بسام
مرت ساعتين وانا الحق بهم كانوا يسيرون بسرعة كبيرة اعتقد بأنهم قد شعروا بوجودي خلفهم لم اتوقف واستمريت بالسير خلفهم الى أن توقفوا امام منزل اوقفت سيارتي بعيداً وجلست اراقب خرجت نبأ وزوجهها من السيارة وطرقت الباب وثم فتح الباب وخرجت إمرأة لم استطيع التعرف عليها لانها بعيده عني ادخلتهم للمنزل جلست انتظر نصف ساعة ومن بعدها انفتح الباب وخرجوا من المنزل وكانت برفقتهم فتاة ركزت في وجهها جيد ياللهي انها سما شقيقة روناك الكبيرة هذا يعني بأنه هذا هو منزل عائلة روناك واخيراً لقد عثرنا عليهم
اخرجت الهاتف وقمت بالاتصال على ريما وبعد لحظات اجابتني وكان صوتها غريب
ريما:الو
بسام:الو ريما شكو ليش تبجين
ريما:بسام حالة قيصر كلش مو زينه
بسام:شكو شصار
ريما:هجم علينا وحاول يكتلنه وطلعنه كلنه من البيت
بسام:اهدي يمكن لكينه الحل
ريما:شنو يعني
بسام:عرفت وين بيت عائلة روناك
ريما:صدك ؟
بسام:اي والله واني هسة واكف يم بيتهم
ريما:شعندك واكف روح احجي وياهه بلكت تساعدنه
بسام:ان شاء الله راح احاول
ريما:اذا صار شي خابرنا
بسام:تمام
اقفلت الخط وجلست انتظر الى أن ذهبوا نبأ و زوجهها ودخلت سما للمنزل خرجت من سيارتي واتجهت نحو منزلهم طرقت الباب و بعد لحظات فتحت لي سما وكانت متفاجئة لرؤيتي امامها
سما:انت ؟
بسام:شلونج سما
سما:شلون عرفت بيتي ؟
بسام:اليمشي وراء السيارة ميضيع الطريق
لقد فهمت بأنني كنت الحق بنأ و زوجهها
سما:وشتريد ليش اجيت
بسام:نحجي هنا؟ ميصير ادخل
تنهدت قليلاً وثم ادخلتني للمنزل جلسنا في غرفة الجلوس وقفت امامي وهي تنظر إلي باستهزاء
سما:شتريد ليش اجيت
بسام:اريد ماي عطشان
كانت غاضبة جداً ولكنها كانت تحاول السيطرة على اعصابها اخذت نفس عميق وذهبت للمطبخ لكي تحضر لي الماء وبعد لحظات عادت وقدمت لي الماء
سما:تفضل
بسام:اشرب عادي لو اخاف حاطه بيه شي
سما:الغدر هذا من طبعكم مو من طبعي
بسام:صدك ؟
سما:طبعاً لو نسيتوا
بسام:اني مجاي هنا حتى احجي بالماضي
سما:لعد ليش اجيت
بسام:اجيت اطلب شي ولو مستحيل بس على امل تساعديني
سما:اساعدك؟
بسام:اي
سما:وبشنو تريدني اساعدك
بسام:قيصر حالتة خطيرة واني ادري كلش زين انتي تعرفين شنو سبب مرضه ولهذا السبب اجيت وطالب مساعدتج واتمنى توافقين
ابتسمت بسخريه
سما:والله واجه اليوم الي اشوفكم مذلولين وتطلبوا المساعدة مني
بسام:ماكر داعي لهذا الحجي هسة
سما:لا اكو داعي اذا انتو نسيتوا اني ما نسيت
بسام:يعني شنو افهم جوابج ؟
سما:جوابي هو لا لو تنطبك السماء على الارض مراح اساعدكم بشي
بسام:جنت متوقع هذا جوابج
سما:مدام متوقع ليش اجيت
بسام:ردت اجرب حضي
سما:وهاي جربت هذة تفضل اطلع برا عندي شغل
بسام:ماشي
تركتها وخرجت من المنزل ركبت بسيارة وعدت إلى المنزل وعندما وصلت رأيت الجميع يجلسون في حديقة المنزل وكانو قلقين اقتربت منهم
ريما:بسام
بسام:هاي شنو ؟
حسن:منكدر ندخل للبيت
بسام:لهدرجة الوضع مو زين
ريما:طمني شنو الاخبار
بسام:مثل ما جنت متوقع هي السبب
ريما:بنت الكلب
حسن:وشلون اكو حل
بسام:رافضه تساعدنه حجيت وياهه بس للاسف
وثم نهضت ميرال واقتربت مني
ميرال:انطيني عنوانها
بسام:شنو
ميرال:راح احاول احجي وياهه بلكت اقنعها
بسام:ميفيد الحجي وياهه
ميرال:خلينه نجرب مراح نخسر شي
ريما:اي صدك بلكت تكدر تقنعها
بسام:تمام
اعطيتها العنوان واردت الذهاب معها ولكنها رفضت وطلبت الذهاب بمفردها
اما من جانب ميرال فقد ذهبت الى العنوان الذي اخذته من بسام وعندما وصلت طرقت الباب لتفتح لها فتحت جميله يبدوا بأنها في اواخر العشرينات
سما:نعم
ميرال:مرحباً
سما:مرحباً
ميرال:اني اسمي ميرال واجيت وعندي طلب واتمنى ما تخجليني
ابتسمت لي
سما:تحجي عراقي
ميرال:اي لان اني عراقية
سما:اها اهلا وسهلا بس شنو هو الطلب
ميرال:ممكن ادخل لو احجي هنا
سما:او اني اسفه اكيد تفضلي
ميرال"
دخلنا للمنزل وجلسنا في غرفة الضيوف واحضرت لي المشروب وجلسنا لنتحدث
سما:اتفضلي اسمعج
ميرال:اني اسمي ميرال زوجة قيصر حسن
تغييرت ملامحها في لحظة كانت متفاجئة كثيراً
سما:انتي زوجة قيصر ؟
ميرال:اي نعم واجيت وعلى امل تساعديني
نهضت من مكانها ووقفت امامي
سما:اسفه انتي اجيتي للشخص الغلط اني ما اكدر اساعد احد تفضلي لو سمحتي
نهضت ووقفت امامها واصبحت اتوسل إليها
ميرال:ارجوج ساعدي زوجي راح يموت
سما:هذا امر الله اني شنو بيدي
ميرال:ونعم بالله بس انتي هم تكدرين تساعديني الله يخليج زوجي راح يموت اخر يوم اله باجر
سما:كلتلج هاي الاعمار بيد رب العالمين
ميرال:بس هم تكدرين تساعدي زوج مسوين بيه سحر اسود ومتلبسته روح وحسب ما عرفت هاي روح اختج روناك
سما:شنو هاي الخرافات حتى وهي ميته ما خلصت منكم
ميرال:اترجاج ساعديني اذا تكدرين
سما:كلتلح ماكو بيدي شي اسوي انتي جاي تتعبين نفسج روحي شوي غيري يساعده
ميرال:بس اني ادري انتي الوحيدة اللي تكدرين تساعدينه
سما:وليش بله
ميرال:لان انتي اللي سويتي السحر الاسود
سما:شنو
اصبحت تضحك باستهزاء
ميرال:اي انتي السبب سويتي هيج حتى تنتقمين لاختج روناك
توقفت عن الضحك وكانت تستمع لكلامي
ميرال:ليش جاي تسوين بيه هيج ليش خربتي حياته بسبب انتقام على شغله مجانت بيده اختج هي اللي اختارت الانتحار قيصر ما اله علاقة اختج ماتت نتيجة هوسها بحب قيصر
سما:انتي على شنو تحجين
ميرال:اللي سمعتي لا تخلين انتقامج يخرب عائلة كاملة وبعدين هاي بدل ما تعتذرين منهم على اللي سوته بيهم اختج جاي تنتقمين منهم
نظرت إلي بغضب واقتربت مني قائله
سما:هاي العائلة مو مثل ما انت شايفتهم هذول شياطين على وجوه ملائكة شكلج انتي اللي ما تعرفين شي عن الحقيقة
ميرال:حقيقة اي حقيقة؟
سما:شنو جذبوا عليج حتى يغطون جذبتهم
ميرال:ما افتهمت ؟
سما:اني راح افهمج
جلست بجانبي واصبحت تسرد لي القصة
سما:قبل خمس سنوات جان ابوية يشتغل بشركة لتصنيع السيارات جان ينظف السيارات ومرات ياخذ اشياء عادية من سيارات الخربانه ويبيعها لان جان راتبه ما يكفي مصاريف البيت وعلاج امي.. امي جانت مريضة عدها سرطان وياكل بجسمها واحنه جنه عايشين على راتب ابويه وعلى هذه الاشياء اللي حصلها صح هي مجانت تكفي بس هي هاي العيشة ناس على كد حالنه الى يوم من الايام زادت حالة امي سوء والدكتور كال لازمها عملية وهاي العملية تكلفتها 900 ملايين واحنه لو نبيع بيتنا وكلشي نملكه ما نحصل 200 الف بقى ابويه صافن ما يعرف شيسوي وهو جاي يشوف امي جاي تتألم من الوجع طلبت منه يروح على صاحب الشركة ويحجي وياه بلكت يكدر يساعدنا وينطينا هذا المبلغ واحنه جنه نعرف بيه خوش رجل ويحب يساعد الناس بس بعدين اكتشفنا غير شي لما راح ابويه حتى يطلب منا المبلغ رزله وطرده كله انت راتبك كله مايجيب ربع المبلغ شلون تريدني انطيج هيج مبلغ وشلون راح تسدده وانت حتى مجاي تكدر تدبر مبلغ يعيشك انت وعائلتك اني ما اكدر اخاطر وانطيك فلوسي..
سما:بعد ما طرده ما عرف بابا شيسوي ومرض امي كسر ظهره مجان يكدر يتحمل يشوفها هيج وهو ما بيده حل بعدين فكر ياخذ اغراض غالية من السيارات وبيعها حتى يكدر يدبر المبلغ كان مضطر يسوي هيج لان مجان اكو حل بيده .... و من عرف المدير طرده من الشركة وخسر بابا شغله وامي ما كدرنا ناخذه للمستشفى لان ما عدنه فلوس للعملية لحد ما اتوفت بسبب المرض وابويه كام يلوم نفسه على موتها لحد ما لحكها وبقينا اني واختي الصغيرة روناك جان عمري 15 سنة و روناك 9 سنوات اطفال ما نعرف شنو هاي الدنيا ولا شنو راح نواجه شلون راح نكبر ونعيش الوحدنا بهاي الدنيا بلا اب وامي ماكو احد يحمينا اخذتنا عمتي عشنا يمها وشفنه نجوم الظهر يمها جانت هي وعائلتها يعاملونه مثل الخدم عدهم .....عشنا حياتنا كلها قهر بقهر جان اللي يصبرنا شي واحد هو الانتقام من هذاك الرجل اللي دمرنا ودمر عائلتنا كلها
تحدث معها وانا في شدت صدمتي
ميرال:هذاك الرجل يكون؟
سما:اي عمج ابو قيصر
فتحت عيني على وسعها لم استوعب ما سمعته هل يعقل بأنه عمي يكون بتلك البشاعة ممكن أن يظلم عائلة بهذا الشكل لا استطيع أن اصدق ما سمعته ياالهي انا في حيره من امري
سما:حلفنه لا ننتقم منها وندمرهم مثل ما دمرونا بس اختي جانت غبية لان حبت الشخص الغلط حبت ابنهم وهو هذا سبب دمارها كم مره حذرتها بس هي جانت عنيده وما تسمع كلامي حاولت تخلي قيصر يوكع بحبها بس هو جان اناني ومغرور مثل ابويه وبدل ما توكع هي وكعت بحبه حاولت شكد امنعها من هذا الحب بس بدون فائدة جانت متعلقة بين هواي ومصرة عليه برغم من رفضه لحبها بس صار الموضوع تحدي بالنسبة لها وخسارتها للتحدي دمرها وسبب الها الانتحار
وبهذا الوكت بقيت الوحدي بالدنيا لا اب ولا ام ولا اخت خسرت كلشي جان عندي بسبب هذيج العائلة وحلفت لا ادمرهم واعيشهم بنفس القهر اللي عشنا ومراح اخليهم يشوفوا سعادة ابنهم راح يتحسرون عليه طول عمرهم
ميرال:مجاي اصدك اللي اسمع
سما:لا صدكي هاي العائلة لها الف وجه
ميرال:بس قيصر شنو ذنبه
سما:واحنه هم شنو ذنبنا ليش ادمرت عائلتنا على مود كم فلس ليش
لم استطيع أن اقول شيء معها حق ان تغضب عليهم ولكن قيصر ليس له ذنب ان كان عمي هو من دمر حياتهم اذن عليه تصليح اخطائه
ميرال:ان كان عمي من اخطأ بحقكم ليش جاي تظلمين قيصر بعد شاب ليش تردين تدمرين شبابه
سما:وشباب اختي
ميرال:اختج هي اللي اختارت الموت قيصر ما اله علاقة
سما:اناني مثل ابوه
ميرال:اترجاج ساعدي راح يموت ما بقى عنده بس باجر
ادارت وجهها بعيدا عني وقالت
سما:كلتلج ماكو بيدي اسوي شي
ميرال:شنو تردين اسوي حتى اعوضج
سما:تكدرين ترجعين اهلي تكدرين ترجعين اختي تكدرين ترجعين سعادتي تكدرين ترجعين شبابي اللي راح... اذا كدرتي ترجعيلي هذا كله راح اساعد زوجج
صمتت لم يكن بيدي شيء سوى الصمت نهضت لكي اذهب ولكنها اوقفتني
سما:انتظري
التفت إليها
سما:اكو حل لمساعده زوجج
قلت بلهفه :شنو هو؟
سما:يجي ابوه لهنا لعندي ويطلب السماح ويبوس يدي حتى اسامحه
ميرال:شو
سما:اي اذا تردين زوجج يتعالج خلي يذل نفسه الي حتى ابنه ترجع حالته
ميرال:مستحيل يسوي هيج
سما:لعد زوجج راح يموت لان اني مراح اسمح له يعيش وراح يبقى يتعذب كل عمره
ميرال:انتي طلباتج مو معقوله
سما:بالعكس هاي هي العدالة
ميرال:بالعكس اذا همه جانوا حقراء وياكم المفروض انتي تصيرين احسن منهم
سما:بهذا الزمن الطيبة بعد متفيد
اكتشف بأنه النقاش معها مضيعه للوقت لانها لم تتنازل عن حقها ولذلك تركتها وعدت للمنزل ولم اجد احد في الحديقة وكان باب المنزل مفتوحاً استغربت اين ذهب الجميع هل يعقل بأنهم في الداخل كيف استطاعوا الدخول وقيصر في هذه الحالة دخلت إلى المنزل ورأيت الجميع يجلسون في غرفة الجلوس وعلى وجوههم علامات القلق
حسن:ميرال
ميرال:شلون دخلتوا للبيت
بسام:حبست قيصر فوك بالغرفة وكدرنا ندخل للبيت
ميرال:شنو؟ وشلونه هسة
بسام:على حالة بصعوبة يله كدرنا ندخله للغرفة
ميرال:راح اصعد اشوفه
حسن:لا بنتي لا ترحين احنه ما ندري الوضع شلون صاير فوك ملازم ترحين تشوفينه هسة وهو بهاي الحالة
بسام:بشري شنو صار كدرتي تحجين وياهه
جلست امامهم ونظرت إليه استغرب الجميع من نظراتي إليهم
حسن:خير بنتي شبيج
تنهدت وثم قالت
ميرال:عندي موضوع اريد احجي وياكم بس اريد تحجولي الصراحة
اصبح الجميع ينظر إلي بغرابة
ميرال:اني اليوم سمعت قصة من سما واريد اعرف الشي اللي سمعتنا صح لو غلط واريدكم تحجولي الحقيقة؟
حسن:شنو سمعتي
ميرال:سمعت ابو روناك جان يشتغل عندك بالشركة وجانت حالة مرته كلش خطيرة واجه حتى وطلب منك فلوس دين حتى يسوي عملية المرته بس انت رفضت و طردته من الشركه لان صار يبيع باغراض الشركة
نظرت إليه بجدية وقلت
ميرال:هذا الحجي صدك عمي ؟ فهموني فعلاً هذا الشي الصار لو سما جاي تجذب عليه؟
كانوا جميعاً في حالة صدمة لقد تغيرت ملامح وجوههم جميعاً وفجأة تحدث عمي قائلًا
حسن:كذب اللي سمعتي كذب
ميرال:زين اذا كذب شنو مصلحتها حتى تحجي هيج عليكم ...اريد اعرف يعني القصة اللي سمعتها منكم جذب فهموني
حسن:لا هاي وحدة جذابه وجاي تدور مشاكل
رفعت حاجبي ونظرت إليه
ميرال:فعلاً؟
حسن:اي
فادية:كافـــــــي
صرخت عمتي وجعلت الجميع يلتف إليها كانت تنظر الى زوجها وتتحدث معه بعصبية
فادية:كافي كذب لشوكت راح تبقى تكذب
حسن بعصبية:فادية
فادية:لا هاي المرة مراح تكدر تسكتني خليني احجي اللي بكلبي صارلي سنين واني ساكته على مشاكلك وبالاخير يوكع ابني بمصيبة بسببك وبسبب مشاكلك
انت ليش متريد تعترف بأن كل اللي جاي يصير بينه بسببك
حسن:شنو ؟
فادية:اي نعم انت السبب بسبب جشعك وطمعك للفلوس صارت بأبني كل هاي المصايب وكلام اللي كالته سما صحيح فعلاً احنه دمرنا عائلتهم وخسرت اهلها بسببنا بس بدل ما تعاقبنا احنه عاقبة ابنه هو دفع الثمن
حسن:ابوها جان شخص حرامي سرق اغراض من عندي وصار يبيع بيهن
فادية:مجان عنده حل ثاني الرجل جان يريد يعالج مرته لان انت طردته
ريما:خلــــــص بدل ما تتعاركون على سوالف راحت وانتهت شوفوا لنا حل قيصر ما عنده وكت بس باجر
ميرال:وافقت سما تساعدنه بس عدها شرط
فادية:شنو هو ؟
ميرال:هو انو يروح عمي لها ويعتذر منها
حسن بصدمة:شو
ميرال:اي وتبوس يدها هم
ريما:شنو هاي التفاهه
ميرال:بس اني رفضت وكلتلها مستحيل يعتذر منج
حسن:لا اني موافق
ريما:شنو
حسن:اي اني موافق اروح اعتذر منها وشتريد اسوي هم
ميرال:لا عمي ترك هذا الموضوع مستحيل تنزل نفسك الها
حسن:بس حياة ابني مو اهم من كرامتي واذا جان على الاعتذار وبوسة اليد هاي سهله بس اهم شي تساعد ابني
ريما:بس يا بابا .....
حسن:خلص اني اخذت قراري وراح اروح الها اليوم
التفت إلى بسام قائلاً
حسن:بسام اريدك توصلني للبيت مالتها
بسام:اكيد اني جاي وياك
ميرال:واني هم اروح وياكم
حسن:لا بنتي انتي خليج يم قيصر اخاف يصير شي
ميرال:تمام
جهزوا انفسهم وخرجوا من المنزل متجهين نحو منزل سما اما انا فقد ذهبت للاطمئنان على صحة قيصر اقتربت من الغرفة ووقفت خلف الباب لا يمكنني الدخول إلى غرفته طرقت الباب عدت مرات لم يصدر أي صوت من الداخل
ميرال:قيصر.... قيصر حبيبي تسمعني انا مير...
قبل أن اكمل كلامي نضرب الباب بقوة افزعني وابتعدت بسرعة وثم سمعت صوت مخيف قادم من الاسفل
_لا تكليله حبيبي يا ساقطة
تفاجئت عندما سمعت صوتها هذه لا تزال هنا اذن لماذا لم يعد قيصر على حالته الطبيعية
_شبيج شكلج تفاجئتي من وجودي
ميرال:قيصر وين
_انسي قيصر بعد مراح يرجع
ميرال:اذا حاولتي تأذينه اقسم بالله
_ماكو داعي للتهديدات لان ما تخوفني وبعدين انتي هيج او هيج مراح تشوفينه بعد..... راح تنتهي حياتج وياه حدج الباجر بس
ميرال:هذا الشي بيد رب العالمين مو بيدج هو قادر على كلشي ممكن بين يوم وليلة يتغير كلشي
_مراح يتغير شي مدام اني موجودة
ليس هناك جدوى من النقاش معها فتلك الشيطانة لن تستسلم بسهولة وان استمريت في تحديها سوف تحاول ايذاء قيصر علي السيطرة على أعصابي ولا ابين لها مدى قلقي لكي لا تستغل ضعفي وتحاول السيطرة عليه لم يكن امامي سوى تركها والعودة الى الاسفل بقينا حاولي ساعتين ننتظر عوده عمي وبسام من مقابله شقيقة تلك الحمقاء
ريما:برأيكم راح توافق تساعدنه
ميرال:ما ادري بس احنا لازم نجرب
ريما:اني اشك حتى لو سوينه الي طلبته هم مراح توافق تساعدنه
ميرال:بس احنا ما عدنه حل ثاني مضطرين ننفذ كل طلباتها
ريما:بس هذا الشي اسمه استغلال هي جاي تستغلنه حتى تنتقم
ميرال:ادري بس شنسوي حياة قيصر اهم من هاي السوالف كلها
وثم سمعنا صوت الباب وذهبت الخادمة لكي تفتح الباب ودخل عمي ومعه بسام وكانت وجوههم لا تتفسر نهضت والدة قيصر واقتربت من زوجها
_حسن بشر شنو صار وافقت تساعدنه لو لا
لم يرد عليها كان صامتاً فقط
ريما:شكو شنو صار
بسام:هذيج الحقيرة طلعت تنصب علينا
ميرال:شنو يعني
بسام:يعني ما قبلت تساعدنه ومو بس هيج هي اهانة عمي ومسحت بكرامته الارض وطردتنه من البيت
ريما:شنو
بسام:مثل ما سمعتوا
ريما:الحقيرة جنت ادري بيها هاي وحدة سافله
ميرال:وهسة راح شنسوي ؟
رأيت خيبة الأمل في عيون الجميع كنا جميعاً نضع املنا في مساعدة تلك الفتاة ولكنها كانت تريد أن تذلنا وليس مساعدتنا .....
