بدأت الايام تمر بسرعة وكانت ميرال تجهز نفسها للزواج تذهب كل يوم برفقة سالي الى السوق لكي تتسوق اغراض الزواج وكل ما يلزمها
سالي:اشترينه كل شي اليوم تعبت
ميرال:اي والله
سالي:تعالي خل نكعد نشرب شي راح اموت من العطش
ميرال:يله
جلسوا في احدى المطاعم ليشربون الشراب
سالي:اي بعد شكد للعرس
ميرال:بعد يومين
سالي:وهاي شكل وحده راح تزوج بعد يومين
ميرال:ليش شبيه
سالي:شنو شبيج ما تشوفين نفسج شلون ضايجة انتي ما تردينه
ميرال:مو قصة ما اريده بس عنده بعض الاشياء محيرتني
سالي:هاي كل بنيه تحس هيج احساس لان راح تزوج شخص متعرف عنه شي وانتي بعدج ما تعرفينه بس بعدين تتعرفين عليه وتكتشفين اطباعه ميرال:يمكن
سالي:هو يحجي وياج
ميرال:مرات
سالي:بشنو تحجون
ميرال:حجي عادي شلونج اخبارج ومن هذا الحجي
سالي:يعني ماكو رومانسية بينكم
ميرال:لا
سالي:يجوز بعده ما متعود عليج.... زين يحجي وياج بليل
ميرال:لا بليل ابد ما يخابر مرات من ادك عليه ميشيل التلفون بليل
سالي:يجوز ينام من وكت
ميرال:اي من وكت ينام بالتسعه
سالي:بالتسعه ؟
ميرال:مو اكلج تصرفاته غريبة
سالي:اها.... اي هم اكو ناس ينامون من وكت من التعب يجوز هو منهم
ميرال:تعب تدرين اني بشنو حاسه
سالي:بشنو
ميرال:يمكن هو ميحبني ويجوز مجبور على هذا الزواج
سالي:شنو ليش بله ميحبج ليش شبيج انتي ميرال:يجوز اهله جبرو على الزواج وهو ميكدر يرفض حسب ما افتهمت اهله ياخذون القرار عنه ويجوز جبروا على الزواج
سالي:لا طبعاً ليش انتي شبيج حتى ميريدج اشو جمال واخلاق وكلشي بيج حلو يعني يتمناج اي شخص
ميرال:بس يجوز هو ميريدني... اني لو بس اكدر احجي وياه على راحه جان عرفت شنو قصته بس اهله
سالي:يمعوده شيلي هذا تفكيرج لان ما بيه حض وفكري بعرسج بعد يومين
ميرال:ممممم...
يوم الزفاف
كان الجميع منشغل في تحضيرات وكانت ميرال تقوم بتجهيز نفسها بمساعدة صديقتها سالي واختها زينب
سالي:وهسة نحط اخر لمسه الحمره
زينب:واني اريد حمره شوي
سالي:شوفي هاي الشيطانه
ميرال:حبيبتي ميصير تحطين انتي بعدج صغيرة
زينب:لا مو صغيرة اني جبيرة هسة
سالي:اهو هاي مراح تسكت خلي تحط شوي
ميرال:شوي بس
زينب:اريد لون احمر
سالي:هههههه شوفي هاي تريد لونها احمر حتى تبين زينب:اي
ميرال:لا حطي وردي فاتح
زينب:لا هذا ميبين
سالي:عزة ولج انتي شيطانه
ميرال:حطي من اي واحد خلصيني منها
سالي:اكول ليش اصرت حتى تساعدني بتجهيزج حتى تاخذ نصيبها من الحمره
ميرال:هههههههه استغلال
سالي:طالعه عليج
وفجأة انطرق الباب وذهبت زينب لكي تفتح الباب وعندما فتحته دخلت فتاة جميلة كانت ترتدي فستان بني اللون وكانت في غاية الجمال تستغربوا ميرال وسالي من وجودها
_اسفه لان دخلت بهاي الطريق بس بصراحة الفضول كتلني اريد اشوف زوجه اخي اني اسمي ريما اخت قيصر الكبيرة
ابتسموا لها ورحبت بها ميرال
ميرال:اهلا بيج اني ميرال وهاي صديقتي سالي
ريما:اهلا وسهلاً بيكم ما شاء الله ذوق اخويه يخبل مثل العاده
ميرال:شكراً هذا من ذوقج
ريما:اعذريني ما كدرت اتعرف عليج من قبل بس جنت مسافرة وياه زوجي و رجعنه البارحة على مود العرس
ميرال:لا عادي مو مشكلة
سالي:انتي عايشة هنا
ريما:اي طبعاً بس طلعنه سياحة اني وزوجي لفتره يعني نرتاح ومن هذا الحجي
سالي:اها اهلا وسهلاً بيج مرة ثانية
ريما:تحبون اساعدكم بشي
سالي:تسلمين حبيبتي وجودج كافي واحنه خلصنه
ريما:ما شاء الله تخبل بدون لا بدله ولا مكياج
ميرال:ههههه
انفتح الباب ودخلت والدتها
مديحة:يله تعالوا انزلوا وصلوا اهل العريس
سالي:يله امشي حبيبتي
مديحة:ما شاء الله تخبلين يله امشي بسرعة
امسكت سالي بالفستان الزفاف من الخلف لكي تساعدها على النزول السلم الذي كان قيصر ينتظرها في اخر السلم كان يقف وينظر إليها وعندما وصلت إليه ابتسم ابتسامة خفيفة ومد يده لها امسكت بيده وذهبوا الى الشيخ لكي يعقد لهم وعندما انتهوا من العقد ذهبوا للرقص كان قيصر متوتر ويلتفت حوله انتبهت ميرال له
ميرال:خير انت منتظر احد
قيصر:اها لا بس اباوع على الناس
كان ينظر الى ساعته بين الحين والآخر وكأنه ينتظر احد وثم طلب منها أن يجلسوا
قيصر:تعبت شنو رأيج نكعد
ميرال:تمام
ذهبوا وجلسوا في المكان والمخصص لهم كانت ميرال قلقة لتصرفات قيصر الغريبة
ميرال:صاير شي
قيصر:شي مثل شنو
ميرال:ما ادري بس شكلك متوتر اكو شي
قيصر:لا بس اريد احجي وياه ابويه بموضوع....
راى والده يقف بعيداً
قيصر:عن اذنج
ميرال:تفضل
ذهب قيصر واقتربت سالي منها وهي تبتسم
سالي:ولج شنو هذا قيصر يخبل هجم بيتج والله وكعتي على واحد
ميرال:اوف
سالي:شبيج ولج ضجتي لان كلت عليه يخبل بيوم عرسج
ميرال:شوف هاي
سالي:ولج شبيج ضايجة اكو وحدة تزوجت هيج واحد وتضوج
ميرال:اللي مضوجني تصرفاته الغريبة لو يباوع بالساعة لو يتلفت كل شوي
سالي:وشنو الغريب يجوز منتظر احد لج بابا شبيج انتي دائماً متشائمة خليج فري
ميرال:اجه روحي
سالي:ابتسمي لا تعبسين
اقترب قيصر منها قائلاً
قيصر:يله صار الوكت نروح
ميرال:وين بعد وكت بالسبعه بعدها مصايره
ضربتها سالي على يدها
سالي:لج غبية انتي روحي وياه
ميرال:وين اروح هسة
سالي:وين ترحين لمدينه الألعاب امشي لج خبله
نضهت من مكانها وهمست لها سالي بان تبتسم له
سالي:دير بالك عليها ماشي
قيصر:اكيد
اقتربت منها واحتضنتها
سالي:الف مبروك ياعمري اتصل بيج باجر
ميرال:اوكي
قيصر:يله نمشي
ميرال:اي
ودعوا الجميع وخرجوا من المنزل ركبت بسيارة قيصر المزينه بالورد وذهبوا الى المنزل وعندما وصلوا استقبلوهم الخدم بالمباركه وثم اخذها قيصر وذهبوا الى غرفته وعنده دخولها تفاجئت بفخامة غرفته كأنها غرفة الملوك دخلوا وطلب منها الجلوس
قيصر:اخذي راحتج اني راح ادخل للحمام شوي واجي
هزت راسها بالايجاب وتركها ودخل للحمام نهضت من السرير واصبحت تتجول في الغرفة اقتربت من الخزانه فتحته وجدت ملابس قيصر اقفلتها بسرعة وثم اقتربت من العطور التي تملئ الدرج
ميرال:كل هاي عطور عبالك محل مال عطور لعد هذا ريحته شكد طيبة
اقفلت الدرجه وفتحت الدرج الاخر كان يحتوي على انواع الساعات الرجالية
اقفلتها وذهبت لكي تنظر من النافذه مرت ربع ساعة ولم يخرج قيصر من الحمام اقتربت من باب الحمام طرقت الباب وبعد لحظات فتح الباب وكان وجهها لا يتفسر
ميرال:شبيك صاير شي
قيصر:مثل شنو يعني؟.
ميرال:بس سؤال
قيصر:شتردين
ميرال:اريد اغير ملابسي
قيصر:اي ادخلي
ابتعد عن الباب دخلت واقفلت الباب خلفها اصبحت تلتفت حولها كان كل شي جيد
ميرال:شنو جان يسوي كل هذا والوقت
التفت وجدت مراة منكسره على يمينها
ميرال:هاي شنو مرايه مكسورة؟ شوكت نكسرت هاي المرايه شكلها هسة مكسورة زين ليش ما سمعت الصوت
وثم تذكرت قيصر ربما يكون قد جرح بسبب هذا الزجاج خرجت مسرعة من الحمام ولكنها لم تجده بداخل الغرفة
ميرال:قيصر
التفت حولها لم تجد احد
ميرال:هذا وين راح
اقتربت باتجاه الباب امسكت بالمقبض حاولت فتح الباب ولكنه لم يفتح يبدوا بانه الباب مقفل من الخارج
ميرال:هاي منو قفل الباب
اصبحت تطرق الباب وتنادي على احد لكي يفتح لها الباب
ميرال:وينكم افتحوا الباب.... قيصر وين رحت تعال افتح الباب.... اكو احد يسمعني
بدأت تشعر بالخوف
ميرال:قيصر وينك..... اكو احد يسمعني افتحوا الباب بدأت دموعها تنزل من شدت الخوف
ميرال:هذا ليش قفل الباب عليه شسوي هسة
اصبحت تتجول في الغرفة وتنتظر وصول احد لكي يفتح لها الباب تعبت من الانتظار وثم خلدت للنوم على الارض بدون أن تشعر ......
اصبحت الساعة السابعة صباحاً انفتح باب الغرفة ودخل قيصر وجدها نائمة على الارض ولا تزال ترتدي فستان الزفاف وكانت ترتعش من البرد اقترب منها لكي يجعلها تستيقظ
قيصر:ميرال.... ميرال كومي ليش نايمه هنا ميرال اكعد
نهضت مفزوعة من مكانها
قيصر:اهدي هذا اني قيصر
كانت تنظر إليه بصدمة وثم تذكرت ما حدث معها ليلة أمس نظرت إليه بغضب
ميرال:انت شنو اللي سويته البارحة شلون عفتني الوحدي وقفلت عليه الباب
قيصر:اسف بس البارحة اتصلوا بيه كالو بابا تعب ونقلوا للمستشفى ورحت عليه وبالغلط قفلت الباب ما انتبهت
ميرال:بالغلط اكو واحد يقفل الباب بالغلط.... انت ما تدري البارحه شصار بيه اجيت اموت من الخوف
قيصر:اسف بس ما انتبهت اعتذر منج
نظرت الى فستان الزفاف وتحدث بعصبية
ميرال:حتى ما عندي ملابس ابدل
تركته وذهبت للحمام اغتسلت وجهها وهدئة قليلاً وثم تذكرت كلامها معه
ميرال:اني شنو سويت شلون حجيت وياه بهاي الطريقة هسة شيكول عليه .....بس هو الغلطان قفل عليه باب وخلاني ميته من الخوف وهسة اجه يعتذر.... شيسوي مرض ابوه خربطه وما انتبه..... اوووف
وضعت المنشفه عليها وخرجت وجدت ملابسها على السرير
ميرال:هاي شنو ملابسي منو جابهن
اخذت فستان زهري فاتح و ارتدته و رفعت شعرها الى الاعلى ووضعت القليل من مستحضرات التجميل ونزلت الى الاسفل سمعت صوت ضحكات في غرفة المعيشة وعنده دخولها وجدت الجميع يجلس على الطاولة و يتناولن الطعام
ميرال:صباح الخير
الجميع:صباح النور
ميرال:اسفه على التأخير
حسن:لا بالعكس بنتي عادي اتفضلي اكعدي يم زوجج
اقتربت وجلست بجانب قيصر
ميرال:شلون صرت عمي سمعت بيك مريض
حسن:شنو
ميرال:صحتك شلون صارت البارحة مو تخربطت
حسن:اها.... اي صحيح ارتفع عندي الضغط شوي
فادية:شبيك ابو قيصر شكلك بديت تنسى
حسن:اي صح
كانوا الجميع مرتبكين ويتحدثون معها وثم نهض قيصر من الطاولة
قيصر:اني شبعت
حسن:وين بعدك ما كملت
قيصر:لا هذا كافي
فادية:ابني مو زين عليك لازم تاكل شوي مثل ما كال
ميرال:شنو
نظر العم حسن الى زوجته بغضب
حسن:قصدها مو زين عليك اذا متاكل هواي
قيصر:لا هذا كافي يله اني طالع اتمشى شوي
خرج قيصر ونهضت خلفه ميرال
ميرال:قيصر .....قيصر
توقف والتفت إليها اقتربت منه
ميرال:حبيت اعتذر منك على كلامي وياك اليوم الصبح
قيصر:لا ماكو داعي
ميرال:شلون ماكو داعي اصلام مجان لازم احجي وياك هيج
قيصر:هذا حقج مجان لازم اتصرف هيج
ميرال:حتى لو بس مجان لازم احجي وياك هيج
قيصر:عادي مصار شي
ميرال:انت وين رايح
قيصر:امشي شوي
ميرال:تحب اجي وياك
رد عليها بنبره غضب جعلتها تتراجع
قيصر:اريد امشي الوحدي انتي شكو جايه
ميرال:تمام براحتك
تركته ودخلت للمنزل انزعجت لتصرفه ذهبت الى غرفتها وعنده دخولها سمعت صوت الهاتف كان يرن نظرت للرقم كانت سالي تتصل بها
ميرال:الو
سالي:الو اهلا بالعروس شلونج شخبارج بشري شلون الوضع
اجابتها من بملل
ميرال:تمام
سالي:وشبيج تحجين وما الج واهس
ميرال:ماكو شي
سالي:شنو ماكو شي البارحة شصار
ميرال:مصار شي عافني بالغرفة الوحدي وقفل عليه الباب والصبح يله فتح الباب
سالي:شنو
ميرال:اي البارحه ابوه تخربط ونقلوا للمستشفى وطلع وقفل الباب عليه
سالي:شنو هاي
ميرال:واجه اليوم اعتذر وخلص الموضوع
سالي:وهسة هو وين
ميرال:شمدريني طلع اكلج تندمت على هذا الزواج جاي احس مجبور عليه متأكدة اكو احد بحياته
سالي:شنو هذا الحجي ليش شفتي شي
ميرال:لا بس تصرفاته وياي تكول هيج
سالي:لا تستعجلي اصبري وشوفي انتي بعدج بالبداية
ميرال:الله كريم يله اروح انام
سالي:ماشي حياتي ديري بالج على نفسج
ميرال:اكيد
اقفلت الخط وخرجت من غرفتها اصبحت تتجول في المنزل نزلت إلى الاسفل كانوا الجميع في غرفة الضيوف يتحدثون تركتهم وخرجت تتجول في الحديقة وثم رأت كوخ كبيرة استغربت كثيراً من وجود هذا الكوخ في المنزل.... ترى ما يفعلون في مثل هذا الكوخ في المنزل اقتربت منه و وقفت امامه كانت تريد الدخول ولكن هناك شيء بداخلها يمنعها من الاقتراب منه ولكن فضولها يقتلها لمعرفة الامر اقتربت منه اكثر ارادت ان تفتح الباب ولكنها شعرت بشخص يقترب منها من الخلف التفتت بفزع لترى قيصر يقف خلفها
ميرال:انته
وضعت يدها على صدها لتاخذ نفس
ميرال:خوفتني
قيصر:انتي شتسوين هنا
ميرال:مليت كلت اطلع امشي شوي بس شفت هذا الكوخ
التفت إلى الكوخ قائلة
ميرال:انتو ليش حاطين كوخ جبير مثل هذا بنص الحديقة
صمتت قليلاً وثم قال
قيصر:جان حارس البيت ينام هنا
ميرال:ينام هنا بنص الحديقة؟ اني سامعه الحراس ينامون يم باب البيت
قيصر:هو يريد هنا
ميرال:زين وهسة هو وين
قيصر:طلع هسة وصار هذا الكوخ مثل المخزن
ميرال:مخزن ؟بهذا المكان
قيصر:اي يعني نحط بيه بس الغراض القديمة
ميرال:اها
قيصر:يله امشي للبيت ولا تجين على هذا الكوخ بعد ميرال:ماشي
اخذها وذهبوا بعيداً عن ذلك الكوخ وعنده ابتعادهم عنه انفتح باب للحظات واقفل وكأنما احد قام بفتحه واقفله من جديد.....
عائلة ميرال"
زينب:ماما اتصلتوا على ميرال
مديحة:اي خابرت البارحة بليل
زينب:ليش ما خلتيني احجي وياهه مشتاقتلها هواي
مديحة:من تتصل اخليها تحجي وياج
زينب:وشوكت بعد تحجي انتي خابريها هسة
مديحة:لا حبيبتي ميصير نخابرها عيب
زينب:ليش عيب
مديحة:لان عروس هسة هي ولازم تبقى يم زوجها
زينب:تبقى يم زوجها احنه راح نخابرها مراح ناخذها منه
مديحة:ام لسان طويل كلتلج عيب ندك عليها هسة
زينب:كل ابنيه تزوج لازم اهلها ميتصلون عليها
مديحة:اي
زينب:لعد اني مراح ازوج
مديحة:هجم بيتك بكد الدوده وتدورين زواج
زينب:يا دوده اني جبيرة وبعدين ماكو بنيه بكد الدوده
مديحة:امشي ولج ام لسان
وفجأة سمعوا صوت الباب وذهبت زينب لكي تفتح الباب كان والدها
زينب:اجه بابا
ماجد:هلا ببنتي الحلوة
زينب:اهلا بابا اني اريد اكلك قراري
رفع حاجبه قائلاً
ماجد:قرارج
زينب:اي اخذت قرار مهم
جلس على الارض ليصل لمستواها وامسك بيدها
ماجد:وشنو هو هذا القرار العظيم
زينب:ما اريد ازوج بعد
لم يتحمل الاب كلامها واصبح يضحك
زينب:ليش تضحك كلامي غلط
توقف عن الضحك
ماجد:لا اسف بس ممكن اعرف شنو هو السبب اللي خلاج تاخذين مثل هذا القرار العظيم
زينب:لان سمعت البنيه اللي تزوج بعد ما تخابر اهلها واني اريد اخابركم كل يوم
ماجد:ومنو كلج هذا الحجي
زينب:ماما لان كلتلها اريد اخابر ميرال كالت ميصير ولهذا اني اخذت هذا القرار
اراد ان يضحك ولكنه امسك بنفسع بصعوبة
ماجد:لا حبيبتي ميصير تاخذين هذا القرار هسة انتظري لحد ما تكبرين يجوز يغيروا هاي العاده
زينب:ولو هذا قراري
ماجد:براحتج حبيبتي
زينب:راح اروح ادرس
ماجد:ماشي حبيبتي كملي دراستج حتى تكبرين بسرعة
تركته وذهبت وعنده ابتعادها عنه لم يتحمل كتمان ضحكته اكثر من ذلك وثم دخلت زوجته عليه
مديحة:شبيك تضحك وياه نفسك
ماجد:اضحك على حجي بنتج متريد تزوج هسة
مديحة:قصدك على هاي الخبله
ماجد:اي ههههههه
مديحة:اي البنيه متريد تزوج
ماجد:اي المفعوصه وينها وين الزواج
مديحة:ههههههه
ماجد:شلونها ميرال ما خابرتي عليها
مديحة:لا كلت فد شوي اخابرها واطمئن عليها
ماجد:اي اريد اسمع صوتها مشتاقلها هواي
مديحة:لحكت تشتاق الها مصارلها هواي
ماجد:بس هاي اول مرة تبتعد عنه هيج
مديحة:هاي سنة الحياة كل بنيه والها يوم تعوف بيت اهلها وتزوج
ماجد:اي والله....
بعد مرور شهراً لقد حدث اشياء كثيره خلال تلك الايام لم يستوعب عقل ميرال لم تصرفات قيصر الغريبة والمخيفة ولذلك قررت ترك المنزل وقد قامت بجمع أغراضها لكي تترك المنزل وكانوا عائلة قيصر يحاولون اقناعها بالبقاء ولكنها كانت مصره وقد زاد اصرارها على الخروج عندما سمعت كلام قيصر
حسن:بنتي ميصير تاخذين هيج قرار وانتي عصبية فكري بالبداية ميصير تخربين بيتج
ميرال:هو وينه هذا البيت عمي اني ما عندي بيت وياه ابنك ما حسيت نفسي مزوجه طول هل شهرين استحملت وتحملت كلشي بس توصل للضرب لحد هنا وبس اني مجايه هنا حتى اموت على يده
حسن:ادري وحقج بكلشي جاي تكولينه بس هو
قيصر:ماكو داعي تشرح شي خليها تروح
التفت وجدوا قيصر يقف امامهم كان ينظر إليها
قيصر:تردين ترحين روحي الله وياج محد جابرج تبقين هنا
اقتربت منه ونظرت إليه
ميرال:محد جابرني؟ هاي بدل ما تمنعني وتكول لا تروحين تطردني
قيصر:وليش اطردج؟ انتي مو تردين ترحين روحي الله وياج احنه الاثنين ما مناسبين و زواجنا جان غلط
تجمعت الدموع في عينيها
ميرال:غلط؟
قيصر:اي غلط ولازم نصلح هاي الغلطه
حسن:قيصر
قيصر:لو سمحت بابا انتو اخذتوا هذا القرار واني وافقت عليه بس ما اكدر اكمل وياهه بعد
ميرال:مدام متريدني ليش تزوجتني ليش مخليني مرتك لحد هسة
قيصر:وهاي احنه بيها تردين الطلاك من عيوني
كان يتكلم معها ببرود وكأنه ليس مهتم لامرها وهي كانت النيران تشتعل بداخلها
فادية:قيصر انت تخبلت شبيك شنو هذا الحجي
قيصر:لحد يدخل هذا الموضوع بينه احنه الاثنين
نظر إليها قائلاً
قيصر:اها شنو قررتي تردين الطلاك
كانت تمسك نفسها بصعوبة لم تشأ أن تضعف امامه اخذت نفس عميق وثم قالت
ميرال:اي اريد الطلاك
قيصر:ماشي بأقرب وكت راح امشي باجراءات الطلاك وراح نخلص من كل هاي المشاكل
ميرال:ماشي اتفقنا
اخذت حقيبتها وتركت المنزل وخرجت ركبت بسيارتها واتجهت الى منزل عائلتها كانت تبكي طوال الطريق وتتذكر كلامه الذي جرح قلبها
وثم وصلت الى منزلها مسحت دموعها وخرجت من السيارتها وحملت حقيبتها متجهه نحو باب المنزل طرقت الباب وبعد لحظات فتحت لها والدها وكانت مستغربه من رؤيتها بهذا الشكل
مديحة:ميرال هاي شنو جنطه شبيج
ميرال:عفت البيت
مديحة:شنو؟ ياستار ياربي ليش
ميرال:خليني ادخل
ادخلتها للمنزل كانت متعبه للغاية ولا تستطيع التحدث مع احد طلبت منها والدتها ان ترتاح قليلاً
مديحة:تعال اصعدي ارتاحي بغرفتج القديمة وبعدين نحجي
ميرال:تعبانه اريد انام ماما
مديحة:ماشي حبيبتي روحي نامي
اخذت حقيبتها وذهبت الى غرفتها بمساعدة والدتها استلقت على السرير ووضعت الغطاء عليها
مديحة:نامي و ارتاحي لا تفكرين بشي اني طالعه اذا حتاجيتي شي ناديني
ميرال:مم
تركتها وخرجت من الغرفة وعنده نزولها من السلم سمعت صوت الباب ذهبت لكي تفتح الباب وصل والد ميرال
ماجد:السلام عليكم
مديحة:وعليكم السلام
دخل للمنزل نظر إلى وجه زوجته كانت متوتره قليلاً
ماجد:خير شبيج صاير شي
مديحة:اي
ماجد:شكو ياستار
مديحة:ميرال عدنه
ماجد:ميرال شبيها
مديحة:ما ادري شنو صاير اجتي قبل شوي وجايبه جنطتها وياهه
ماجد:شنو ليش صاير شي
مديحة:ما ادري ما حجيت وياهه عفتها ترتاح وبعدين نحجي وياهه
ماجد:شكو اخاف متعاركه وياه رجلها
مديحة:شكلها هيج
ماجد:ياستار ياربي مصارلها هواي هنه شهرين لحكت تصير مشاكل بينهم
مديحة:شنسوي هسة
ماجد:اني راح اتصل على حسن افتهم السالفه منه
مديحة:لا لا تتصل خلي من تكعد ميرال تشرح لنا الموضوع
ماجد:ماشي ننتظر ونشوف.....
