت
خير انشالله حبيبي
اشتري تلفون واتصلي بيه عشتار اني مااگدر واكثر الوقت نايم
انشاالله لاتشغل بالك حبيبي مع السلامه
محتاجه فلوس اوديلج
محتاجه سلامتك والله
عشتار مشتاقلج هواي
واني اكثر والله انشالله نجتمع عن قريب
ليش تبجين تعرفين مااتحمل
خلص مراح ابجي دير بالك على صحتك
وانتي ديري بالج على نفسج ولاتضوجين الله يفرجها
انشاالله
اطمئنيت على انس وصار موعد سفري حضرولي اوراق باسم نغم وبملابس جديده اخاف احد يعرف ملابسي
ونقاب حتى محد يعرفني بالمطار
دخلت الطابور الواگف لوحدي
خايفه ولو ساليني سوال واحدابچي
الصوره الي بالجواز بدون نقاب المفتشين طلبوا اشيل النقاب شلته باوعوا ونزلته
الجميع كان معي حاجزين لكن منمشي سوا ولانحجي سوا
كانت الرحله متعبه وطويله عندي وقت كافي استعيد ذكريات حياتي صار اربع سنوات من طلعت من العراق يوميه مصبيه وطريق مجهول يمكن هالمره موتي واخلص
حنين كانت بالمقعد المجاور
راح تروحين على ولاية ....... في شقه جاهزه اي شخص من الجوارين تتعرفين عليه اسمك نغم دخلتي امريكا قبل سنه وكنتي بولايه وسكانسن وتحولتي حتى تدرسين وتشتغلين
راح تدرسين لغه بمعاهد وتشتغلين مع شخص نعرفه من جهتنا عنده مطعم اني صديقتك المقربه وراح تدخلين دورات سياقه هذا الي تگوليه
اي قصه ثانيه مرت بحياتج متذكريها
بعد القضيه نغير الولايه
ومن يسالوني متزوجه لو لا
متزوجه وزوجج بالعراق وتريدين تسويله معامله افتهمتي اسمج احفضيه وانس غيري اسمه كولي اسم بكيفج اي اسم تريديه
اسميه فؤاد ابو محمد
وشمعنى هذي الاسماء
لان هو فؤادي
وهو مره كال اذا يصير عدنا طفل اسميه محمد
والله عنده امل طفل منين يصير من لقاح النخل
ليش هيجي تكولين عنه ترى الي صار حادث قضاء الله وقدره ممكن اي شخص يتعرضله مااختاره هو
اويلي لسانج يطلع ست امتار من واحد يجيب طاريه
سكتت عنها وبعدين سالتها من اوصل لامريكا اگدر اتصل بيه
من تتصلين راح يكول اسمج ويعرف الرقم من امريكا خلي نخلص واتصلي بيه بس على مسووليتج لان الاتصالات مراقبه دوله تتجسس على دوله
معقوله يتجسسون عل مكالماتي
لا لعد اخترعوا الفايبر والواتس اب وخلوه مجاني حتى الحبيبه تتصل بحبيبها فكري شويه هذي برامج حتى
يتجسسون ماگلج يتجسسون على الكل لكن اي انسان يشكون بيه يراقبون مكالماته
لعد شلون اتصل بيه
بعدين نشوف طريقه وحاولي تحجين كم كلمه انگليزي مثل سوري وبليز حتى الناس تقتنع صارلج سنه بامريكا
وبعدين انطتني اسماء الاماكن المشهوره بوسكانسن اخاف احد يسالني واسماء اشهر الاسواق والمطاعم ظلت تحفظ بيه واني اردد وراها
تدرين لازم نغير بشكلج شويه حتى اذا احد يشوفج ميتعرف عليج
شلون يعني
نغير انفج بعمليه جراحيه وخلي عدسات لون ازرق وزيدي وزنج فد كم باوند محد يتعرف عليج
خشمي اقبل وعدسات عادي لكن اسمن ميعجبني
بس يلوگلج تسمنين وانس يكيف تصيرين دبدوبه
منو گال يحبني دبدوبه
كلهم يكيفون اسمعي كلامي
خلص اذا لخاطر انس اسمن
اويلي على انس الذابحتنا بيه
انتي لو تعرفينه متلوميني لان احبه كله رقه وحنان
يمعوده متسكتين انتي مصدكه وين اكو رجال يحب كلهم كذابين وانس لان منايم وياج بس يحصل المراد تصيرين قيمتج عنده نفس قيمة الممسحه الي بالارض مصدكه حب وحنان
انتي الظاهر مجروحه جرح بالطول والعرض
حسيت حنين تريد تبعدني عن انس وتقنعني ان الي بينا مو حب
وصلنا على المطار اخذتني حنين بسياره لوحدنا
منا وجاي تصيحيلي ام وليد واي واحد يسالج عني صديقتج واشتغل بالتجاره
كنت مبهوره بالمناظر الي اشوفها الشوارع النظيفه الحدايق الاضويه البنايات كلشي يوحي بالنظام
دخلتني شارع ونزلنا يم عماره
شقتج هنا بس اليوم هنا تباتين لحد متوصل اوامر وين نوديچ اكثر هذا الحي امريكان وكلهم موظفين معليج بيهم الصبح اجي اخذج نرتب امورج تصبيحن على خير
وين اخاف لوحدي
هذي امريكا محد بحال الثاني
بقيت بالشقه وحدي كانت مؤثثه وفيها اكل استلقيت على سريري وكل تفكيري بالورطه الجديده الي دخلت بيها من بين كل اللاجئين الي بتركيا مالگوا غيري يشهد على عصابه في ناس حظهم مثل المغناطيس ميجذب الا المأسي والضيم اني وحده من هاي الناس
ويمكن حضي راح يعم على انس
عيوني مركزه بالسقف وكل زاويا اشوف وجهه كبالي نمت احلم بيه
يمكن متصدگون بنت تتعلق برجل عاجز مصار بينهم معاشره حقيقيه
لكن انس امتلك عقلي قبل گلبي واخذ روحي بدون جسدي
الصبح انطرق الباب كانت ام وليد ومعاها شاب امريكي يصيحوه دي
اخذوني بالسياره بدت اجراءات شهادتي التقيت بمحامين اثنين بديت احجي ويسجلون كلامي ويسالون عن ادق التفاصيل حتى الملابس الي كانوا لابسيها الضحايا مرات اتذكر ومرات انسى حجيت وسط انهيار وبكاء ويشجعوني اتذكر. ويربطون الاحداث بتواريخ معينه
بعدها اخذتني ام وليد
لمعهد اتعلم سياقه وساعدتني باوراق ومعاملات هوايه
يمتى تخليني اشتري موبايل
اذا اشتريتي متراسلين اي شخص تعرفيه وكلشي تحت اشرافنا يكون
لعد المن اشتريه اريد اتصل بزوجي اسمع اخباره
بعدين يله نروح
وين للشقه لا لمكان ثاني تبقين عندي بالبيت لحد تصيرين جاهزه للشهاده ومتحجين شي گدام اهلي
رحت لبيتها كانت تعيش مع امها وابنها عمره ٩سنين
المره رحبت بيه هوايه
ماما هذي نغم الي حجيتلج عليه جايه جديد لامريكا وزوجها بعده بالعراق
هلا بيج يمه منين من العراق
من بغداد بس اصلي ديالى
كل الهلا
ماما اريدج تخليها تسمن كم باوند بوصفاتج السحريه
تدلل هذي سهله
الحجيه كانت حبابه وليد كان يحجي انگليزي
وظليت نفس الروتين اليومي اطلع من الصبح للمحامين. واروح ادرب على السياقه واتعلم انكليزي وارجع للبيت كل مصاريفي عليهم
ويوميه اتوسل بيها اتصل بانس متقبل
مرت شهرين اكيد هسه يگول عني خاينه مثل تهاني
طلعت الصبح اتصل بيها دي عرفت رايديني
ودتني على مقرهم وكان الخبر
المحاكمه صارت جاهزه شهادتج راح تكون عبر الستلايت حتى القاضي ميشوفج نخفي الوجه ونغيير الصوت
توقعي اي سوال ممكن تنسالين اجابتج تكون واضحه بدون تردد متگولين كنت زوجه ناصر تذكرين اسمه عادي وتفهميهم كنتي خدامه تنظفين بيوت الدواعش مجبره
وليش مااذكر اني كنت زوجه
اذا گلتي راح يعرفون شخصيتج خلال ساعه وحده
في لجنه اطباء نفسين وقضاة ولجنه كشف الكذب راح يسمعون شهادتج وينطون رائيهم لا تبينين انتي تدورين على الاجابه السوال الي تحتارين بجوابه گولي عيد السوال ممنوع كلمه مااتذكر ومااعرف
همه العصابه موجودين
الدكتور محاكمته غيابي لان مكانه غير معلوم
في اعضاء من العصابه موجودين
بعد المحاكمه حياتج راح تتغير اي تصرف طيش تخسرين حياتج هذي عصابات تحميها دول اكيد راح تسال عن شخصيتج. منو الي شهد ضدهم ومنين جاب المعلومات
راح اكون حذره ولاتنسون وعدكم الي تجمعون بزوجي
نساعدج حسب القانون عزيزتي اي تصرف مشكوك بيه راح واحد منكم يقتلوه نمشي حسب خطه تخلصين شهادتج وبعدين نتفاهم
بعدها بيومين صارت المحاكمه كنت متوتره وخايفه نقلوني من بيت ام وليد لبنايه حكوميه بسياره مظلله ودخلت المحكمه لابسه كيس في راسي وعبائة محامين كانت سريه بدون صحفيين ومع ذلك كانت هناك كم صحفي يسربون الخبر
گعدت بغرفه وفي كاميرا تصور
والرجل خلف الكاميرا كان ايضا من المخابرات تكلم معي
لاتخافين صورتج راح تتشفر والصوت يتغير
بدوا القضاة كانوا ثلاثه ومحامين الدفاع عن الحكومه الامريكيه باعتبارها المدعيه ومحامين عن اعضاء العصابه سبحان الله كانت الكلمات والاجابات تخرج من فمي بدون اي صعوبه يمكن دم الناس الابرياء كان يشد من عزمي ويتكلم بلساني
استمرت شهادتي تلث ساعات على مدى خمس ايام سالوني على ادق التفاصيل
وكان السوال الواحد ينعاد بعدة صيغ
حتى يتاكدون من الاجابه نفسها مااغيرها
كنت ارجع كل يوم راسي وضغطي وعيوني والذكريات المؤلمه سلبتني النوم ام وليد كانت تساعدني وتشجعني
خلصت شهادتي ورجعت لمقرهم اجتمع معي دي ومسوول ثاني
من هاي اللحظه انتهت عشتار ونولدت نغم هذي اجازه سوق ومبلغ مالي راح ناخذج لجراح تجميل نجري بعض التغيرات عليج بعدين تروحين لولايه ثانيه نسبه العرب بيها قليل جدا وتسكنين حي ايطالي في عمل ينتظرك بمطعم وشقه
تاخذين هذا التلفون الخط مراقب ممنوع اي اتصال مع شخص يعرف اسمج الحقيقي شفت المحاكمه وعرفتي حجم الخطر على حياتج وشفتي قدره العصابه
كوني حريصه
وزوجي صار شهرين وعشر ايام ميعرف اني وين
راح نقدم معامله هجره اله وتاخذ اجراءتها حاله حال اي مهاجر يمكن سنه يمكن اكثر منعرف
اقدم معامله واني مااعرف عنوانه عايش لا
تزوج
مستمسكات رسمي اله ماعندي
غير اتصل بيه
نحتاج نشوف طريقه لان هو هسه حياته بخطر خاصه اذا حاجي لاحد قصتج بالتفصيل
انس بيه طبع ميحب يذكر الماضي اسم زوجي الاول ميجيبه بالطاري وهسه اكيد سمع بالاخبار عن المحاكمه الدوليه اني حاجيتله كلشي فدوه استعجلوا اخاف ياذوه
انتي ابليتي بلاء حسن بالمحاكمه وكثير تعاطفوا مع دموعج والجمل والوصف كانت انسانيه هزتهم وبعضهم بكوا ومكافاتج نجيبلج انس اقصد فؤاد
بعدها رحت على دكتور تجميل من طرفهم وام وليد فهمتني هذا الدكتور يتعامل معاهم دائما للشهود والوكلاء السريين اذا انكشفوا
دخلت عليه رفض يغير انفي حسب رائيه مراح يغير شي من شكلي بقدر الحنك والخدود
وقنعني بتغير العظم للحنك لان بارز عندي وعمل خدود
وزراعه عدسات طبيه الوان وشكل الحاجب
وافقت وبدا التغيير
