قاموس العشق للعاشقين

(نيكس)

بعد فترة وصل أصدقاء نادر مسرعين فصعدوا إلي غرفته حيث إنقضوا داخل الغرفة...
تبادلوا الإطمئنان عليه واحدا بعد آخر ورغم أنه سعيد بوجودهم...لم تفارقه الدموع...
خاطر: ايه يا (نيكس)...في رابر يقع كده وييأس كده؟!...
رد عليه بكل هدوء...
-احيانا يا خاطر حتي (نيكس) بيحس انه اتسفلت في الارض...
-بس مش لدرجة انك تنهار وتنتحر...
نظر له بتعجب فطمأنه...
-ماتخافش...الدكتور قاللنا اللي حصل وانا هزقته وقلتله مايقولش لأي زوار تاني عن الموضوع ده...وبعدين ازاي يا نادر؟، ده انت مثلنا الاعلي في "إبتسم للحياة تبتسم لك"...
ثم صمت قليلا وبعدها أردف...
-فاكر يلا يا نيكس لما الاستوديو بتاعي ولع وحتي الفلوس اللي في الدرج النار اكلتها...لما الاجهزة كنت جايبها قسط ولبست الفلوس ...يومها مش كنت هاقطع شراييني بس ...ده انا كنت هضرب نفسي بالمسدس في بؤي زي الفيلم التسعيناتي ده...
نظر للناحية الأخرى ولكنه نظر له ببلاهة مازحا...
-ياتري مين اللي هداني واقنعني ابدأ من جديد؟
جبل: هو نادر الواطي
-بالظبط وبقيت الحمد لله حاليا من الاستوديوهات المعدودة ع الايد في الهاي كواليتي...
اسلام: فاكر ياد يا نادر لما الموتسكل بتاع الشغل اتسرق مني ولبسوني تمنه...لولاك بعد ربنا كنت انهمرت في كآبتي وحالتي النفسية الزفت...الحمد لله دورت معايا وعملنا البلاغ...واخيرا الشرطة لقيته ورجع...
جبل قفز وسط الكلام...
-فاكر ياد يا نادر لما البت ضحكت عليا وقالتلي انها كانت بتتسلي...مين اللي منعني اروحلها المحل واف**ها...
ضربه كابو علي كتفه و أومأ بمعني أخفض صوتك والده خارجا...
ماز: اه صح، وانا مين اللي نصحني لما امي قالتلي انها عاوزة تجوزني بنت خالي...هاه مين نصحني وقالي اقتل بنت خالك ياماز...مش انت؟ ...
راوي: م الاخر كلنا وقت انكسارنا ماكانتش عنينا بتشوف الحلقة البسيطة المفقودة لأجل ما نقوم واقوي م الاول...دايما كان عندك الملكة انك تشوف ابعد ولو بخطوة واحدة...ما ينفعش بعد كل ده نيجي احنا ونقولك علي خطوة ما شفتهاش وهي تحت رجلك...لكن بجد يا نادر...ما ينغعش تقع وفيه ناس كتير معتمدة عليك...
خاطر مازحا...
-سقفة لراوي شكسبير يا رجالة
صفقوا جميعا الا نادر ذو اليد القطنية البيضاء الكبيرة...فوضع خاطر يده المعارضة ليد نادر المربوطة ليصفق عليها...
إبتسم نادر أخيرا  وبدأت المدامع تندثر شيئا فشيئا...