ميرال:شبيك
تظاهر بالألم في راسه لكي يبعدها عنه
قيصر:ماكو شي بس وجع بسيط براسي
ميرال: تحب نطلب الدكتور او شي
قيصر:لا ماكو داعي هسة اتحسن
ميرال:زين امشي نرجع للبيت
قيصر:لا اني راح اروح للبيت
ميرال:شنو
قيصر:اي ياريت تبلغين اهلي
ميرال:بس
قيصر:مع السلامة تشرفت بمعرفتج
ميرال:انتظر وين رايح
تركها وخرج من المنزل مسرعاً استغربت كثيراً من طريقته الغربية ذهبت الى الداخل واخبرت عائلته بما حدث
حسن:شنو
ميرال:مثل ما سمعتوا وعافني وطلع
نظر والد قيصر الى زوجته وطلب منها الذهاب حسن:احنه صار لازم نطلع
الاب:خير ابو قيصر صاير شي
حسن:لا مصاير شي بس تأخرنا وصار لازم نروح
ماجد:ماشي بس عيدوها مرة ثانية
فادية:مع السلامة
مديحة:مع السلامة
ماجد:الله وياكم
تركوا المنزل وخرجوا مسرعين وبقوا الجميع في حيرة من امرهم
مديحة:شنو صار
ماجد:والله ما ادري
مديجة:ليش طلعوا بسرعة هيج انتي تعرفين شي
كانت ميرال صامته وتفكر في طريقة خرج قيصر من المنزل
ماجد:شنو صار انتي تصرفتي تصرف غلط وياه
ميرال:لا بالعكس اصلا جان تصرفي وياه عادي بس ما ادري شنو صارله فجأة
ماجد:ماشي روحي ارتاحي هسة واني احجي وياهم واشوف شبيه
تركتهم وذهبت الى غرفتها جلست على السرير وتذكرت كيف كانت عينيه
ميرال :شفت بعيونه شي بس شنو مجاي اركز شنو شفت بالضبط
وضعت يدها على راسها لعلها تتذكر وثم نظرت إلى ساعتها
ميرال:خليني انام شوي تعبت
غيرت ملابسها واقفلت الضوء وثم خلدت للنوم وفي الساعة الثانية بعد منتصف الليل استيقظت من النوم وكانت تشعر بالعطش فتحت عينيها كان النعاش يتغلب عليها فتحت عينيها كان الظلم يحيط بالغرفة نظرت الى ناحية باب تخيلت بشخص يقف امامها فتحت عينيها جيد اتضح لها حقيقة وليس خيال وبأنه فعلاً هناك شخص يقف امامها شعرت بالخوف واصبح جسدها يرتعش تحدثت بصعوبة قائلة
ميرال:م ..منو هنا منو واكف يم الباب
شعرت به يقترب الى ناحيتها مدت يدها لكي تفتح الضوء الذي بجانب السرير وعندما انفتح النور لم تجد احد
ميرال:هاي شنو ياربي....
اصبحت تلتفت حلولها
ميرال:هسة شفت شخص واكف .... شنو جاي يصيرلي
اخذت نفس وبدأت تهدئ وثم قالت
ميرال:اعتقد جنت اتخيل خليني ارجع اكمل نوم احسن
اقفلت الضوء ووضعت الغطاء على وجهها وخلدت للنوم بعد صراع طول مع النوم
وفي اليوم التالي جهزت نفسها وذهبت للعمل وكانت طوال الوقت متوترة وقلقة بشأن ما حدث لدرجة انها لم تذهب لرؤية سالي مثل العادة عندما شعرت سالي بتصرفات صديقتها الغربية ذهبت لكي تراها وتتحدث معها وقفت امامها كانت تراقبها من بعيد كانت شارده الذهن ضربت الباب بقوة لكي تنتبه إليها فزعت بخوف
ميرال:شكو
سالي:انني اللي شكو شبيج اليوم
ميرال:انتي خبالة اكو واحد يضرب الباب هيج سالي:اي ضربت الباب حتى تبتبهين لي وين جنتي صافنه حتى ما اجتي و ازعجتيني مثل العادة
تنهدت وثم قالت
ميرال:ماكو شي بس تعبانه شوي
سالي:من شنو تعبانه
ميرال:البارحة ما نمت زين
سالي:ليش
ميرال:صارت اشياء غريبة
دخلت الى المكتب وجلست امامها
سالي:مثل شنو
ميرال:البارحة اجة صديق بابا وعائلته حتى نتعرف عليهم واجه ابنه........
سالي:ههههههههه
ميرال:شبيج تضحكين
سالي:اضحك على الغباء مالتج
ميرال:شنو يعني
سالي:انتي خفتي لان شفتي يباوع عليج بنظرات غريبة يجوز نظرات حب هاي
ميرال:حب شنو انتي ام حب اصلا البارحة اول يوم اشوفه لحك يصير حب بينه وبعدين نظرات الحب هيج تصير
سالي:طبعاً الحب اله نظرات هواي مثلاً نظرة اعجاب نظرة حب نظرة شهوانية نظرة غزل والخ....
سالي:يجوز باوع عليج بوحدة من هاي النظرات وانتي فسرتيها غير شكل
ميرال:زين ليش طلع بهاي الطريقة واهله توتر وطلعوا وراء
سالي:يجوز حس بالخجل وطلع واهله توترا من طريقة خروجه من بيتكم وراحوا يشوفون شبيه
ميرال:يمكن
سالي:هسة هيج او هيج انتي شعليج بيه شغله انتهت اجوي تعرفوا عليكم وراحوا
ميرال:مممم
سالي:هو هذا اللي مغيرج واني عبالي شوف شنو صاير والله غبية انتي .....
مرت يومان وكانت الاوضاع تسير بشكل طبيعي تذهب ميرال كل يوم الى عملها وتعود... وفي يوم من الايام طلب والدها الحديث معها في امر هام
ميرال:خير بابا طلبتني
ماجد:اي تعالي بنتي اريد احجي وياج
اقتربت وجلست بجانب ابيها وكانت الفضول يقتلها لمعرفة الامر صمت قليلاً وثم نظر إليها
ماجد:بنتي هسة انتي كبرتي وصرتي بنيه جبيرة وما شاء الله بيج كل الصفات اللي يتمناها كل أب وأم طيبة وحنونه حلوة ومتعلمه وتعرف شلون تاخذين قرارتج بنفسج وذكية وتعرفين شلون تفكرين بحياتج ومستقبلج وكل هاي صفاتج تخليني فخور بيج طول عمري
ابتسمت لمديح والدها لها وبأنه فخور بها امسكت بيديه قائله
ميرال:اشكرك يا ابي لثقتك بي واتمنى أن لا اكسرها في حياتي وان ابقى كما تتمنى
ماجد:واني واثق من هذا الشي لان اعرفج زين
ميرال:بس ما كلتلي بابا شنو هو الموضوع اللي ردت تحجي وياي بيه
ماجد:بنتي انتي تعرفين عمج حسن وتعرفتي عليه وعلى عائلته شنو رأيج بيهم
ميرال:خوش ناس و محترمين بس ليش هذا السؤال
ماجد:وشنو رأيج بقيصر
ميرال:خوش ولد ومؤدب
ماجد:وشخص متعلم ودارس يعني فيه كل الصفات اللي تتمناها اي بنيه
ميرال:ما افتهمت شنو يعني
ماجد:يعني يا بنتي عمج حسن طلبج لابنه قيصر شنو رايج بالموضوع
ميرال:شنو
تفاجئت ميرال لما سمعته
ماجد:البارحة اتصل بيه عمج حسن وكال احنه نريد ميرال لابنه قيصر كلتله انطيني فرصة اخذ رأي البنت و ارد خبر وهسة انتي شنو رأيج بيه
كانت صامته وتستمع لكلام ابيها لا تزال غير مستوعبه
ماجد:بنتي انتي تسمعيني
ميرال:اي اسمعك بابا بس بالحقيقة تفاجئت شوي
ماجد:ليش بنتي الموضوع مابيه شي شافوج الناس وشافج الولد وعجبتي وانتي شنو رأيج
ميرال:ما ادري انطيني فرصة افكر
ماجد:فكري على كيفج واخذي قرارج بس بصراحة الولد يستاهل وعائلته خوش عائلة وناس معروفين يعني راح تعيشين بخير وسلامة
ميرال:ان شاء الله خليني افكر
ماجد:ماشي اخذي وكتج بالتفكير
ميرال:اترخص اني
تركته وذهبت الى غرفتها كانت تفكر في عرض عائلة قيصر لم تستوعب كيف حدث كل هذا بهذه السرعة كل شي حدث بسرعة يا ترى متى رآني ومتى وقع بحبي ومتى قرر الزواج بي كل تلك الاسئلة تدور في راسها عليها أن تجد اجوبه مقنعه لتوافق على الزواج ذهبت لرؤية سالي لكي تساعدها
سالي:شنو هاي الاسئلة التافه شوكت شافني وشوكت لحك يحبني وشوكت قرر يزوجني انتي غبية
ميرال:شنو غبية يعني ميصير افكر بهاي المواضيع واوافق بسرعة
سالي:مو قصة توافقين بسرعة بس الولد مابيه شي مو زين على شنو متردده شاب حلو مثل ما تكولين لان اني بعديني ما شفته والاهم غني و دكتور وخوش ولد واهله خوش ناس بعد شنو الشي اللي خليج متردده
ميرال:ما ادري بس
سالي:بس شنو شبيج انتي ليش تتصرفين بغباء
ميرال:اني ما اكدر اخذ قرارتي بسرعة لازم افكر واكعد احسب مية حساب للموضوع قبل ما اوافق
سالي:بطلي حساباتج التافهه وهاي خوش فرصة والولد خوش ولد لا تخلينه يروح من يدج
ميرال:اني لازم اسوي شي قبل ما اقرر
سالي:شنو تردين تسوين
ميرال:تعالي وياي
اخذتها وذهبت الى الشركة دخلت إلى غرفة الاتصال وطلبت من احد الموظفين ان يساعدها لكي يجلب لها رقم قيصر
سالي:شنو ولج
ميرال:ششش
التفتت الى الموظف
ميرال:ماذا قررت هل تريد مساعدتي ارجوك
_ولكن هذا الشي ممنوع يا انسه ميرال المدير لا يوافق على تسرب ارقام العملاء
ميرال:ولكن ارجوك انا بحاجة الى التحدث مع هذا الشخص وكما قلت لك لقد اعطاني رقمه من قبل ولكني قمت بضاعت الرقم
_ولكن انا
ميرال:ارجوك هذه اول مرة اطلب منك المساعدة وعد لا احد سيعلم وان علم المدير لا تقلق سوف اقول له انا من اخذت الرقم
صمت قليلاً للتفكير وثم وافق على المساعدة وجلب لهم رقمه
_خذي هذا الرقم ولكن كما قلت لكِ لا اريد لاحد ان يعلم بمساعدتي لكي
ميرال:حسناً لا تقلق
اخذت الرقم وخرجت من المكتب برفقة سالي
ميرال:واخيراً هسة صار رقمه عندي
سالي:بس اريد اعرف انتي شتسوين برقمه
ميرال:راح اتصل عليه واحجي وياه بخصوص موضوع الزواج لازم اعرف بعض الاسئلة قبل ما اخذ قراري
سالي:ماشي اتصلي عليه
اتصلت على رقم وانتظرت اجابته على الهاتف وبعد لحظات وصلها صوت جميل شعرت بالتوتر
ميرال:مرحبا
قيصر:من الذي يتحدث
ميرال:اني ميرال
صمت قليلاً وثم اجابها
قيصر:ميرال؟
ميرال:اي نعم اسفه على الازعاج بس اخذت رقمك لان جنت اريد احجي وياك
قيصر:تحجي وياي؟ بخصوص شنو
ميرال:بخصوص موضوع الزواج
صمت طويلاً لم يجيب عليها
ميرال:الو تسمعني
قيصر:اي اسمع
ميرال:بصراحة عندي بعض الاسئلة حابه استفسر عنها بالاول وكنت حابه اشوفك ونحجي
قيصر:والله جنت اتمنى بس اني مشغول بهاي الفترة
ميرال:وشوكت تفرغ حتى اكدر احجي
قيصر:بصراحة ما ادري من افرغ اتصل بيج وهسة استأذن لان عندي شغل
ميرال:ماشي اخذ راحتك
قيصر:مع السلامة
اقفلت الخط ونظرت الى سالي التي كانت تنظر إليها والفضول يقتلها
سالي:اها شنو كال وافق يشوفج وشوكت يجي وبشنو راح تحجون
ميرال:ما كال شي
سالي:شنو يعني
ميرال:ما ادري بس شكلي غلطت لان اتصلت عليه
سالي:ليش
ميرال:ما ادري بس تصرفه كان غريب وياي شكلي مجان لازم اتصل اني غلطت
سالي:شنو كلج شي ضوجج
ميرال:شكله ميريد يحجي بالموضوع
سالي:شنو يعني ميريد؟
ميرال:امشي يمعوده امشي
نزعجت كثيراً من تصرفه وندمت كثيراً على الاتصال به كانت كل ما تريده فهم بعض الامور ولكن طريقته في الكلام اغضبتها كثيراً لدرجة بأنها لم تركز في عملها وقررت العوده للمنزل
ميرال:مليت اني طالعه
سالي:لج شبيج شكو
ميرال:اريد ارجع للبيت ما الي واهس
سالي:انتي بعدج ضايجة من موضوع الاتصال
ميرال:مو بس ضايجه حيل ندمانه ياريت ما اتصلت
سالي:لا تضوجي يجوز عنده شغل وما كدر يحجي وياج
ميرال:حتى لو بس اني الغلطانه مجان لازم اتصل
سالي:خلص هسة لا ضوجين نفسج
ميرال:اني رايحه
سالي:ماشي حبيبتي
تركت الشركة وعادت إلى المنزل وعنده وصولها وجدت سيارة عائلة قيصر تقف امام الباب استغربت قائله
ميرال:هذول شعدهم جايين
خرجت من سيارتها ودخلت للمنزل كان الجميع يجلسون في غرفة الضيوف ردت عليهم السلام ودخلت لم تنظر لقيصر
حسن:اهلا بنتي شلونج
ميرال:الحمدالله بخير
حسن:احنه اجينه نحجي وياج طبعاً انتي تعرفين بموضوع الزواج
ميرال:اي بابا كلي
حسن:تمام وانتي اليوم اتصلتي على قيصر لان عندج بعض التساؤلات بخصوص الزواج واحنه جاهزين نسمع هاي التساؤلات ونجاوبج عليها
كانت مصدومة من الذي تسمعه كيف قام واخبر عائلته هذه السرعة هي كانت تريد التحدث معه شخصياً وليس مع عائلته
حسن:شبيج صافنه طبعاً انتي مستغربة شلون عرفت بالاتصال بالحقيقة يا بنتي قيصر ميضم شي علينا مهما كان حياته كتاب مفتوح لنا
ميرال:غريبة
قيصر:شنو الغريب بالموضوع
ميرال:كلشي يصير بحياتك لازم اهلك يعرفون بيه
حسن:طبعاً يا بنتي لان احنه عائلة وحدة وحتى نكدر نساعده بقرارته
ميرال:وقرر الزواج هو اخذه لو انتو اخذتوا
حسن:كلنا اخذنا القرار احنه وهو
وثم التفتت إليه قائلة
ميرال:ومقتنع بيه
قيصر:طبعاً مدام اهلي مقتنعين اني هم مقتنع
ميرال:تمام
ماجد:وانتي شنو رأيج يابنتي بالزواج
صمتت قليلاً وثم اجابتهم
ميرال:واني موافقة على الزواج
حسن:الحمدالله هذا احله خبر مبروك بنتي مبروك ابني قيصر
مديحة:الف مبروك حبيبتي
ميرال:الله يبارك بيج
وبدوا الجميع بالمباركه لهم وتناولو الشرب وبدوا يتكلمون عن تحضيرات الزواج
حسن:احنه ياريت نستعجل بالزواج يعني نسويها خطوبة وعرس فد مرة مو احسن
ماجد:ليش خلي الشباب يتعرفون على بعض
حسن:عود يتعرفون على بعض بعد الزواج
ماجد:وانتي شنو رأيج بنتي
ميرال:اللي تشوفه بابا
كانوا الجميع سعداء و يخططون لتحضيرات الزواج ما عدا ميرال وقيصر كانوا كل واحد منهم في عالم اخر كانت ميرال مستغربة من بعض الاشياء الغريبة التي تحدث بسرعة مثل الزواج وبعض الامور الغريبة وليس لها تفسير.... وقيصر كان يفكر في اشياء اخرى تره ماذا سيحدث بعد الزواج وكيف ستكون حياة ميرال معه وكيف ستتقبل حياته المليئة بالغموض والاسرار الغريبة كل واحد منهم لديه شيء يشغل باله....
