#ضحايا١٢
#زينب_الموسوي#
بدا انس يحضر للسفر. وانطوه اوراق وفيزا للدخول كل يوم يقترب سفر احس بضيق وتوتر المفروض اقدم وياه سوا بس كنت خايفه اكون سبب بتأخيره وهو صار. له هوايه ينتظر
وسط الخوف من افقده وخوفي من عمليته واقتناعي هذا زوجي المفروض مابينا خصوصيات كان داخل للحمام يسبح استجمعت كل ذره جراءه داخلي ودخلت للحمام ثواني مجرد ان حس اني موجوده اندار. وبدا يصرخ مثل المذبوح
اطلعي شتسووين هنا شتريدين تشوفين
طلعت قفل باب الحمام وبدا يصرخ
مليتي بعد متتحملين ليش گلتي اتحمل ليش
سمعت صوته بالحمام يبجي ويگلي اطلعي عشتار لتبقين هنا. مااريد اشوفج
تمنيته يگولها لان فعلا بعد مااگدر اشوفه الخجل والندم على الي سويته موتني
لبست ردائي وگتله
طالعه انس لاتضوج ولاتحرگ دمك اني اسفه
طلعت في كراسي عند الباب الخارجي بالحديقه فگرت اگعد هنا وانتظره
صعب اتركه بدون ماابررله تصرفي
شلون اتركه يموت والله انتظره يهدا وادخل كانت الساعه خمسه صيف
مرت ساعه واكثر. وهو مافي صوت ولا حركه جوى اخاف ادخل بعده عصبي
انفتح الباب طلع شافني گاعده مااگدرت اباوعله دنكت وهو اجى يمي
محجينا اثنينه ظلينا ساكتين دقايق
اكيد يريدني اني احجي اقتربت منه انس وروح غربه مكان قصدي شي مجرد فضول ولان خايفه عليك من العمليه ردت اشوف شنو الي صاير والله
لامليت ولامتندمه ولاعندي احساس اني ناقصني شي بهذا الزواج صدگني سخافه من عندي وعديها الي وسامحني
وگف وگلي
ادخلي جوى اخاف حاره عليج
دخلت ركضت سويت كم شغله بالغرفه واكلنا لاهو يباوعلي ولا اني بعدها شغلت نفسي احضر ملابسه واكويهم
وماسيطرت على دموعي شافني ابچي
اخذ المكواه مني
اني اكمل روحي ارتاحي
صار بگائي اعلى ودموعي ترك كلشي واخذني على صدره ونمنا بمكانه
ادري موقصدج تاذيني بس اذيتيني
انشالله ميته ولا اذيتك انس حبيبي
ولج اني هم اتمنى اشوفج بدون ملابس شتتصورين سهله حبيبتي يمي ومااگدر ابادلها الحب وارضي نفسي وارضيها
ادري مو سهله عليك وكافي انسى الي صار راح تسافر وتتعالج
صبري وياي عشتار صدكي تهاني من عافتني ماهتميت الها لكن لو عفتيني انتي اموت
اسم الله عليك لاتصدگ اعوفك والله والانبياء
سكتنا اثنينا بعدها وبقينا بمكانه ادعينا النوم وكنت اسمع حسراته تكسر حاجز الصمت كل شويه
الصبح كان كلامه قليل ويايه باقي يومين على سفره هو ترك الشغل لان راح يسافر يبقى بالبيت ومرات يروح للقنصليه يكمل اوراقه
انس رايحه للشغل تحتاج شي
لا سلامتج روحي الله وياج
رحت للدوام عسل مره تسالني شبيج ومره وصال
عسل اكيد ضايجه لان الحب راح يسافر
وصال راح تصيرين حالج حالنا لا طايله ارض ولا سمى
تعاركنا اني وانس واني الغلطانه وضايجه كلش
وليش مااعتذرتي منه
ميفيد الاعتذار الشغله الي سويتها كبيره شغلات نسوان انتم بعدكم ممتزوجات
لعد روحي لام احمد واحجي وياها
اخذت اجازه يومين بحجه رجلي ديسافر ورحت على ام احمد
اني محاجيه شي عن حالة انس وگلت اخذ رائيها شلون اصالحه وام احمد اشتغلت تحقيق وياي شنو السبب والعركه وليش وشنو گلتي
ام احمد فدوه لعينج كوليلي شسوي حتى اصالحه راح يسافر مااريد اخر ذكرى بينا زعل وعرگه
روحي بدلي وخلي مكياج وانتظريه
غير هذي الفكره لان مليت منها
ماكو غيرها شنو مليتي صارلج شهريين من تزوجتي انتي لو تكولين شنو زعلكم اگدر اساعدج
ماكو شي راح ارجع للبيت واظل اعتذرله لحد ميصالحني
رجعت كان مموجود بالبيت اتصلت بيه
وينك انس اني بالبيت رجعت حتى ابقى يمك
يم اصدقائي اودعهم نص ساعه واجي
استغليت الوقت اطبخ ومن رجع ركضت عليه انس اذا متگول مسامحج. هسه اطلع من البيت شسوي هنا وانت زعلان مني
مازعلان حبيبتي ضايج عليج
ولاتضوج عليه ليش شبيه شريد بعد حبيتك وتزوجتك
عيني بعينج داشوف
هذي عيني شوف
ياچذابه راح تموتين عليه وتحسبين ايام عبالج مااحس بيج
على اساس انت الي مميت عليه
والله ميت وهانت حبيبتي والله شگدت قريت على المواقع عن العمليه كلهم يگولون ناجحه
يله لعد ارجع اضحك وسولف ويايه مثل اول
والي يشوف هذا الوجه شلون ميضحك
تصالحنا وزال التوتر بينا اليوم الي بعده اتصلوا القنصليه بلغوه اتأجل السفر بسبب الدوله ممكمله اجراءات دخولهم سمع الخبر تحول بركان غضب ميعرف شيسووي يفتر بالغرفه يريد شي يفرغ بيه خيبة امله كانت في نبته داخل الغرفه هو يحبها ومداريها موضوعه على الشباك شالها وشمرها على الحايط تطشر الطين بكل مكان والغرفه صغيره بحيث الفراش انملى طين وهو يصيح شوكت اموت واخلص ماتحملت اتركه بهذا الياس اجيت يمه اهديه انس اهدأ على كيفك ترى السفر تاجل مو الغه حتى تسوي بنفسك هيچ حبيبي انت
لاتكولين حبيبي شلون صرت حبيبچ ليليه نايمه ويايه وذايبه بالنوم ويايه تضحكين على نفسچ انتي لو عليه
تعرفني ميهمني هذا الشي
اني يهمني وكافي تمثيل وكذب ليليه اموت الف مره
سلامتك من الموت حبيبي
دفعني حيل وهو يگول أهو طلع من الغرفه وبقيت انظف واشيل الطين رجع دخل وگلي عشتار روحي كم يوم عند ام احمد والبنات اعصابي تعبانه وماگدر اتحمل
اروح بس انظف الغرفه
ترك الغرفه واني كملت تنظيف وطلعت
البنات شافوني عبالهم سافر
جاوبتهم لا اجلوا السفر وصار عصبي
واجيت هنا يمكم بين ميهدأ
ام احمد وليش تبچين يعني عجيبه مشايفه رجال عصبي قبل
ابچي على حظي هسه اني شجاني وتزوجت مره ثانيه
ام احمد ها مو هذا ابو الانس تلفوناتكم كانت للفجر متبطل كومي غسلي وجهچ
بقيت ليلتين عند البنات لا اتصل ولاسال واني كل شويه اشوف التلفون اخاف متصل واني ماادري
اليوم الثالث گلبي اكلني عليه الحب سلطان يسلبنا الاراده والتحكم بافعالنا
واني راجعه من الشغل مريت عليه للمحل اعرف وقته طلعته دخلت للمحل شافني
اجيت اشوفك واروح بعدك ضايج
كنت متاكد تجين اليوم اعرف تحبيني ومتتحملين تلث ايام مثل مااني احبج ومامتحمل
لعد ليش مااجيت عليه
شوفي شنو بايدي
باوعت كيس چبس كل مره يجيبه الي
كنت ناوي اجيب الجبس واروح عليج بس انتي سبقتيني يله نروح على بيتنا
طلعنا مشينا سوا ايده على كتفي فتحت الچبس وانطيته وحده ظلينا ناكل ونمشي
انس حبيبي لا تعذب نفسك وتعذبني ادري صعب عليك ومابدينا شي بس لخاطري لاتبعدني عنك مااگدر اتحمل بدونك وماعندي غيرك
حبيبتي عشتار اتصرفت بعصبيه ومراعيت مشاعرج خلص متتكرر وراح اسمع كلامج اتحمل واعتبر بعدنا مخطوبين نمشيها بوس
هههه والبوس معاجبك هسه تسافر وتبقى تتحسر عليه
مرت ١٦ يوم خبروه موعد سفر جديد
. واخر ليله قبل السفر كان فرحان والامل تارس عيونه فراقنا كان صعب
وبالمطار تفرجت العالم علينا البنات كانوا ويايه وهو اصدقائه واني ماسكه بيه
كافي عشتار جماعتي واگفين عيب
كله منك المفروض تاخذني وياك على الاقل اكون موجوده بالعمليه
ليش هو بيدي لو المانيا بيت ابويه وبكيفي بس اخلص العلاج ندمج الفايلين وتجين ويايه عشتار اني من قدمت معامله كتبت عازب وماعندي مرافق ويايه اذا اكتب اسمج اتاخر ياعيني
لا حبيبي لاتتاخر روح الله وياك انشالله طريق السلامه بجاه الله وبيته
الله عليج لاتبچين ورايه وادعي نجتمع سوا
سافر انس واني اخذوني البنات عدهم بالبيت بقينا نسولف اليل كله منتظره يوصل ويتصل بيه
ام احمد عشتار لاتهتمين انس شاطر هسه يسوي عمليه لرجله ويقدم اوراقج ولو انتم غلطانين المفروض من البدايه تقدمون سوا
بعد شمدرينا نحب بعض ونتزوج
مبينه كان يحبج من العصير والكيك
ياحبيبي ياانس هو يكول من اول مشافني على ااحدود حبني
خرب ولكم انتم كنتوا بياحال وحبيتوا
شمدريني هو يگول
وانتي شوكت حبيتيه
بالبدايه مااعرفت هذا حب اتذكر من ماتت بنتي بحضني ردت اضرب وجهي وهو يحاول يمنعني حسيت احد واگف وياي وبعدين اخذوني على المستشفى گلهم اختي وماعدها احد غيري ومن ذاك اليوم انطاني عصير وكيك وجابلي اكل گلي اذا متاكلين مااكل
بعدها حجت وصال كيف حبت ابن عمها سمير
وكيف عسل حبت ابن عمها وسام
وام احمد حجت قصة زواجها وتحول الحديث شجن واهات على قلوب تحترق بنار غربه والم وفراق
اخر الليل كل وحده حظنت وسادتها وغمضت عينها على صوره حبيب يبعد الالاف الاميال
الفجر اتصل انس
الحمد لله على السلامه حبيبي
الله يسلمج حبيبتي وصلت وبالكمب وباچر تبدي الفحوصات
اتصل بيه على طول زين كل متحصل خبر
اكيد ديري بالج على نفسج واطلعي لاتضلين حابسه نفسج وتفكرين بيه
اذا مافكر بيك بيمن افكر فدوه انس شوف حل نكون سوا
انشاالله هسه عندي اجتماع ويه ميركل المستشاره الالمانيه واحجي وياها
لا تصنف داحجي صدوگ
صدگيني باول فرصه احجي وياهم ويجيبوج عندي بعد شتريدين
اريد سلامتك حبيبي
بعدها بيومين كنا طالعين من الشغل وصال وعسل رادوا يمرون على السوگ
روحوا انتم اني تعبانه واريد اروح انام حتى بالليل اسهر ويه انس نسولف
راحوا بطريقهم واني بطريقي
شفت سياره تلاحگني انداريت نزلت بنيه
عشتار انتي عشتار
بلي انتي منو اني حنين من القنصليه الامريكيه ومحتاجتج بشغله مهمه. واني شعندي وياكم
انتي جيتي قدمتي طلب لجوء لامريكا وانطيناج موعد مقابله ليش مااجيتي للموعد
اتزوجت وزوجي بالمانيا واريد اسافر وياه
عشتار الشغله مهمه تعالي ويانا لمصلحتج
وين وياكم وشمدريني انتي مو كذابه
تخافين وممصدكه ناخذ تكسي اني وياج بس
اتصل بصديقتي تجي ويايه
لا الموضوع سري لاتخافين اني مثلج عراقيه وقريت الملف مالتج نريد نسالج كم معلومه انتظرنا تجين على المقابله مااجيتي راقبنا خطواتج دائما وياج بنات يله تعالي مراح تخسرين
ناخذ تكسي مااصعد وياكم. على راحتج
صعدنا اني والبنيه حنين والسياره الثانيه تتبعنا
لمن وصلنا كانت القنصليه اطمئنيت نوع ما ودخلت كان في رجل خمسيني امريكي ومعاه بنت شابه امريكيه وحنين ورجل الي كان يسوق
سلموا عليه وسالوا اساله عاديه الي يسال الرجل الامريكي وحنين ترجم مرتاحه بتركيا تشتغلين وهذي المقدمات
قرينا الملف الي قدمتيه ذكرتي صحفي امريكي انذبح قبل مده من قبل داعش تعرفين اسماء الي كانوا معاه
اعرفهم وذكرت اسماىهم
راوني صور ابو خليفه وابو اسلام وابو. فاروق
وصورة ناصر
نعم همه ذوله وناصر كان زوجي
وانتي شنو كان دورج
مالي اي دور زوجه مغلوبه على امرها اني تزوجت ناصر قبل الاحداث بسوريا وقبل انتمائه لداعش اذا عدكم صورهم ليش منقذتوه
سوريا وضعها معقد مااوصلنه لمكانه
كان محتجزيه بمقبره واني سامعه ان امريكا مخابراتها قويه وصار ست اشهر واكثر من گلت هذي المعلومات للامم المتحده ليش مجيتوا عليه بوكتها
سيدتي عشتار لو كل لاجي نقرا شنو گال نحتاج ملايين الناس تشتغل بالمخابرات ومنلحگ
لكن اللا جئين قصصهم حقيقيه
تعرفين مخابرات سامعه (سي اي ايه)
لا مسامعه شرايدين بالضبط انتم مني وحنين گالت مراقبيني ليش
شرحولي وشرحهم زادني حيره وخوف
في منظمه ارهابيه مقرها اوربا يديرها دكتور روسي واثنين شيشان معاه هذي المنظمه تاجر بالاعضاء البشريه
وكانت تستهدف السواح الاجانب الي يزورن اوربا شباب وشابات يواعدون السواح ياخذوهم على شقق يتم تخديرهم وتجرى الهم عمليات بدون ميدرون وفي ست اشخاص امريكان تعرضوا للعمليات ومن صارت احداث سوريا المنظمه هناك وداعش مساعدهم يخطفون ويأسرون وياخذون الاعضاء انتي ذكرتي هذا الشي شفتيه وتم في بيتك وامام عينك وعندك صور
صحيح ومازلت محتفظه بالصور بتلفوني تحبون تشوفوها
من فضلك
انطيتهم التلفون صور الدكتور وهو يدخل لبيتنا ومعاه مساعدين الغرفه صورتها صور الضحايا من يجوبوهم للبيت
شنو كان دورك انتي كيف دخلتي الغرفه وصورتي
زوجي كان معاهم داعشي واجبرني انظف الغرفه بعدهم
وشنو الاثبات انتي مكنتي وياهم وتاخذين اجر انتي بعتي كميه من الذهب يمكن هذي كانت اجورك
والله مكنت وياهم والذهب ناصر كان والده تاجر كبير هذي لعرسي واذا وياهم ليش انهزمت مبقيت وياهم
يمكن تعبتي يمكن قررتي تتركين العمل مع داعش هواي اسباب
يعني انتم مگدرتوا على العصابه جايين عليه اني
اسمعي عشتار العصابه هذي صار سنين نلاحقها وكل مره يغيرون مكانات العمل ومگدرنا نحصل على شخص يشتغل معاهم ونخليه يشتغل ويانا ويشهد عليهم وانتي بالصدفه حجيتي هذا الحجي بالامم المتحده والي اجرى المقابله معك خبرنا وراقبنا تحركاتك وفرحنا من قدمتي على السفاره الامريكيه وانطيناج موعد شهريين حتى اصدقائج ميشكون لو منطيج موعد قريب
شرايدين بالضبط ارجع اتجسس عليهم شنو
لا الي نريده تكونين شاهد عليهم ذولي ناس محتمين بدول ومنظمات وحصانات ودولهم تمنع تسلمهم لان عدهم نفوذ وسطوه ومافي شاهد عليهم انتي شاهد ومعاج الادله الصور
حياتج راح تكون بخطر لو سمعوا في شاهد ضدهم ميتركوج عايشه
يعني تردون يقتلوني ها
لا انتي تبقين عدنا تاخذين اقامه بامريكا تسافرين بصوره سريه متخبرين اي احد تختفين عدنا تشهدين امام قاضي دولي بدون محد يشوفج ويعرفج بعدها نغير اسمج تاريخج وننطيج هويه شخصية ثانيه وبنفس الوقت تقطعين الاتصال مع اي شخص بحياتج يعرف اسمج وقصتج وتاريخج تنولد انسانه ثانيه بمكان ثاني هذي الطريقه الي نگدر نحميج تدخلين برنامج اسمه حماية الشهود بواسطته نزيل شي اسمه عشتار وتظهر بدله شخصيه ثانيه
وزوجي وصديقاتي بابا وماما اذا دوروا عليه اخويه جمال اخواتي مستحيل ماتركهم مااريد اشهد اترك زوجي اموت غير انتم تصرفوا هذي سوريا ودخلوا اعتقلوهم
مو بهذي البساطه واغلبهم الان يشتغلون بليبيا
واني شكو معليه لااريد اقامه ولا حمايه شراح تگول عليه الناس من اختفي وزوجي شراح يكون ضنه بيه رافضه هذا الشي ولو سمحتوا اريد اطلع ومااريد اعيش الخوف مره ثانيه انتم تگولون ذولي منظمات خطره ليش اورط نفسي وياهم واخسر حريتي وحياتي
ماعندج خيار لو رفضتي نخبر عنج السلطات التركيه والامريكيه مشاركه بخطف صحفي الامريكي وبالمتاجره بالاعضاء وانتي معترفه وهذي الاوراق وطلعه منا مافي
دگ تلفوني ام احمد
جاوبيها عند الدكتور مريضه
هلووو ام احمد
وينج تاخرتي
عند الدكتور ام احمد شويه دايخه وتعبانه
ياالله بلكي حامل وتبشريني اجي عليج
لا حبيبتي ميحتاج مع السلامه
سديت التلفون اخذوا مني عندك ساعتين تفكرين بعدها نبلغ ضدج
هذا جرس اذا وصلتي لقرار دوگي الجرس
